Thursday, July 26, 2012

သူမ၏ကောင်းကင်

တစ်  နှစ်  သုံး  လေး  ငါး  ခြောက်  ခုနှစ် ရှစ် ကိုး.....

ဟိုး ကောင်းကင်ပေါ်မှာ ကြယ်ကလေးတွေ...။ လက်လက်  လက်လက်နဲ့။ အော်...ဒီည ကြယ်ညီလာခံရှိတာပဲ...မိုးကောင်းကင်ကြီးပေါ် မော့ကြည့်လိုက်တိုင်း ကြယ်ကလေးတွေကို မြင်နေရတဲ့ ဒီနေရာလေးက်ို ကျွန်မ သိတ်ကြိုက်တာပဲ သိလား။ တခါတလေများ သက်တန်ခုံးကြီး ကိုတောင် တွေ့ရသေးတာ။ ကြယ်ကလေး နှစ်ပွင့်  ဟိုးမှာ၊ နေပါဦး သူတို့က ချစ်သူတွေများလား... ဟင့်အင်း ကြယ်မကလေးရေ မင်းချစ်သူကိုလေ မယုံနဲ့နော်၊ ကျွန်မက စေတနာနဲ့ ပြောတာ....။

တစ်ဆယ်  ဆယ့်တစ် ဆယ့်နှစ်  ဆယ့်သုံး  ဆယ့်လေး ဆယ့်ငါး....

ချစ်သူဆိုလို့...ပြောရဦးမယ်။ ကျွန်မချစ်သူကလေ သိတ်ကြည့်ကောင်းတာ။ သူ့မျက်နှာ အင်း...သူ့မျက်နှာကို ကျွန်မ ခုနေမှာ သိတ်မမှတ်မိနိူင်တော့တာ အံ့သြစရာ။ ကျွန်မ သူ့ကို တကယ်ချစ်ခဲ့တာ၊ ထင်တယ်။ တခါတလေ နုညံ့သလောက် တခါတလေတော့ သူ့မျက်နှာက မုန်တိုင်းတစ်ခုလို ကြောက်မက်ဖွယ်ရာ။ အို ကြည့်စမ်း မေ့နေလိုက်တာ၊ တကယ်ဆို ကျွန်မတို့က ချစ်သူတွေထက်ပိုခဲ့ကြတာပဲ။ ကျွန်မတို့မှာ လက်ထပ်စာချုပ်လေး ရှိခဲ့တာ။စာချုပ်...အဲ  အဲဒီစာချုပ် ဘယ်ရောက်နေပါလိမ့်။ ကျွန်မ စဉ်းစားလို့ ရရင် အဲဒီအကြောင်း ဆက်ပြောပြမယ်နော်။ချစ်သူ့မျက်နှာထက် ကျွန်မ သတိရနေမိတာက ကျွန်မမျက်နှာ၊ ကျွန်မမျက်နှာမှာ ဖူးယောင်နေတဲ့၊ ညိုမဲစွဲနေတဲ့ ဒဏ်ရာတွေ။ တစ်ညလုံး အိပ်မရအောင် အသားတွေ တဆတ်ဆတ်တုန်ပြီး ကြောက်ခဲ့ရတဲ့ ညတွေ။ အား  မေ့သွားပြန်ပြီ...။ နေပါဦး....

ဆယ့်ငါး  ဆယ့်ခြောက်  ဆယ့်ခွန်  ဆယ့်ရှစ် ဆယ့်ကိုး  နှစ်ဆယ်....

အမေက သိတ်သနားစရာကောင်းတာ။ အဖေက မိုဟာမက်အလီနဲ့ ညီအစ်ကို ဘယ်နှစ်ဝမ်းကွဲဆိုလား။ လက်သီးထိုး သိတ်တော်တယ်။ အဖေမူးလာတိုင်း အမေ့မျက်နှာက အဖေ့ရဲ့ရှေ့မှာ ဖွဲအိတ်တစ်အိတ်လို။ အဖေက အမေ့ကို ရိုက်၊ ကျွန်မက ကျွန်မလက်သေးသေးလေးနဲ့ အဖေ့ကို၊ အဲ ကျွန်မလက်လှမ်းမှီရာ အဖေ့ ခြေထောက်တွေကို နောက်ကနေ တဖတ်ဖတ်လှမ်းရိုက်။ အဖေ အမေ့ကို မရိုက်ပါနဲ့တော့နော်၊ ကျွန်မပြောလည်း အဖေက ဂရုမစိုက်ပါဘူး။ကျွန်မ ငိုတာပဲ။ အမေလည်း ငို ကျွန်မလည်း ငို၊ သားအမိနှစ်ယောက် ဖက်ပြီး ငိုခဲ့ကြ။အား....ကျွန်မ ပြန်တွေးတိုင်း ရင်တွေ လှပ်လှပ် လှပ်လှပ်နဲ့ ခေါင်းတွေမူးမူးလာတာပဲ။ အင်း မေ့ပြန်ပြီ။ ကြယ်ကလေးတွေ ဘယ်နှစ်လုံး ရှိပါလိမ့်။

တစ်  နှစ်  သုံး  လေး  ငါး  ခြောက်  ခုနှစ် ရှစ်...

