Wednesday, January 29, 2014

ကျွန်မ၏ နှလုံးသားများအကြောင်း



ပန်းချီဆွဲခြင်းဟာ ကျွန်မရဲ့ ဝါသနာတွေထဲကတစ်ခုပါ။ တခြားဝါသနာများနည်းတူ ရံဖန်ရံခါမှာ ပြုလုပ်လေ့ ရှိပါတယ်။ ကျွန်မဝါသနာတွေကလည်း အများသား။ စာရေးစာဖတ်အပြင် ဓါတ်ပုံရိုက်၊ ဂစ်တာတီး၊ သီချင်းဆို၊ ပန်းချီဆွဲတာတွေ ဆိုပါတော့။ 

ပန်းချီတွေကို ဘယ်အချိန်မှာဆွဲလေ့ရှိသလဲ သတိထားကြည့်လိုက်တဲ့အခါ.....၊ ကျွန်မစိတ်တွေ တိမ်လို လွင့်ပျံလို့ တစ်စစီဖြစ်နေချိန်မျိုးမှာ  ပန်းချီဆွဲခြင်းနဲ့ စိတ်တွေကို ကျောက်ချလေ့ရှိတယ်လို့ သိလိုက်ရပါတယ်။ ဆွဲနေတဲ့တစ်ချိန်လုံးလည်း စိတ်က ကားထဲမှာ၊ အရောင်တွေထဲမှာ နစ်ကျွံလို့၊ ကားလေးတစ်ကားဆွဲပြီးလို့ စိတ်တိုင်းကျတဲ့အခါတိုင်းမှာလည်း ရလာတဲ့ခံစားချက်က ဘာနဲ့မှ မတူပါဘူး။

ကျွန်မဆွဲဖြစ်တဲ့ပုံတွေဟာ အင်တာနက်ကနေ ဒီမိုလေးတွေကြည့်ရင်း လိုက်ဆွဲထားတာဖြစ်သလို ပုံတစ်ချို့ကတော့ ကျွန်မစိတ်ကူးနဲ့ ဆွဲဖြစ်တာပါ။ တစ်ချို့ကိုတော့ ဓါတ်ပုံကနေ ပန်းချီအဖြစ် ကူးရေးထားတာဖြစ်ပါတယ်။ 

ဝါသနာအရဆွဲထားတဲ့ ကျွန်မပန်းချီလေးတွေ တချို့ကို ဘလော့ဂ်စာမျက်နှာပေါ်ကနေ မျှဝေလိုက်ပါတယ်။ ကျွန်မ ဘယ်လိုပုံတွေ ဆွဲဖြစ်သလဲ၊  ကြည့်ကြရအောင် နော်....။

ဒေစီအစိမ်းရောင်လေးပါ။ ဒီပုံလေးကို  ArtRage ဆိုတဲ့ Drawing application နဲ့ ကွန်ပြူတာထဲမှာ မောက်စ်ကိုသုံးပြီးဆွဲဖြစ်ခဲ့တာပါ။ မှတ်မှတ်ရရ သားတွန်လို့ ကျွန်မခေါ်တဲ့ သားငယ်ခရေတွန်အတွက် ဆွဲပေးဖြစ်ခဲ့တဲ့ပုံပါ။


ဒီပုံလေးကိုတော့ အိုင်ဖုန်းထဲမှာ ဆွဲခဲ့တာဖြစ်ပြီး "သတို့သမီး"လို့ အမည်ပေးထားပါတယ်။ ကျွန်မရေးခဲ့တဲ့ ကဗျာတစ်ပုဒ်အတွက် သရုပ်ဖော်ပုံအဖြစ် ဆွဲဖြစ်ခဲ့တာပါ။


ဒီပုံလေးကိုတော့ "အတူတကွ"လို့ အမည်ပေးထားပါတယ်။ အိုင်ဖုန်းထဲမှာ ရေးခြစ်ထားတာ ဖြစ်ပါတယ်။


