အလှူ ဒါန ပြုကြသည် ဆိုရာဝယ်...

"နင့်အသက် တခါလွှတ် ငါ့အသက် ဆယ်ခါလွှတ်"

ကျမတို့ ငယ်ငယ်က ငှက်လွှတ်၊ ငါးလွှတ်ကြတဲ့ အခါ ပြောလေ့ရှိကြတဲ့ စကားလေး...
ခု အသေအချာ ပြန်စဉ်းစား ကြည့်မိတဲ့ အခါ အတော်ကလေး ရယ်စရာ ဖြစ်နေတာ...

ဘယ့်နှယ် သူ့တော့ တခါလွှတ်ပြီး ကိုယ့်ကျတော့ ဆယ်ခါ လွှတ်ရမယ် လို့ ၊ ဘေးမဲ့လွှတ်တဲ့ ဇီဝိတ ဒါန မြတ်တဲ့ အလှူပါပဲ၊ ဒါပေမဲ့ လောဘလေး တန်းလန်းနဲ့ လှူတဲ့ အလှူ ဖြစ်လို့ နေခဲ့တယ်၊ ကိုယ်က ၉ခါ အမြတ် ပြန်ရဖို့ တွက်ပြီး လှူထားတာကိုး...

တကယ်ဆိုရင် အရင်ဆုံး လှောင်ချိုင့်ထဲက ငှက်ကလေးရဲ့ နေရာမှာ ကိုယ်ချင်းစာစိတ်ကလေးနဲ့ ခဏ ဝင်ကြည့်ရမှာ ၊ ခမျာ တကယ်ပဲ ကျဉ်းကြပ်နေပါလား၊ စိတ်ဆင်းရဲ ကိုယ်ဆင်းရဲ ဖြစ်နေရှာမှာ ၊ သူလဲပဲ လွတ်လပ်စွာ ပျံသန်းချင်ရှာလိမ့်မပေါ့၊ ငါသာဆိုရင်ရော ဘယ်လိုများ ခံစား ရမှာပါလိမ့်၊ သူ့ကို လွှတ်လိုက် ရင်ဖြင့် သူ ပျော်ရှာမှာ...။

အဲဒီလို...ငှက်ကလေး အပေါ် ချမ်းသာစေချင်တဲ့ စိတ်လေး ထားပြီး တကယ် လွှတ်လိုက်တဲ့ အခါမှာလည်း ဟိုးကောင်းကင်ကြီးထဲ လွတ်လပ်စွာ တဟုန်ထိုး ပျံသွားတဲ့ ငှက်ကလေးရဲ့ ပျော်ရွှင်မှုလေး ၊ အဲဒါလေးကို ရင်ထဲ ကူးစက်လို့ ငှက်ကလေး နဲ့ အတူ ခံစားပေးရမှာ...။

ပြီးတဲ့အခါ ဘာဝနာကုသိုလ်လေး ထည့်လို့ ဪ သူလဲ မမြဲတဲ့ အနိစ္စ၊ ကိုယ်လဲ မမြဲတဲ့ အနိစ္စ၊ အဲဒီလိုလေး ဆင်ခြင်လိုက်မယ် ဆိုရင် ပိုပြီး အကျိုးများ သွားတော့တာ...။

သံဃာတော်တွေကို ဆွမ်းကပ် လှူဒါန်းတဲ့ အခါမှာလည်း လှူဖို့အတွက် ဆွမ်းချက်၊ ဆွမ်းပြင်တဲ့ အခါ ဒီဆွမ်းလေး ဘုန်းပေးရခြင်းကြောင့် သံဃာတော်တွေ ရှေ့ဆက် သာသနာ့ အကျိုး သယ်ပိုးနိူင်တော့မဲ့ အရေးတွေးလို့ ပီတိလေးနဲ့ ဝမ်းသာနေရမှာ ၊ ပြီးမှ အလှူခံ ပုဂ္ဂိုလ်သည်လဲ မမြဲ၊ လှုဒါန်းသော ပုဂ္ဂိုလ်သည်လဲ မမြဲရယ်လို့ အနိစ္စ သဘောလေးလည်း ဆင်ခြင်လိုက်နိူင်မယ် ဆိုရင် အင်မတန် အကျိုးများတဲ့ အလှူ ဖြစ်သွားပါတယ်။

ဒါတွေက မလှူခင် နဲ့ လှူနေစဉ် ထားရမဲ့ စိတ်လေးပါ။ လှူပြီးတဲ့အခါမှာလည်း ကြုံလိုက်တိုင်း ဒီအလှူလေးပြန် စဉ်းစားရင်း ဝမ်းမြောက် ပီတိလေး ဖြစ်နေရမှာ...။ ဒါဆိုရင် သုံးတန်စေတနာ ပြဌာန်းပြီး လှူထားတဲ့ အတွက် အင်မတန် ပြီးပြည့်စုံတဲ့ အလှူလေး ဖြစ်သွားပြီပေါ့ ။

ကိုယ့်ဘက်ကသာ ဖြူစင်သန့်ရှင်းတဲ့ စိတ်ထားနဲ့ ဘာမှ တုံ့ပြန် အကျိုး မမျှော်ကိုးပဲနဲ့ လှူဒါန်းပါ ၊ ဆုတွေ ဘာတွေ တောင်းနေစရာ မလိုပါဘူး ၊ အကျိုးပေးက သူ့ဘာသာ အော်တို လာပါလိမ့်မယ်။ မန္တလေး သွားတဲ့ ကား စီးမှတော့ မန္တလေး ရောက်ရမပေါ့။

အဲဒီလို မဟုတ်လို့ ဆုတောင်းချင် လှချည်ရဲ့ ဆိုရင်လဲ တောင်းပေါ့လေ။ ကျမကတော့ နိဗ္ဗာန်ဆုပဲ တောင်း စေ ချင်ပါတယ်။ ဒါပေမဲ့ နိဗ္ဗာန်က တောင်းယူလို့ မရ ၊ တကယ် အလုပ်လုပ်မှ ရမယ် ဆိုတာတော့ သတိချပ် ကြစေချင်ပါတယ်။ ဤအလှူသည် နိဗ္ဗာန်၏ အထောက် အပံ့ ဖြစ်ပါစေ လို့ ဆုတောင်းတာက ပိုပြီး အဓိပ္ပါယ် ရှိပါတယ်။

လူချမ်းသာ၊ နတ်ချမ်းသာ၊ ဗြဟ္မာချမ်းသာ တွေ ဆုတောင်းနေစရာ မလိုပါဘူး။ နိဗ္ဗာန် ချမ်းသာ ကိုသာ အာရုံပြုပြီး လှူပါ။ မန္တလေး လက်မှတ်ဖြတ်ထားတဲ့ သူဟာ လမ်းမှာ တောင်ငူတို့ ပျဉ်းမနားတို့ မရောက်မှာ ပူနေစရာမှ မလိုအပ်ပဲလေ...။




မအားလို့ စာမရေးဖြစ်တဲ့ အချိန်မှာ နှစ်သက်မိခဲ့တဲ့ ရေးပြီးသား အဟောင်းလေးတွေထဲကနေ ပြန်ရှာတင်လိုက်ပါတယ်:)