၂၀၁၁ ဟောစာတမ်း

နှစ်ဟောင်းတနှစ် ကုန်ဆုံးခါနီးမှာ စီးပွားရေး၊ ကျန်းမာရေး၊ လူမှုရေး အဘက်ဘက်က အဆင်မပြေတာတွေ၊ အညံ့တွေ ကြုံတွေ့ရတိုင်း ထွက်ခတ် ခတ်တယ်၊ အဖျားခတ်တယ် လို့ ပြောဆိုလေ့ရှိကြတယ်။ တဖက်က အဲသလို ပြောလေ့ရှိကြပြီး တဖက်ကလည်း လာတော့မဲ့ နှစ်သစ်ရောက်ရင်ဖြင့် အကောင်းဘက် ပြောင်းဖို့ မျှော်လင့်တကြီး ရှိနေတတ်ကြပြန်တယ်။ အစစ အရာရာ အားလုံး မကောင်းရင်တောင်မှ ပို၍ကောင်းသော နှစ်သစ်ဖြစ်ဖို့တော့ မျှော်လင့်တတ်ကြတယ်။ အဲသလို မျှော်လင့်ကြရုံနဲ့ နှစ်သစ်ကြီးက အကောင်းတွေ သယ်ဆောင်လာစတမ်းသာဆို ကျမတို့ အားလုံး ထိုင်ပြီး စုပေါင်း မျှော်လင့်ပွဲကြီး လုပ်ကြပါစို့ရဲ့။

အကောင်းတွေ ဖြစ်လာဖို့ ဆိုတာက မိမိရဲ့ လုပ်ရပ် နဲ့ စိတ်ထားတတ်မှုတွေ အပေါ် မူတည်နေတာလေ။ နှစ် တနှစ်၊ လ တလ၊ ရက် တရက် အပေါ်မှာ တည်မီနေတာမှ မဟုတ်ဘဲ။  အဆိုးတွေ လုပ်နေရင်း အကောင်းတွေ ရဖို့ မျှော်လင့်နေတာ တရားပါ့မလား။ နှစ်သစ်ကြီးက ဘယ်လောက်ပဲ အေးချမ်းမှုတွေ သယ်ဆောင်လာလာ မိမိ ကိုယ်တွင်းက လောဘ၊ ဒေါသ၊ မောဟ ကိလေသာတွေနဲ့ ပြည့်နေရင်၊ ဣဿာ မေစ္ဆရိယ မိမိရှိတာ မလှူမတန်း၊ မပေးမကမ်းလိုတဲ့စိတ်၊ မလိုမုန်းထားစိတ်တွေနဲ့ အတွင်းကြိတ် လောင်မြိုက်နေရင် ဘယ်လိုလုပ် အေးချမ်းနိူင်ပါ့မလဲ။ ဒီတော့ မိမိကိုယ်တွင်းက အတွင်းလှိုက်လောင်နေတဲ့ ကိလေသာမီးတွေကိုသာ အရင်ငြိမ်းအောင် အားထုတ်ဖို့ လိုပါတယ်။ ကိုယ်တွင်းမီးတွေသာ ငြိမ်းရင် ဘယ်နှစ် ဘယ်လ ဘယ်ရက်မှာပဲ ဖြစ်ဖြစ် အေးချမ်းနေမှာ မုချပါပဲ။

စကားစပ်မိတုန်း ကျမတို့အတွက် ၂၀၁၁ ဟောစာတမ်းလေးအကြောင်း ပြောပြပါဦးမယ်။ ယုံဖို့ မယုံဖို့ ဆိုတာထက် တခါတလေ စိတ်ထွက်ပေါက် တခုအဖြစ် ကျမ မေးကြည့်လေ့ ရှိပါတယ်။ သူကတော့ ၁၀နှစ်စာ အထူး ဟောစာတမ်းလို့ ဆိုထားပါတယ်။

