New year trip

 ခရီး​တွေထွက်မိပြန်ပြီ

​နောက်နှစ်မှ စလုံးပြန်​ရောက်​တော့မယ် 😊

28Dec2024

 ​လေယာဥ်ပျံလက်မှတ်ရပြီ ငပလီကိုကွယ်...

ဆုံရပ် 1st Dec 2024

 လူ​တွေကြားထဲ မသွားဖြစ်တာ

အထူးသဖြင့် ဘာပွဲမှ မသွားဖြစ်တာ

အ​တော်ကြာသွားတယ်။

ဒါ​ပေမယ့် နှစ်​ယောက်ထဲ​တော့ ထွက်ဖြစ်ပါတယ်။အကိုကြီးလိုက်ပို့လို့ အနီးအနား ခရီးတို​လေး​တွေက​တော့ တလခြားတခါ​လောက်ထွက်ဖြစ်​နေတယ်။ ခရီးထွက်တိုင်းလည်း ပြန်လာရင် ​နေ​လောင် မည်းပြာလာတာပဲ၊ ဒါ​ပေမယ့် ​ပျော်တယ်။

စိတ်​တွေ လွတ်လပ်​ပေါ့ပါးတာ အ​နှောင်အဖွဲ့​တွေက​နေ ကင်းလွတ်​အောင်​နေတတ်လာတာ၊ ကိုယ့်ကိုယ်ကို အရမ်း​ကျေနပ်မိတယ်။ ဘာသံ​ယောဇဥ်မှ မရှိတဲ့ဘဝက တကယ်​အေးချမ်းတာပဲ...။

အကိုကြီးက​တော့ မကျန်းမာလှတဲ့ကိုယ့်ကို အ​တော်​လေး ဂရုစိုက်ရှာပါတယ်။ သူ့အ​ပေါ် တွယ်တာလာစိတ်​တွေကိုလည်း မနည်းဖြတ်ရတယ်။ ပူ​လောင်ရမှာ ​ကြောက်လို့ပါ။ 

ဒီတပွဲက​တော့ သူငယ်ချင်း​ခေါ်လို့ သွားဖြစ်တယ်။ 

ဟိုလူဒီလူ မ​တွေ့ရတာကြာတဲ့လူ​တွေကို ပြန်​တွေ့ရတာ​တော့ ​ကောင်းသားပဲ။ အရင်လို ဓါတ်ပုံရိုက်ချင်စိတ် သိပ်မရှိ​တော့တာ သတိထားမိတယ်။ ရိုက်ဖြစ်သမျှပုံ​လေး​တွေ​တိုင်းကလည်း သူများဖုန်းနဲ့ရိုက်ပြီး ကိုယ့်ဆီလှမ်းပို့တာ​တွေချည်း...။

အမှတ်တရပုံ​လေး​တွေမို့ သိမ်းထားဖြစ်ပါတယ်။

​အော်ဇီက​နေ ​ရောက်ချလာတဲ့ ညီမနဲ့ 🥰

ဒါက​တော့ သူငယ်ချင်းသက်​ဝေနဲ့ 😍

ဆထက်နဲ့​ခွေဖူ

စာအုပ် ဆပ်ပြာ နားကပ်နဲ့ မြန်မာ့လက်မှုပစ္စည်း​လေး​တွေ​ရောင်းကြတဲ့ ကိုယ်တို့ရဲ့ဆိုင်

😆😆

ခဏ​တော့ စိတ်​တွေ လွတ်လပ်​ပေါ့ပါးခဲ့ရ။

ကိုယ်လည်း သီချင်းကြိုက်​ပေမယ့် အဲ့​နေ့က ဆိုကြတီးကြတဲ့တချို့သီချင်း​တွေ အများစုက​တော့ ​တော်​တော်​လေးနားမခံနိူင်ဖြစ်ရတယ်။ 

ကိုယ်တို့​ရောင်းသူ​တွေနဲ့ ဝယ်သူ​တွေကြား စကား​တွေ​အော်​ပြောကြရတာ​တောင် မကြားရတဲ့အထိ၊ ပွဲကလည်းပြန်လာ​ရော လည်​ချောင်း​တွေပါနာတဲ့အထိပါပဲ။ စီစဥ်သူ​တွေ သတိထားစရာအချက်​ပေါ့။

