သစ်ကောင်းတစ်ပင်-၁

"ဉာတကာနဉ္စ သင်္ဂဟော" တဲ့ ဆွေမျိုး ဉာတကာ တို့အား ပြုစုလုပ်ကျွေး စောင့်ရှောက်ခြင်း သည် မင်္ဂလာတစ်ပါး မည်ပါသတဲ့။ ကျမက ဒါကို လုံးဝ လုံးဝ လက်ခံ ကျင့်သုံးခဲ့သူ တစ်ယောက်ပါ။

အဲဒီကနေ တဖြည်းဖြည်းနဲ့ အေးလေ...မင်္ဂလာတစ်ပါးပါပဲ...။ မင်္ဂလာရှိပါတယ်ဟယ် ပေးလိုက် ပါ...။ အင်း မင်္ဂလာတော့ မင်္ဂလာပေါ့ လေ...။ အေးဟေ့ မင်္ဂလာရှိတယ်ပဲ မှတ်လိုက်ပါ့မယ်...။ နောက်ဆုံးကျတော့ သောက်မင်္ဂလာဟေ့ ယူကြ ယူကြ လို့ ထအော်ဟစ် ရတော့မလိုကို ခံစား ခဲ့ရဖူးပါတယ်။

ဆွေမျိုးတွေနဲ့ ပါတ်သက်ရင် ကျမ ခပ်ငယ်ငယ် အပျိုပေါက် အရွယ်လောက် ကတည်းက ခါးသီးခဲ့ဖူးတယ်။ အမေ့ အကိုဝမ်းကွဲ ကျမ ဘကြီးက နတ်က တော်၊ သူ့ဟာနဲ့သူတော့ နာမည်ကြီးပါပဲ အဲဒါကို သူ့ဟာသူ နတ်ကနေတာ အကောင်း၊ အမေ့လာပြီး ဆိုင်းဝိုင်းထောင် ခိုင်းတယ်။ နတ်ဆိုင်းဝိုင်းက ဘယ် လောက်ရင်းရင် ရတယ်၊ နတ်ရာသီတခု လိုက်ပြီးအငှား တီးပေးရင် ဘယ်လောက်ကျန်တယ် ဘာ ညာပေါ့။

ဒါနဲ့ အမေကလည်း နားမလည် ပါးမလည်နဲ့ သူ့အကိုစကား နားယောင်ပြီး ဆိုင်းဝိုင်းကြီးဝယ်၊ နတ်ဆိုင်း ထောင်ပါတော့တယ်။ အဲဒါ တခါ တည်း ဆိုင်းဝိုင်းကြီးကို ဘကြီးလက် ဝကွက်အပ် လိုက် တော့တာပါပဲ။ ဘကြီးကတော့ အင်မတန် အဆင် ပြေတာပေါ့လေ ဆိုင်းဝိုင်း အပိုင်နဲ့ နတ်ကတော်ဟေ့ ဆိုပြီး အတော့်ကို မာန်တက်ခဲ့တော့တာ၊ နှမဆိုင်းဝိုင်း သူ့ဆိုင်းဝိုင်းကိုး...။

ပထမတော့ တပွဲကပြီးတိုင်း အမြတ်ငွေ ဘယ်လောက်ဘာညာနဲ့ လာအပ်သား...။ နောက်ပိုင်းလည်းကျရော ပွဲမကရဘူး၊ ပတ်စာ ထည့်ဖို့၊ ပစ္စည်းလဲ ထည့်ဖို့....ဖို့...ဖို့တွေ အများကြီးနဲ့ ပြန်အပ်ငွေ နည်းလာတော့တာပါပဲ။ နောက်ဆုံးတော့ ကိုယ်တိုင်လည်း မလိုက်နိူင်၊ နားလည် တဲ့ စီးပွားရေးလည်း မဟုတ်ခဲ့တော့ အရှုံးခံပြီး ပြန် ရောင်းပစ်ခဲ့ ပါတော့တယ်။

အမေ့ဘက်က အကိုပြီးပြန်တော့ တခါ အဖေ့ဘက်က အကို။ သူက အငှားကားမောင်းတယ်။ အဖေ့ကို ငါ့ညီ ကားတစီးဝယ်ကွာ အကို မောင်းပေးမယ်။ အုံနာခ တနေ့ ဘယ်လောက် ပြန်ရ မယ်၊ ဘယ်နှနှစ် ကြာရင် အရင်းကျေမယ် ဆိုပြီး မစားရ ဝခမန်း ပြောပြန်ပါတယ်။ တကယ်ပါ ကျမ အဖေအမေတွေက သိတ်ယုံလွယ်သူတွေပါ။ အဖေလည်း သူ့အကို စကားနားထောင်ပြီး ပစ်ကပ်ကားတစီးဝယ်ပြီး အကို့ လက်အပ်ပြန်ပါတယ်။