၂၀၁၁မှာ အိမ်ထောင်ဖက်နဲ့ မျက်နှာချင်းဆိုင်လို့ မရ ဖြစ်တတ်တယ်တဲ့။ မျက်နှာချင်းဆိုင်တာနဲ့ စကားများရကိန်း ရှိတယ်တဲ့လေ။ စကားမများရအောင် အိမ်ကလူကြီး တွေ့ရင်ပဲ ကျောချင်း ပြေးကပ်ထားရတော့မလိုလို။ ပြီးတော့ ပြောထားသေးတယ်။ လင်မယား ရန်ဖြစ်လေ စီးပွားတက်လေ ဖြစ်မဲ့နှစ်တဲ့။ ဖြစ်ရလေ....စီးပွားတက်အောင်ပဲ အိမ်ဧည့်ခန်းအလယ် လက်ဝှေ့ ကြိုးဝိုင်းဆောက်ပြီး နှစ်ယောက်သား အပီ ဖဲ့ကြရတော့မလိုလို။

ကျန်းမာရေး အညံ့ရှိတယ်။ ဝင်ငွေနဲ့ ထွက်ငွေ မမျှဖြစ်မယ်။ မိသားစုထဲက အကြီးအကဲ ကျန်းမာရေး အလွန်ညံ့မယ်တဲ့။ မှန်လိုက်တာ ဆရာရယ် ကြည့်ပြောနေသလိုပါပဲ လို့သာ ပြောလိုက်ချင်တယ်။ ဒီလောက် ယေဘူယျကျတဲ့ အဟောအပြောတွေက လူတိုင်းလိုလိုအတွက် ပစ်မလွဲ ဖြစ်နေမဲ့ ဟောကိန်းတွေ မဟုတ်လား။  ကျမ ဗေဒင်နဲ့ လက္ခဏာ ပညာရပ်တွေကို စော်ကားနေတာ မဟုတ်ပါဘူး။ လူတွေ...တချို့ ဟောပြော လုပ်စားနေကြတဲ့ လူတွေကိုသာ ပြောချင်တာပါ။ ပညာရှင် အစစ်တွေ ရှိကောင်း ရှိမှာပါ။ သို့သော် အတုနဲ့ အစစ် လွယ်လွယ် ခွဲမရတဲ့ ခေတ်ကြီးမှာ ယုံလွယ်သူတွေအပေါ် လုပ်စားနေကြသူတွေ များလွန်းလို့ သတိထားဖို့ လိုပါတယ်။ အဲသလိုမှ မဟုတ်လို့ကတော့ တန်းစီပြီး ငွေပေး အလိမ်ခံကြဖို့သာ ရှိပါတော့တယ်။

တကယ်တော့ လက္ခဏာ၊ ဗေဒင်ပညာတွေ ဆိုတာက မိမိရဲ့ ကံလမ်းကြောင်းကို စစ်ဆေးပြီး ရှေ့ တွေ့လာမဲ့ အကောင်းအဆိုးတွေကို သတိပေးနိူင်တဲ့ ပညာလို့ ကျမ နားလည်မိပါတယ်။  မိမိရဲ့ ကံလမ်းကြောင်းဆိုတာကလည်း မိမိကိုယ်တိုင် ပြုခဲ့သမျှ အကောင်းအဆိုးတွေရဲ့ အကျိုးပေးပဲ ဖြစ်တာမို့ စာရင်းချုပ်လိုက်တော့ မိမိရဲ့ စိတ်ထား နဲ့ လုပ်ရပ်သာလျှင် ပဓာနကျနေပါတယ်။ 

အားလုံးသော ကျမရဲ့ မိတ်ဆွေများ ၂၀၁၁မှာ လုပ်ရပ်ကောင်းများကို စေတနာကောင်းထား၍ လုပ်ဆောင်ကြပြီး ကောင်းသော အကျိုးပေးများ ရရှိ ခံစားနိူင်ကြပါစေ...