ခကအ

KuchingTrip

 ဒီတ​ခေါက်​တော့ Kuchingသွားခဲ့တယ်။

သန့်ရှင်းသပ်ရပ်​နေတဲ့မြို့က​လေးပဲ...၊ ​ဒေသစာ​တွေကလည်း အရသာရှိလိုက်တာ...။ 

ဓါတ်ပုံ​​တွေ သိပ်မရိုက်ဖြစ်​တော့ဘဲ မြင်သမျှ စိတ်အာရုံထဲထည့် ခံစားတတ်လာတယ်။ အကိုကြီးက​တော့ သူပဲ ကိုယ့်ကို တဖျတ်ဖျတ်ရိုက်​နေ​တော့တာ။

အသက်​ရော အရွယ်ပါ ကြီးရင့်လာတာ သိပ်သိသာတာပဲ၊ စိတ်ဟာ ဟိုးအတွင်းသားထဲက​နေ ​ပြောင်းပြန်ဆွဲလှန်လိုက်သလို...၊ အရင်တုန်းကနဲ့ လုံးဝကွဲပြားသွား​တော့တယ်။ 

ကိုယ်ဟာ ကိုယ်မဟုတ်​တော့သလို...။ 

တ​နေ့ ထားသွားရမယ့် ကိုယ်​နေထိုင်ရာကမ္ဘာကြီးကို appreciateဖြစ်တတ်လာတယ်ဆိုရမလား...။ ဘယ်လို​ပြောရမယ်မသိဘူး။ 

အရာရာကို ​ငေး​မောကြည့်တတ်လာတယ်

ကြားသမျှ နား​ထောင်​နေချင်တယ်

စကား​တွေအများကြီး မ​ပြောချင်​တော့ဘူး

ငြိမ်ငြိမ်​လေး​နေရတာ ကြိုက်လာတယ်

ကိုယ့်ဖြစ်တည်သမျှကိုလည်း ကိုယ်တိုင် ကြည်​မွေ့နှစ်သက်တတ်ပြီ...။

တချို့သူ​တွေ ကိုယ့်အ​ပေါ် ​ပြောဆိုတာ​တွေ ပြန်ကြားရတဲ့အခါ ပြုံးပြီးနား​ထောင်လာတတ်တယ်။ ​ကောင်းသည်ဖြစ်​စေ၊ ဆိုးသည်ဖြစ်​စေ စကားလုံး​တွေအ​ပေါ် ထူးထူးခြားခြားမခံစားမိ​အောင်​နေတတ်ပြီ။ 

လက်ရှိ​ခြေ​နေကို သိပ်​ကြေနပ်တာပဲ...။

ဘဝဟာ တို​တောင်းတယ်မဟုတ်လားကွယ်...

Kuching riverထဲမှာ....

7Aug2024

 ခရီးသွားဖြစ်ပြန်တယ်...

ခဏ​တော့ စိတ်​တွေအနားရခဲ့ပါတယ်။

1Apr2024

Too cheeeessssyyy !!

(ည​ဈေးတန်းမှာ ​တွေ့ရာစားခဲ့)

ဒီပုံက​တော့ ​ရေတံခွန်မှာ အကိုကြီးရိုက်​ပေးတဲ့ပုံ

တလမ်းလုံးကားစီးရတာ ငြီးစီစီဖြစ်လာခဲ့သမျှ

ကြည်ပြီး စိမ့်​နေတဲ့​ရေထဲ ​ခြေ​ထောက်ချမိချိန်မှာ ​မောသမျှ အကုန်​ပျောက်​ရောပဲ...။

(ကိုယ့်​ဘေးမှာ​ရော ​ရှေ့မှာ​ရော လူ​တွေအများကြီးရှိတယ်။ လူ​တွေ​ရှောင်ရိုက်ပြီး ခ​ရော့ပ်ထားလို့)

 

#ခရီးသွားခြင်း

၂၅၀၃၂၀၂၄

 ကိုယ့်​မွေး​နေ့တုန်းက ပုံ​တွေမို့

မတ်၂၅​နေ့စွဲနဲ့ပဲ တင်လိုက်ပါတယ်။

အမှတ်တရ​ပေါ့...။

အကိုကြီး ရိုက်​ပေးတာ...😍

#​မွေး​နေ့#၅၅ အမှတ်တရ

10032024

 သူက မီနီတက်တူး​လေး ထိုးချင်ထိုး​ပေါ့လို့ ခွင့်ပြုလိုက်ပြီ 😄 Finally !!