"Clinching emptiness-ဗလာသို့ ဆုတ်ကိုင်ခြင်း"လို့ အမည်ပေးထားတဲ့ ဒီကားလေးရဲ့အရွယ်အစားက 
၇ x ၁၁ လက်မပါ။ Watercolour on paper ဖြစ်ပြီး ဒီကားလေးက ဘလော့ဂ်ဂါ ညီမငယ်မြတ်ပန်းနွယ် အတွက် အမှတ်တရ ပေးထားပြီးဖြစ်ပါတယ်  :)


"သစ်တောညနေ"လို့ နာမည်ပေးထားတဲ့ ဒီကားက ၁၅ x ၁၁ လက်မပါ။ ညနေဆိုတဲ့အတိုင်း အရောင်တွေကို မှုန်မှုန်မှိုင်းမှိုင်းတွေနဲ့ ရေးဖြစ်ပါတယ်။ ကျွန်မစိတ်တွေလည်းပဲ လေးလံမှုန်မှိုင်းနေခဲ့ချိန် ထင်ပါရဲ့။ Watercolour on paper ပါ။


ဒီကားလေးကို "မာနမဲ့သော"လို့ နာမည်ပေးလိုက်ချင်ပါတယ်။ အဆင်းအရောင်လှသလောက် ရနံ့မဲ့ရှာတဲ့ ဒီပန်းကလေးရဲ့ ပင်ကိုယ်အမည်ကတော့ ခေါင်ရမ်းပန်းပေါ့ရှင်။ အင်တာနက်ထဲက ဒီမိုကတစ်ဆင့် လိုက်ဆွဲခဲ့တဲ့ကားပါ။ ကျွန်မ စိတ်တော်တော်လေး ရှည်ရှည်ထားပြီး ဆွဲခဲ့ရတဲ့ ပန်းကလေး လည်း ဖြစ်ပါတယ်။ အရွယ်အစားက ၁၁ x ၇.၅ လက်မ ရှိပါတယ်။ Watercolour on paper ပါပဲ။


ကျွန်မတို့ မြန်မာတွေ အမြတ်တနိူးထားတဲ့ နေရာလေးတစ်ခုပါ။ "ချစ်သော ပုဂံ"လို့ အမည်ပေးထားပါ တယ်။ ၁၁ x  ၉ လက်မ၊ Watercolour on Paper ဖြစ်ပါတယ်။ ဒီပုံလေးကိုတော့ ပုဂံရဲ့ အရုဏ်ကို ရိုက်ဖြစ်ခဲ့တဲ့ ကျွန်မရဲ့ ဓါတ်ပုံတစ်ပုံကနေ ကူးယူရေးဆွဲထားခြင်း ဖြစ်ပါတယ်။



ကိုယ်ဖန်တီးလိုက်တဲ့ အနုပညာတိုင်းဟာ ကိုယ့်နှလုံးသားတွေပါပဲလို့ဆိုကြရင် ခု ကျွန်မက မိတ်တွေရှေ့မှာ ကျွန်မရဲ့နှလုံးသားတွေကို အစီအရီချပြလိုက်ခြင်းပဲပေါ့.....။  နောင်လည်း ပုံတွေဆွဲဖြစ်လို့ စိတ်ထဲ သဘောကျမိတဲ့အခါ ခုလိုပဲ ဘလော့ဂ်ပေါ် တင်လိုက်ပါဦးမယ်။ 

အားလုံးပဲ အရောင်တွေနဲ့ နှစ်ခြိုက်စွာ ချစ်ကျွမ်းဝင်နိူင်ကြပါစေရှင်....:)