ဟင့်အင်း  အမေ၊ ကျွန်မ ယောကျာ်းမယူချင်ဘူးလို့ ပြောခဲ့တာ။ အမေက သမီးရယ် အမေမရှိရင် လောကကြီးထဲ အမေ့သမီးလေး တစ်ယောက်ထဲရယ် တဲ့။အမေပေးစားတဲ့ ယောကျာ်းရပြီး သိတ်မကြာဘူး၊ သူလည်း ကျွန်မအဖေနဲ့ တူတူလာတယ်။ မိုဟာမက်အလီဆွေမျိုးတွေပဲ တဲ့၊ သူက။
အမေ... ကျွန်မ အမေ့ကို သတိရလိုက်တာ၊ အမေ သိတ်နာကျင်ခဲ့မှာပဲနော်။ ကျွန်မ ခံစား တတ်ခဲ့ပြီ။ နှုတ်ခမ်းက သွေးစတွေကို သုတ်ရင်း ကျွန်မမျက်နှာကို မှန်ထဲပြန်ကြည့်မိတယ်။ ကျွန်မမျက်နှာကို ကျွန်မ မမြင်ရဘူး။ ကျွန်မ မြင်နေရတာက အမေ့မျက်နှာ။ ဖူးယောင်နေတဲ့ အမေ့မျက်နှာ။ ပြီးတော့ ကျွန်မအဖေရဲ့ မျက်နှာ။ သွေးအိုင်ထဲက မျက်နှာ။ အမေ့ကိုရိုက်ရာက အမေက နာကျင်လွန်းလို့ လက်တုန့်ပြန်တယ် ထင်ပါရဲ့။ အမေ့လက်ထဲမှာ ရှိတာက မီးဖိုချောင်သုံး ဓါးတစ်ချောင်း။  သွေးအိုင်တွေထဲ လဲကျပြီး မဲ့ရွဲ့နေတဲ့ အဖေ့မျက်နှာ။ အား.... ကျွန်မ သိတ်ကြောက်တာပဲ။ အမေ့ကိုလည်း ကြောက်တယ်။ ဘယ်ရောက်သွားပါလ်ိမ့် ကျွန်မရဲ့ ကြယ်ကလေးတွေ...။ သူတို့တွေက ကျွန်မရဲ့ အမြဲတမ်း အဖော်။ ခေါင်းတွေ မူးလာပြန်ပြီ။ ကျွန်မ သိတ်စိတ်ညစ်တာပဲ။

ကိုး တစ်ဆယ်  ဆယ့်တစ် ဆယ့်နှစ်  ဆယ့်သုံး  ဆယ့်လေး ဆယ့်ငါး....

ခဏခဏမေ့တတ်တာပဲ။ ကျွန်မလေ ခုတစ်လော၊ စားလည်း သိတ်စားတာပဲ။ စားစရာအတွက်လား ပူစရာမလိုပါဘူး။ အချိန်တန်ရင် အဆင်သင့်။ နေစရာဆိုလည်း အိပ်ယာပေါ်ကနေ မော့ကြည့်လိုက်တာနဲ့ ကြယ်ကလေးတွေကို လှမ်းမြင်နေရတဲ့ နေရာ။ ကျွန်မခေါင်းပေါ်မှာ ကောင်းကင်မျက်နှာ အဖြူရောင်။ ဘယ်မှာ ပြာလို့လဲ ကောင်းကင်ကြီးက။ ဒီတစ်ခါ ကောင်းကင်ကြီးပေါ်က လှေကားတစ်စင်း ချခိုင်းရမယ်။ အဲဒီလှေကားနဲ့ ကျွန်မကောင်းကင်ထဲ သွားမယ်။ အဲဒီမှာ အမေ ရှိချင် ရှိမှာ။ အို  မဟုတ်ပါဘူး ကျွန်မ အမေ့ကို နောက်ဆုံးမြင်လိုက်ရတာက  ဘေးမှာ ရဲသားနှစ်ယောက် ခြံရံလို့။ သူတို့ခေါ်ဆောင်ရာနောက် ကို ပြုံးပြုံးကြီး လိုက်သွားတဲ့ အမေ။ အဲ့နောက်ပိုင်း အမေနဲ့ ကျွန်မ မတွေ့ကြရတော့ဘူး။