​နောက်မှ တကိုယ်လုံးတိုးဝင်တဲ့ ကုလားအုတ်လို၊ တဖြည်းဖြည်း နည်းနည်းချင်းတိုး ထိုးရမယ်။

ခုတ​လော ညစာကို ​သေချာ ဂရုတစိုက် ပြင်ဆင်စားဖြစ်တယ်။ အဓိက ကျန်းမာ​ရေးအတွက်ပါပဲ။

ဒီ​နေ့ Sundayမှာ Cityhall​ရောက်လို့ ဝယ်လာဖြစ်တာ​လေး၊ အဲလို ecoprint ချည်ထည်​လေး​တွေ ဝတ်ရတာ သိပ်ကြိုက်တာ...❤️

ပိတ်ရက်မို့ လူ​တွေများလွန်းလို့ ​ခေါင်းမူးပြီး အိမ်ပြန်​ရောက်လာတယ် 😅

01032024

 ကိုယ်လည်း တက်တူး အရမ်းခ​ရေဇီဖြစ်တဲ့အထဲ ပါတယ်။ လက်ဖမိုး​ပေါ်က​နေ လက်​မောင်းရင်းအထိ အရွက်ညွန့်က​လေး​တွေ အပွင့်​သေး​သေးနီနီက​လေး​တွေ ​ပေါ်ပီခပ်ဆန်ဆန် ပွင့်ဖတ်အ​ပျော့ပန်းနွယ်က​လေး​တွေ ဆန်ပြီးဖြာတက်​နေပုံ​ပေါ့...၊ 

အဲလိုမျိုး ထိုးခွင့်ရရင် ထိုးချင်တယ်။

ကိုယ့်အမျိုးသားကလည်း နည်းနည်းမှမကြိုက်၊ ကိုယ့်အလုပ်ကလည်း တက်တူးနဲ့ဆို အဆင်မ​ပြေ၊ ကိုယ်ကလည်း အမြဲတမ်း​တော့ လက်ရှည်ဝတ်ပြီး ဖုံးမထားနိူင်ပြန်ပါဘူး။ 

ပြချင်လို့မှ ထိုးပါတယ်ဆို...။

ခွေး​မွေးချင်တဲ့​ရောဂါက​တော့ အ​တော်အတန်ငြိမ်သွားပြန်တယ်၊ အိမ်နီးချင်း​ခွေးက သူမရှိတုန်း တအိမ်လုံးဖွထားလို့တဲ့၊ ဆိုဖာ​တွေလည်း ကိုက်ထား ခြစ်ထားပြန်သတဲ့။ အဲလို​တော့ ကိုယ်နဲ့မဖြစ်​လောက်ဘူး။ ဟိုလူကြီးက​တော့ ​ပြောမ​နေနဲ့​တော့၊ ကိုယ့်ကိုယ်ကို​တောင် ဂရုတစိုက်မစား မအိပ် ​ရေချိုးဖို့​အော်​နေရတာကိုများ တဲ့၊ ​ခွေး​တော့ ​ခွေးဖြစ်ရှုံးဦးမယ် သူ့လက်ထဲ​ရောက်ရင် တဲ့...။

ခုတ​လော တက်တူး​ရောဂါ ပြန်ထ​နေပြန်ပြီ...၊

လာမယ့်​မွေး​နေ့ မတိုင်ခင်ကွာ...

မ​သေခင် ထိုးဖူးတယ်ရှိ​အောင်ကွာ

ဒီဘဝမှာ တက်တူး​လေး​တခု​လောက်​တော့ကွာ..

​နော်...

​ပြောလည်းပဲ သူက​တော့ ခွင့်ပြုချင်ပုံမ​ပေါ်ပါ...။

သူမသိ​အောင် သူ သတိမထားမိ​လောက်တဲ့​နေရာမှာ ထိုးရင်​ရော...၊ မဆိုးဘူးထင်တာပါပဲ၊ သိသွား​တော့လည်း လုပ်ပြီးပြီမို့ သူဘာမှ​ပြောနိူင်​တော့မှာ မဟုတ်၊ ပွစိပွစိလုပ်လည်း ခဏ​ပေါ့ ဆိုတဲ့အကြံနဲ့ တိတ်တိတ်​နေ​နေရတယ်။ 

ရယ်ရတယ် သူနဲ့ကိုယ်က ဘယ်​နေရာမှမတူ...။

ဘာအကြိုက်ချင်းမှလည်း မတူ။

ရုပ်ရှင်မကြိုက်တဲ့သူနဲ့ ရုံမှာကြည့်ရတာကြိုက်တဲ့ကိုယ်၊ ဒီ​တော့ တ​ယောက်ထဲ သွားကြည့်ဖြစ်​တော့တာပါပဲ။ 

တ​နေ့ ကိုယ်​နေတဲ့နိူင်ငံမှာများ ဝိ တရားဝင်​သောက်လို့ရရင် ​သောက်ဦးမှာဆို​တော့ သူက ​ခေါင်းခါပြတယ်၊ နိူး ​နော် ဒါက​တော့ ဆိုတဲ့ပုံမျိုး။ 

အိတ်စကျူ့စ်မီ ဝိ is vege you know ? 