Friday, January 24, 2014

ထွေရာလေးပါး-၇

ထွေရာ-၁)  လှေနံနှစ်ဘက်နင်းခြင်း

အဲဒီစကားလုံးဟာ လူတိုင်းကြားဖူးနေကျဖြစ်မယ်လို့ ကျွန်မ ထင်ပါတယ်။ ကြားမိတိုင်းလည်း လှေ နံနှစ်ဘက်နင်းတယ်ဆိုတာ နှစ်ဘက်ခွရပ်တည်နေသူ၊ မပြတ်သားသူ၊ ဆုံးဖြတ်ချက်မရဲသူဆိုပြီး ဗီလိန်အဖြစ် ဆိုးတဲ့ဘက်ကနေ ပုံဖော်တတ်ကြတာများတယ်။ တကယ်ဆို သူ့မူရင်းအဓိပ္ပါယ်က မျှခြေရှာသူ၊ ရပ်တည်ဖို့ ကြိုးစားသူ၊ နှစ်ဘက်မျှတွေးတတ်သူလို့ နောက်တစ်နည်း အနက်ဖွင့် ရမှာပါ။ မြစ်ကူးချောင်းဖျားနဲ့ ရင်းနှီးသူများဆို ကျွန်မပြောချင်တာကို ကောင်းကောင်းကြီးမြင်သာပါလိမ့် မယ်။ လှေပေါ် တက်တဲ့အခါ လှေနံတစ်ဘက်ထဲ နင်းလို့မှ မဖြစ်တာဘဲကိုး၊ ဘေးဘယ်ညာ လှေဝမ်း ဘိုက်နှစ်ဘက်ကို ခြေထောက်ကားရားခွပြီး ကန်ထားရတယ်။ ဒါမှ မလူးဘဲ လှေငြိမ်နိူင်ပေမယ်။

ဒီတော့ အနက်က နှစ်ခုကွဲထွက်သွားတယ်။ လူမှုဆက်ဆံရေးတွေမှာ နှစ်ဦးနှစ်ဘက်အပေါ်၊ အခြေအနေအရပ်ရပ်အပေါ် မျှမျှတတနားလည်ပေးနိူင်တဲ့သူ၊ ရည်းစားနှစ်ယောက်အပေါ် မျှမျှတတ ချစ်နိူင်သူ (တစ်ယောက်ကို သုံးဆယ်သား အချိုချကျွေးရင် နောက်တစ်ယောက်ကိုလည်း သုံးဆယ်သား အချိုချကျွေးတတ်သူများကို ဆိုလိုပါတယ်) ဒီလိုဖြစ်သွားတယ်။

ဆိုတော့ကာ လှေနံနှစ်ဘက်နင်းတာ ကောင်းသလား ဆိုးသလားမေးလာရင် အခြေအနေပေါ်မူတည်ပြီး ကြည့်ဆုံးဖြတ်လို့သာ ပြောရတော့မှာပါပဲ။

ထွေရာ-၂) ပီလေးလုံးနဲ့ အက်ဖ်လေးလုံး

အပေါင်းအသင်း သိပ်မင်တာပဲ၊ အစားထက်တောင် မက်သေးတယ်လို့ တစ်ချို့လူတွေကို ပြောတတ်ကြ တယ်။  အင်္ဂလိပ်စကားလုံး နှစ်ခု ရှိပါတယ်။ ပီလေးလုံးနဲ့ အက်ဖ်လေးလုံးပါ။

ပီလေးလုံးက Productivity, Pay, Performance နဲ့ Profit ဖြစ်ပြီး အက်ဖ်လေးလုံးကတော့ Families, Friends,  Festivals နဲ့ Fun တို့ပဲ ဖြစ်ပါတယ်။ ပီလေးလုံးက မြန်မာလို ထုတ်လုပ်နိူင်စွမ်း၊ လစာ၊ အလုပ် လုပ်ရည်ကိုင်ရည်နဲ့ အမြတ်အစွန်း၊ အက်ဖ်လေးလုံးကတော့ မိသားစု၊ မိတ်ဆွေသူငယ်ချင်း၊ ပွဲလမ်းသဘင်နဲ့ အပျော်အပါးတို့ပါပဲ။

ဒါကို သူ့ကိုယ်သူ ကိုရင်တာလို့ ရေးတတ်ပြောတတ်တဲ့ ဆရာကိုတာက “ပီလေးလုံးကို လူတွေ ကြည့်ကြမြဲဖြစ်သော်လည်း အက်ဖ်လေးလုံးဟာဖြင့် ပိုပြီး လူနှင့် မတူဘူးလား”လို့ ဆိုထားပါတယ်။ ဟုတ်တယ်၊ ကျွန်မလည်း အက်ဖ်လေးလုံးကမှ လူသားပိုဆန်တယ်လို့ လက်ခံမိပါတယ်။