ဒီနေရာမှာ မေးစရာရှိ တာက ကျမအဖေကိုယ်တိုင် ဘာလို့ မလုပ်သလဲဆို တာပါ။ အဖေက ကျမ တနှစ်သမီး ကတည်းက သင်္ဘောလိုက် ခဲ့တာမို့ အဖေ အိမ်မှာရှိချိန် အင်မတန် နည်းပါ တယ်။ ဒါ့ကြောင့် အိမ်မှာ ကျန်ခဲ့တဲ့ ကျမတို့ သားအမိတွေကို ဆွေမျိုးတွေနဲ့ စိတ်ချစွာ အပ်နှံထားခဲ့ချင်တဲ့ ဆန္ဒနဲ့ တူပါရဲ့။

ထုံးစံအတိုင်းပေါ့လေ ပထမပိုင်းတော့ ဟုတ်မလိုလိုနဲ့ နောက်တော့လည်း အဖျားရှူးသွားပြန် တာပါပဲ။ ကျမ အဲဒီတုန်းက ၈တန်းရှိပါ သေးတယ်။ စိတ်ထဲမှာတော့ ငါတို့နှယ် တရုတ်ကား ကြည့်နေရသလိုပါပဲလား တယောက်လာလည်း လူစွမ်းကောင်း၊ နောက်တယောက် ထွက်လာလည်း လူစွမ်းကောင်းနဲ့ ငါတို့သာ ပါးပါးလှီး ခံနေရတာပါလား လို့ သဘောပေါက် လာပါတယ်။

တခါ အမေ့မောင်တွေ...ကျမ ဦးလေးတွေ အလှည့်ရောက်လာပြန်ပါတယ်။ ဦးလေးတွေက အိမ်ထောင်သာ ကျသွားရော အမဖြစ်တဲ့ ကျမအမေဆီက လက်ဖြန့်တောင်းတုန်းပါ။ ကျမ ဘယ်လိုမှ ခံစားလို့ မရခဲ့ဘူး။ အဲဒီအချိန်မှာတော့ ကျမက တက္ကသိုလ် တက်နေပါပြီ။ ဘယ့်နှယ် အဖေ့မှာ ဟိုးပင်လယ် ထဲ ပင်ပင်ပန်းပန်း သွားအလုပ်လုပ်နေရတာ၊ အဲဒီကရတဲ့ ပိုက်ဆံ အမေ့လက်ထဲကနေ ဦးလေးကို ထောက်ပံ့ရမှာ ကျမ ဘယ်လိုမှ မပေးချင်ခဲ့ဘူး။ အဖေ့ကို သနားနေမိတယ်။ အမေကတော့ သူ့မောင်တွေလာရင် ရှိတာတွေ ချကျွေးရုံ တင်မကဘူး အပြန်မှာ လက်ထဲ ပိုက်ဆံထည့်ပေးလိုက်သေးတာ ပါ။

အမေက မောင်နှမ ၅ယောက်မှာ တဦးတည်းသော အကြီးဆုံး သမီး၊ သူ့အောက်က မောင် ၄ ယောက်ကို ထိန်း ရင်း ကြီးခဲ့ရတာဆိုတော့ သူ့မောင်တွေကို သံယောဇဉ်ကြီးပြီး အရမ်းညှာ တယ်။ သူကိုယ်တိုင်လည်း နဲနဲ ယောင်္ကျားဆန်ချင်တယ်။ ကျမကတော့ အဖေ့ သနား တာနဲ့ အဖေ့လုပ်စာထဲက သူ့မောင်တွေကို အမေ ပေးကမ်းနေတာတွေကို မရှူစိမ့် ဖြစ်ခဲ့ဖူးတယ်။