Whatever !

သိသားပဲ သူအဲလို​ပြောမယ်ဆိုတာ၊

Use for recreational purpose...its ok !

No way..not ok

Hummm ok okay,  you win !

ဒီလိုပါပဲ...

​ယောကျာ်းမယူကြနဲ့​ဟေ့

ကိုယ့်ကိုယ်ကို မပိုင်​တော့ဘူးဟ။

မယူခင်က​တော့ ဘာလုပ်လုပ် အလိုလိုက်မယ့်ပုံနဲ့။

ခု​တော့ အကုန်သူ့သ​ဘော။

အိမ်ကပန်းက​လေး​တွေ ကြည့်ရတာပဲ စိတ်ချမ်းသာတယ် အဟုတ်...၊

နာကျင်​နေ့ရက်​တွေ...

 ဒီရက်​တွေမှာ ​နေလို့မ​ကောင်းဘူး

ဘာကို ​ကြေ​ကြေကွဲကွဲခံစား​နေမိမှန်း မ​ပြောတတ်ဘူး။ ​မြောက်ခင်ရမ်းရွာကိစ္စပြီးကတည်းက လူဟာ ​နေလို့မ​ကောင်းဘူး။ ဒီ​လောက် ရက်စက်ကြမ်းကြုတ် နှလုံးသားမဲ့တဲ့လုပ်ရပ်မျိုး ငါတို့ဆီမှာ ရှိတယ်။ ရဲရင့်လွန်းတဲ့ လူငယ်က​လေး​တွေ အကျိုးမဲ့ဆုံးရှုံး​နေရတာ ရင်နာစရာ...။ တိုင်းပြည်ကြီးတခုလုံး ​အမှောင်တိုက်ထဲ​က မထွက်နိူင်​သေးသ၍ လူငယ်က​လေး​တွေ လူ​တော်က​လေး​တွေ ဘယ်​လောက်ဆုံးရှုံးကြရဦးမှာလဲ။ ​တွေးရင်းက နှလုံးသား​တွေနာရတယ်။

 France24က KNDF အ​ကြောင်း ducumentaryဆန်ဆန် ရိုက်ထားတာ​လေး ကြည့်ပြီး ငိုချင်ပြန်​ရော...။ တာဝန်​ကျေတာထက်ပိုလွန်းပြီး ​ခေတ်ဝန်ကို မတွက်မကပ်ထမ်း​နေကြရှာတဲ့ လူငယ်က​လေး​​တွေ...။ 

​ကွန်မန့်​တွေဖတ်ကြည့်မိပြန်​တော့ ပိုဝမ်းနည်း။

ငါ့နှယ် အလိုလို​နေရင်းမှ ​ကြေကွဲ​နေရတဲ့​နေ့ရက်​တွေထဲ...၊ ​လောင်​နေသူကို လာကူရှို့​နေတာလိုပဲ။

InsideMyanmar-France24 ကယား/ ကရင်နီအာမီ

ChinYoungFighters ဒါက​တော့ ချင်းလူငယ်က​လေး​တွေ...။

​အားလုံးဘေးကင်းကြပါ​စေ 

တ​နေ့ အိမ်အပြန်လမ်း တည့်တည့်မတ်မတ်ကြီး ​ချော​မွေ့နိူင်ကြပါ​စေက​လေးတို့​ရေ...

07022024

 

အိမ်က ပန်းက​လေး​တွေ...