ဒေါက် ဒေါက်

ဟော...သူတို့ လာကြပြီ။ ကျွန်မတံခါးဖွင့်ပေးပေး မပေးပေး သူတို့ ၀င်လာကြတာပဲ။ အဲဒီလူတွေကို ကျွန်မ မုန်းတယ်။
ဘယ်လိုလဲ ဒီနေ့ နေကောင်းလား မခင်မြမေ

ကျွန်မ မုန်းလိုက်တာ။ နေကောင်းလို့ပေါ့ မတွေ့ဘူးလား။ အပိုတွေ။

ကဲ မခင်မြမေ ခဏလေး အိပ်ရာပေါ်က ထလိုက်ပါဦး၊ ဒီနေ့နေ့လည် အလှူရှင်တွေ လာမယ်။ ရေမိုးချိုးရအောင်နော်

အို မချိုးချင်ပါဘူး။ ကျွန်မစိတ်ထဲက ပြောလိုက်တာ။ ခုထိ ကျွန်မ သူတို့ကို စကားတစ်လုံးမှ ပြန်မပြောရသေးဘူး၊ ရေချိုးမလို့တဲ့။ ကျွန်မ အ၀တ်အစားတွေ လာချွတ်ယူတယ်။
ကျွန်မ ဘာမှ ပြောမနေဘူး။ အဲဒီလူမျက်နှာကို အားရှိသလောက် ကုတ်ဖဲ့ ပစ်လိုက်တယ်။

အား  နာတယ်ဟ၊ ဒီကောင်မ အတော်ဆိုးလာပြီ။ သူ့ကို တစ်ခန်းခွဲထားတာ တော်သေးတယ်

မခင်မြမေ  မခင်မြမေ  စိတ်ကိုထိန်းပါ။  စိတ်ကို ထိန်းပါနော်။  ရော့ရော့  ဒီဆေးလေး အရင်သောက်လိုက်....

တစ် နှစ် သုံး လေး ငါး ခြောက်.....

ကမ်းပေးလာတဲ့ ဆေးတွေကို ပုတ်ချ၊  ကောင်းကင်ကြီးပေါ်မော့ကြည့်ရင်း ကျွန်မရဲ့ ကြယ်ကလေးတွေကိုပဲ ဆက်ရေနေလိုက်တယ်.....


9 comments:

myape said...

အိမ်က လူကြိး ကေါ မိုဟာမက်အလီနဲ့ တူများနေလားမသိနော်

မေဇင် said...

မိုဟာမက်အလီ...စ_စ
သြော်...ကြယ်တွေ ရေ နေတာ တကယ်ရူးသွားလို့ပေါ့နော်
း)

SHWE ZIN U said...

ကြယ်တွေ ရေတတ်သူများ ဤဝတ္ထုအား မဖတ်ရ

ချစ်အမဇင်

thaingarra said...

အိမ်ထောင်ရေးက ထီထိုးရတာ နဲ့ တူသတဲ့ ... ။ လင်ဆိုးမယား ဘ၀ကနေ ရူးသွားတဲ့ အထိ ဖြစ်ရတယ် ဆိုတာတော့ အတော့်ကို ဆိုးတာပါပဲ ... ။ ကြယ်တွေကို ရေတွက်နေတတ်တာ က ၀ိသေသလက္ခဏာ တစ်ခုလို့ ထင်ရမလား ... :)

mstint said...

လောကကဓံရဲ့ရိုက်ပုတ်တဲ့ဒဏ်မခံနိုင်သူတစ်ယောက်ရဲ့လမ်းဆုံးလေး။
စိတ်ဓာတ်အစဉ်ကြည်လင်အေးမြပါစေကွယ်။

မေတ္တာဖြင့်
အန်တီတင့်

သက်ဝေ said...

ကိုယ်လည်း ကြယ်တွေ ရေတတ်တယ်... ကောင်းကင်ပေါ်က ကြယ်တွေရော... ပုလင်းလေးထဲမှာ ထည့်ထားတဲ့ စက္ကူ ကြယ်လေးတွေရော... ...း)

မိုးငွေ့........ said...

ဟင်းးး... ဖတ်ပြီး ဒဏ်ရာရသွားတယ်...။

sosegado said...

အပြင်မှာ ခင်မြမေတွေ အများသား

san htun said...

စိတ်မကောင်းဘူး..

Post a Comment

ကော်မန့်များအတွက် ကျေးဇူးတင်ပါတယ်။ ထင်မြင်ခံစားရသလိုသာ ရေးခဲ့ပါရှင်