တခါ အမေနဲ့ ကျမ စကားများရတယ်။ အတိအကျ မမှတ်မိပေမဲ့ ဖြစ်ပုံက ကျမ လိုချင်တာ ဝယ်မပေးလို့ အမေ့ကို ငေါ့တာပါ။
"အမေက သမီးလိုချင်တာကျတော့ မဝယ်ပေးပဲနဲ့ အမေ့ မောင်တွေချည်း ဖို့နေတာပဲ" အဲဒါ ကျမ အမေ့ကို မကျေမနပ် ပြောခဲ့တဲ့ စကားပါ။ ဘာပြော ကောင်းမလဲ မီးဖိုထဲက ယောင်းမ တချောင်း ကျိုးတဲ့အထိ ကျမ အရိုက်ခံရ ပါတယ်။ အဲဒီတုန်းက ကျမ ကျောင်းပြီးကာစ အသက် အစိပ် တောင် ရှိနေပါပြီ။

ခေါင်းမာတဲ့ ကျမက မျက်ရည်တစက်မထွက်ပဲ အမေ ရိုက်တာကို ပေခံခဲ့တာ။ ပြီးမှ ခြေသလုံး က အရှိူးတွေကို အဖွားက ဆနွင်းသိတ် ပေးပါတယ်။ အမေ ရိုက်တုန်းက မထွက်ခဲ့တဲ့ မျက်ရည်ဟာ အဖွားရဲ့ "နင် ငါ့မြေးကို အဲလောက် တောင် နာအောင် ရိုက်ရသလားဟယ်" ဆိုတဲ့ အမေ့ကို ဆူတဲ့ စကားအကြား မှာတော့ မျက်ရည်ပေါက်ပေါက် ကျအောင် ဝမ်းနည်းခဲ့ရပါတယ်။ အဲဒီတုန်းကတည်းက ကျမကိုယ် ကျမသိခဲ့တာ အသားနာလို့ကတော့ နာပါစေ စကားတခွန်းရဲ့ အထိအရှကိုသာ ရင်ထဲမှာ မခံစားနိူင်ခဲ့တာ။ အမေ ခဏခဏ ပြောဖူးတယ် မောင်နှမ အားလုံးထဲမှာ ကျမက အရိုက်ခံရဆုံးတဲ့လေ။

ခုတော့ ကျမကိုယ်တိုင် အမကြီး အမိအရာ ဆိုသလို အရွယ်လေးရလာတော့ အမေ့နေရာ ကနေ ကြည့်တတ်၊ ကြည့်တတ်တော့ မြင်တတ် လာပါတယ်။ ကျမအောက်က မောင်လေး ညီမလေးတွေကို ပြန်စောင့်ရှောက်ဖို့၊ သူတို့မပြေလည်ရင် ပေးကမ်းဖို့ အလိုလို နားလည်တတ် ခဲ့ပါပြီ။ ဒါပေမဲ့ ဘကြီး နှစ်ယောက်ရဲ့ ကျမတို့အပေါ် ဆိုးခဲ့တာတွေကိုတော့ ခုထိ နားမလည် နိူင်သေးပါဘူး။ တရားသဘောနဲ့ ကြည့်ပြီး အရင်ဘဝတွေက အကြွေးတွေ ဆပ်ခဲ့ရတယ်ပဲ မှတ်ရတော့မှာပါ။

ကျမတို့မှာ သားထောက်သမီးခံ မရှိလေတော့ မောင်နှမတွေကို ထောက်ပံ့တိုင်း အမေ့ကို ပြန်ငေါ့ခဲ့သလို ငေါ့မဲ့ ကျမလို သမီးဆိုးတ ယောက် မရှိခဲ့တာ ကျမကံကောင်းတယ်ပဲ ပြောရတော့မှာပါ။ တခါ အဲဒီလို ကလေးမရှိ တာကိုက မောင်နှမတွေ အားလုံးမွေးထားတဲ့ ကလေး ကိုယ့်ကလေးဆိုသလို အားလုံး ရဲ့အရေး တို့အရေး လို့ ဆိုရမဲ့ အပေါက်ပါ။ တခုခုဆို သူတို့က ကလေးလည်း မရှိ၊ လင်မယား နှစ်ယောက်လုံးလည်း နိူင်ငံခြားမှာ အလုပ် လုပ်နေကြတာ ဆိုတဲ့ တံဆိပ်ကြီးကြီး အကပ်ခံလိုက်ရတဲ့အခါ ကျမတို့ လင်မယားနှစ်ယောက် ဟာ လူစင်စစ်ကနေ အလိုလို ငွေထုပ်စက်တွေ ဖြစ်သွားခဲ့ပါတော့တယ်။




ရေးရင်းနဲ့ ပိုစ့်အရမ်း ရှည်သွားမစိုးလို့ နှစ်ပိုင်းခွဲလိုက်ရပါတယ်...တင်တဲ့အခါ လာဖတ်ကြပါအုံးနော်....:)