ပန်းက​လေး​တွေ စိုက်ရတာ စိတ်ချမ်းသာတယ်။ ​ရေ​လောင်း ပြုစု သူ့အချိန်တန် ပွင့်တာပဲ...။ ဒါ​ကြောင့် အသက်ရှည်ချင် အပင်စိုက်လို့ ဆိုကြတာ။

ပန်းက​လေး​တွေကို ချစ်ရသ​လောက် လူ​တွေကို​တော့ ​ကြောက်လာတာ။ လူ​တွေနဲ့ပတ်သက်ရင် ကိုယ်​ကောင်းသ​လောက် ဘယ်​တော့မှ ထပ်တူပြန်မလာဘဲ အသုံးချခံရတာများပါတယ်။ သုမန​ကျောမှာ ဒဏ်ရာ​တွေနဲ့ဆိုတာမျိုးမို့ ကြာ​တော့ သ​ဘောမ​ကောင်းချင်​တော့ဘဲ အလယ်မှာ ကြားချ​နေတတ်လာတယ်။ ခံစားချက်မထားတတ်​တော့ဘူး။ လာရင်​ပြောလိုက်မယ် မလာလည်း မလွမ်း​တော့ဘူး။ စိတ်ကိုဖြတ်ချပြီး အမျှင်မတန်း​အောင် ​နေတတ်လာတယ်။ 

ဘယ်သူက ဘယ်လိုလူဆိုတာ အချိန်​တွေကပဲ စကား​ပြောသွားမှာပါ...၊ အဲသလိုပဲ စိတ်ချထားလိုက်ပါ​တော့တယ်။ 

ကျွန်မက ဘယ်လိုပါ ဘယ်ညာပါ ရှင်းပြ​နေလည်းပဲ ချစ်လျင်အကျိုး မုန်းလျင်အပြစ်ဆိုတာလို ခံစားမှု​တွေက ဘက်လိုက်တတ်​သေးတာကို...၊

ဘယ်သူ့အ​ပေါ်မှာမှ အကျိုးမဲ့​အောင် မ​ပြောခဲ့ မလုပ်ခဲ့ဘူး၊ ဒါကပဲ ကိုယ့်သစ္စာဖြစ်တယ်...။

အသက်က​လေးကလည်း ​တော်​တော်ရလာပြီ၊ ​နေမယ်ဆို​နေလို့ရ​သေးသလို ထားမယ်ဆိုလည်းထားခဲ့လို့ ရပြီဆိုတဲ့အချိန်ပါပဲ။ ဘဝကြီးက ဘာမှမှ မဟုတ်တာကို​တော့ သိခဲ့တာ ကြာပြီ။ ပိုပြီး ​ဖြေသာလာတာကလည်း အဲတာ​ကြောင့်ပဲ။ ထားခဲ့ရမှာ​တွေအတွက် စိတ်​မောလူ​မော မဖြစ်လိုဘူး။ 

တ​နေ့ ကိုယ်မရှိ​တော့တဲ့အခါဆိုတာမျိုး​တွေကလည်း ဘာမှ အဓိက မကျ​တော့ဘူး။ 

​ပေါ့​ပေါ့ပါးပါးက​လေး ထွက်ခွာသွားဖို့ပဲ...၊

ဟုတ်တယ် အတတ်နိူင်ဆုံး အညင်သာဆုံး...၊ ခန္ဓာ​ပေါ်ရှိသမျှ ​ဝေဒနာ ​ပေါ် ​ပျောက်​တွေကို စိတ်က​လေး ထပ်ချပ် ကပ်ရင်း ​နောက်ဆုံးထွက်သက်အထိ အ​နှောင်အတွယ်မဲ့ ပျံသန်းထွက်သွားလိုက်ဖို့ပဲ...။

ဘဝဟာ တိုတိုက​လေးဆိုလည်း ​ဝေဒနာ​တွေခံစား​နေရချိန်ကဖြင့် ရှည်ကြာလွန်းတယ်လို့ ဆိုကြတယ်ဟုတ်လား။ 

ဘဝမှာ အ​နေတတ်ဆုံး စိတ်အထားတတ်ဆုံးအချိန်ကို ပြပါဆိုရင်ဖြင့် အခုအချိန်ပါပဲ...။

21012024

 

၂၀၂၄အစမှာကိုပဲ ဝမ်းနည်းစရာ​တွေ ကြားရတယ်။ 

ကိုယ်ကြိုက်ခဲ့ရတဲ့ အန်တီ​ဒေါ်မာမာ​အေးဆုံးပါးသွားပြီဆိုတဲ့သတင်းအပါအဝင်​ပေါ့။ တကယ့် နှစ်​ယောက်မရှိတဲ့ ဂန္ဓဝင်အဆို​တော်ကြီး​လေ...၊ သူ့အသံ သူ့သီချင်း​တွေနဲ့ မြန်မာသံစဥ်သီချင်း​တွေကို ယဥ်ပါးခဲ့ရတာ။ ကျွန်မ တက္ကသိုလ်တက်တုန်းက အနုပညာအသင်း လူ​ရွေးပွဲမှာ သူ့သီချင်း ဆိုခဲ့တာ။ တူနှစ်ကိုယ် ဆိုတဲ့သီချင်းကို ​ရွေးဆိုခဲ့တာ​လေ။ (မှတ်မိ​သေးတယ် ​ဒေါနစိမ်း​ရောင် ရင်​စေ့လက်ရှည်နဲ့ ဇင်းမယ်ချိတ်နဲ့ တွဲဝတ်ပြီး မျက်နှာ​ပြောင်နဲ့တက်ဆိုခဲ့တာ)​။ ဘေးအ​ဆောင်က တီချယ်ကြီး​တွေ​တောင် သီချင်းလူ​ရွေးပွဲရှိတဲ့ အ​ဆောင်ဘက်ကူးပြီး လာနား​ထောင်ကြတယ်။ (အဲ့ပွဲပြီးကတည်းက တီချယ်ကြီး​တွေက ​ကျောင်းမှာဘာပွဲလုပ်လုပ် "ဟိုတူနှစ်ကိုယ်​လေး"ပါထည့် အဲလိုဖြစ်​တော့တာ 😅) ​ဒီလိုနဲ့ ကျောင်းပွဲ​တွေမှာ ပွဲတိုင်း​ကျော်ဖြစ်​တော့တာပဲ။

ပြောချင်တာက အန်တီ​ဒေါ်မာမာ​အေးဟာ ကျွန်မနဲ့ လူချင်းသာ မသိလိုက် မမြင်ဖူးခဲ့လိုက်ရ​ပေမယ့် သူ့သီချင်း​တွေနဲ့ကျွန်မနဲ့ကဖြင့် အ​တော်​လေး ဆုံခဲ့ကြဖူးတာ။ 

သူ့အသံဟာ စကားလုံး​တွေနဲ့ ​ပြောပြလို့မမီနိူင်​အောင် ပြည့်စုံလွန်းတယ်။ သူ့အသံထဲမှာ အ​ဆွေး အလွမ်း အ​သော အ​ထေ့ အရှိုက် အရယ်အ​မော အကုန်ပါတယ်။ သူ့အသံထဲစီး​မျောလိုက်ပါရတာကိုက စိမ့်​နေ​အောင်အရသာရှိတာ။ တ​ရေးချစ်ခွင့်မြင်ရနိူး ဆို နား​ထောင်ပြီးတိုင်း နုန်း​ခွေသွား​တော့မတတ် သူနဲ့အတူ ​မောဟိုက်ရတယ်။ 

"ကြာ​လေ​လေ သတိရတိုင်းတိုင်"...၊ 

"ထိလုမိုးဆီ တိမ်သို့မီသား ထွဋ်ဘုန်း​ခေါင်ဖျား မြ​စေတီအပါး၌ နယ်ခြား​မြေ​ဝေး ​နှောင်းချစ်​ထွေးနှင့်"...၊ 

စာသား​တွေက တကယ့်အနှစ်​တွေ ကျစ်လစ်​နေတာပဲ။

အချစ်​ရေက​တော့ ကျွန်မ ခပ်ငယ်ငယ်တုန်းက တ​နေ့ ​စောင်းတီးသင်တဲ့အခါ အဲ့သီချင်းတီးတတ်​အောင် တီးသင်မယ်လို့ စိတ်ကူးမိခဲ့ဖူးတဲ့အထိပဲ။ 

ချစ်အဓိပ္ပါယ် နှင်း​ပျောက်တဲ့​နွေ မေ့ကွက်ကိုရှာ

မနက်ဖြန်မှဆက်၍ငိုမယ် ချစ်အားငယ်ရသူမယ်

အ​ကောင်းဆုံးများစုစည်းမှု

သီချင်း​ပေါင်းများစွာ လူ​တွေရဲ့ရင်ထဲထိ ပစ်ခတ်ထားရစ်ခဲ့ပြီး သူက​တော့ ဟိုးအ​ဝေးကြီးဆီ ခရီးဆက်ထွက်သွားခဲ့ပြီ။ ကျွန်မတို့ နှစ်ခါပြန်မရနိူင်တဲ့ အဆိုပညာရှင်ကြီး...။ သူဆုံးတဲ့သတင်းတက်လာတဲ့​နေ့ကတည်းက သူ့သီချင်း​တွေ youtubeမှာ ပြန်ရှာ တ​နေကုန်ဖွင့်ထားပြီး နား​ထောင်​နေမိတယ်။ လွမ်းစရာ​...။ နှ​မျောလိုက်တာ...။ 

တချိန်တည်းမှာ ကျွန်မကိုယ်ကျွန်မ သတိထားမိသွားတာတခုက ကျွန်မဟာ ဟိုခပ်ငယ်ငယ်ကတည်းက အလွမ်းအ​ဆွေးသီချင်း​တွေချည်း ကြိုက်ခဲ့တယ်ဆိုတာကိုပဲ။ 

ခင်ညွန့်ရည်ဆိုတာ​တွေလည်း ကြိုက်ခဲ့တာပဲ။ အလွမ်းသီချင်း​ရေးတဲ့ ​မောင်​ကျော်​ဇော၊ ခင်ညွန့်ရည်ဆိုပြီး အ​ခွေကာဗာမှာ ဆံပင်အုံထူထူအနက်အရှည်ကြီးအသား​ပေး ဖြန့်ချထားတဲ့ ခပ်​ဆွေး​ဆွေးအမျိုးသမီးပုံကို မှတ်မှတ်ရရကို မှတ်မိတာ။မိုးမခအလွမ်း၊ သို့ မိုးရိပ်ဧည့်သည်၊ မိုး၊ သူနဲ့​တွေ့ရင်၊ ​မောင်သိ​စေလိုတယ်၊ စမ်း​ချောင်း​လေးရှိရာအရပ် အဲလိုသီချင်း​​တွေ...လိုက်​အော်ဆိုခဲ့တာ​ပေါ့။ မိုးမခအလွမ်းအ​ခွေကို ကြိုက်လွန်းလို့ ခဏခဏ နား​ထောင်ဖြစ်ခဲ့တာလည်း မှတ်မိတယ်။ 

ဘုရားဘုရား...ကျွန်မဟာ လူပုံကြည့်ရင်သာ ဘရုတ်ဘရက် အခွီတလိုင်းပုံ ​ပေါ့​ပေါ့ရှပ်ရှပ် ထင်ရ​ပေမယ့် တကယ့်တကယ်ကျ seriouslyအလွမ်းသမကြီး​ပေပဲကိုး 😅😅

ကျွန်မ ၉တန်း၁၀တန်းတုန်းက နာမည်ကြီးခဲ့တဲ့ ​မေဆွိ ​မေခလာတို့ကျ အဲ့​လောက် မကြိုက်ဘူး။ အသံစူးလို့၊ အသံက နားမစွဲလို့၊ သီချင်း​တွေက ရင်ထဲမထိလို့ အဲလို...။ 

အန်တီမာမာ​အေးတို့ အန်တီခင်ညွန့်ရည်တို့လို သီချင်း​တွေမှ ငြိတာ။ 

ဒီတ​လော​တော့ အန်တီ့သီချင်း​တွေ ပြန်ရှာနား​ထောင်ဖြစ်​နေဦးမယ်...။

​ကောင်း​ကောင်းအနားယူပါ​တော့၊ လွမ်းတယ်အန်တီ....

12012024

 ​ပြောင်းလဲသွားတာ​တွေထဲ ခရီးသွားတဲ့ပုံစံ​လည်း တခုအပါအဝင်ဖြစ်တယ်။ ​ပေါ့​ပေါ့ပါးပါး ခရီးသွားရတာ ပိုနှစ်သက်လာတယ်။ အရင်ကဆို မနက်တစုံ၊ ညဘက်ဒင်နာချိန်တစုံ တ​နေ့အတွက် အဝတ်၂စုံ တွက်ပြီး သယ်သွားတယ်။ ညအိပ်ဝတ်စုံကပါ​သေး။ ဖိနပ်လည်း၃ရံ​လောက်သယ်တယ်။ အိတ် ၃မျိုး​လောက် သယ်တယ်။ ခု​တော့ တ​နေ့တစုံ၊ ဖိနပ် ၂ရံ၊ အိတ်၂မျိုးက​တော့ ​ကျောပိုးအိတ်ရယ် ​ထသွားထလာပိစိ​လေးတအိတ်​ရယ်။ ​လေဆိပ်ရောက်​တော့ ချိန်ကြည့်တာ 5kgပဲ ရှိလို့ အ​တော်အံ့သြရ​သေးတယ်။ ၅ညအိပ်၆ရက်ကို အဲ့​လောက်ပဲ သယ်​တော့တယ်။ 

ပြီးရင် အရင်ကလို မနက်​စော​စောထ သွား၊ ည မိုးချုပ်မှ ဟိုတယ်ပြန်​ရောက်ပြီး အိပ်၊ အဲတာမျိုး ပင်ပန်းရတာမျိုး မလုပ်ဖြစ်​တော့ဘူး။ ​အေး​အေး​ဆေး​ဆေး နားတယ်။ အခုမှ တကယ့်အပန်း​ဖြေခရီးနဲ့တူတာ။ အရင်ကဆို ခရီးသွားပြီးပြန်လာရင် ပိုပင်ပန်းတယ်။ ခုက​တော့ အနားယူတတ်လာတယ် ​ပြောရမယ်။ တ​နေရာ​ရောက်ရင် ​အေး​အေး​ဆေး​ဆေးထိုင် ​ငေး ကြည့် ပြုံး ပြီးရင် စားစရာရှိစားပြီး ပြန်တာပဲ။ ​ဒေသစာ​တွေဆို ​ဒေသခံ​တွေစားသလို လမ်း​​ဘေးဆိုင်​လေး​တွေ ရှာစားတတ်လာတယ်။ သန့်လည်းသန့် ​ဈေးလည်း​တော် အရသာလည်း​ကောင်းတာမျိုး​တွေ...။

ဒီတ​ခေါက်သွားခဲ့တဲ့ခရီးကလည်း ​ကြေနပ်စရာအပြည့်နဲ့ပါပဲ။ 

ကိုယ်ကြိုက်တာက အဲလို ပွပွဖားဖား လွတ်လွတ်လပ်လပ် ဝတ်ရတာ...။

ဒီတ​ခေါက် ကြိုက်ခဲ့ရတဲ့ ကာဖီဆိုင်​လေး

Your local clubတဲ့....၊ ချစ်စရာ...

ကိုယ်ကြိုက်တဲ့ အချို Churros 😋

Toastကိုက ချိစ်​တွေအများကြီးနဲ့ ကိုယ့်အကြိုက်

​ကာဖီဆိုင်​လေးက​နေ မြင်ရတဲ့လမ်း

ယူသွားခဲ့သမျှက တီရှပ်ပွပွနဲ့ ​ဘောင်းဘီတိုနဲ့ 😁

Nyonyaဆိုင်မှာ အကြိုက်ဆုံးထဲက တခု

Rose apple salad

နှင်းသီးကို အဲလိုသုတ်စားလို့ရမှန်း တကယ်မသိခဲ့ဘူး။ 

ဒါက အကိုကြီးက သူ့​မွေး​နေ့မှာ ကိုယ့်ကို ဝတ်​စေချင်လို့ ချက်ချင်းဝယ်​ပေးပြီး ချက်ချင်းဝတ်ခိုင်းခဲ့တဲ့ dress​လေး။ ကိုယ့်ဘာသာဆို အဲ​လောက်မိန်းမဆန်တာ ဝယ်ဝတ်ဖြစ်မယ်မထင်ဘူး...။ အ​ရောင်ကလည်း Cream​လေး၊ အသားကလည်း ထူထူအိအိမှာ ​ငွေမျှင်ချည်က​လေး​တွေ ​ဖောက်ယှက်ထားတာ၊ ကိုရီးယားမ​လေး​တွေ ဝမ်းဆက်ဝတ်​လေ့ရှိတဲ့အစမျိုး။

သူ​ကြေနပ်​အောင် ဝတ်ရ၊ သူ့​မွေး​နေ့ဆို​တော့ 😁

ဟိုတယ်​ပြန်​ရောက်ရင်​တော့ ဖုန်းနဲ့စာ​တွေဖတ်...

နား...၊ တကယ်ဇိမ်ကျတဲ့ trip​လေးပါပဲ...။

ကိုယ်စာဖတ်​နေတာကို သူ လှမ်းရိုက်​နေမှန်းသိလို့ သူအလုပ်ရှုပ်​နေတုန်း ကိုယ်ပြန်ခိုးရိုက် 😅😅

(သူဝယ်​ပေးလို့သာ ဝတ်ဖြစ်တဲ့ dress​လေး 😍)

Happy birthday KoKo !!

သူ့​မွေး​နေ့အမှတ်တရ ~

၀၆၀၁၂၀၂၄