“လူတွေဟာ တိုးတက်ကြီးပွားလွန်းချင်စိတ်တွေကြောင့် ပီလေးလုံးနောက် အလိုက်လွန်ပြီး အက်ဖ်လေးလုံးအတွက် အချိန်ပေးဖို့ မေ့ထားတတ်ကြတယ်။ ဒါမှ မဟုတ် အက်ဖ်လေးလုံးအတွက် ခပ်ပေါ့ပေါ့ပဲ တွေးတတ်ကြတယ်။ သူငယ်ချင်းတွေ၊ ဆွေမျိုးတွေ မရှိဘူး၊ မကြည့်ဘူး၊ အလုပ်မှ အလုပ်၊ အလုပ်ကိုပဲ ကြည့်ရမယ်ဆိုပြီး ပြင်းပြင်းထန်ထန်ပြောဆိုသူများကို ကျွန်တော့်အနေနှင့်တော့ မိတ်ဆွေ မလုပ်လိုပါ” လို့ ဆရာကိုတာက ပြောပါတယ်။ 

ကျွန်မကတော့ ပီလေးလုံးနဲ့ အက်ဖ်လေးလုံးအကြား မျှမျှတတလေးဖြစ်ဖို့သာ လိုလားသူပါ။ အထက်က ကျွန်မပြောခဲ့တဲ့ဥပမာနဲ့ပြောရရင် လှေနံနှစ်ဘက်နင်းလိုသူကြီးကျွန်မသာဖြစ်တယ်လို့ ပြောရပေမပေါ့ရှင်။

စကားမစပ် ကျွန်မ ဆရာကိုတာကို သိပ်ချစ်တာပဲ၊ အပြင်မှာတော့ မသိပါဘူး၊ ပုံတွေထဲမှာတော့ ဆရာဟာ ပြုံးပြုံးကြီးပါ၊ သူ့ကို ပါဂျဲရိုး (ဟိုးအရင်ခေတ်ကတည်းကစီးတဲ့ ပါဂျဲရိုး) စီးတဲ့ စာရေးဆရာလို့ တချို့က ငေါ့သော်လည်းပဲ သူကတော့ သူ့ပုံစံအတိုင်း ပြုံးပြုံးကြီးသာ တုန့်ပြန်ပါတယ်။

ထွေရာ-၃) အချစ်ဆိုတာ

မရိုးနိူင်တဲ့အကြောင်းအရာတစ်ခုဟာ အချစ်ပဲပေါ့။ 

လူတွေဟာ အချစ်ကို သန်ရာသန်ရာဖွင့်ဆိုတတ်ကြပြန်တယ်။ အချစ်ဆိုတာ ပေးဆပ်ခြင်းတဲ့၊ အချစ်ဆိုတာ ရယူလိုခြင်းတဲ့၊ အချစ်ဆိုတာ သူသာပျော်မယ်ဆို ကိုယ်လည်းပဲ ပျော်နေနိူင်တဲ့အရာတဲ့ (ဒါကိုတော့ ကျွန်မက တယ်သဘောမတွေ့လှဘူး)။ ဟင့်အင်း၊ ကျွန်မအမြင်မတော့ ဒါဟာ အချစ် မဟုတ်တော့ဘူး၊ မေတ္တာဖြစ်သွားပြီ။ အချစ်ထက်ပိုလွန်သောလို့သာ သတ်မှတ်လိုက်ချင်တယ်။

စာရေးဆရာဆိုတဲ့သူတွေ၊ ကဗျာဆရာဆိုတဲ့သူတွေ အဆိုးဆုံးပေါ့။ အချစ်ဆိုတာကို ကလောင်လေးတစ်လက်နဲ့ သွက်သွက်လက်လက်ကြီး ရေးပြောဖွင့်ဆိုတတ်ကြတာ သူတို့ပဲပေါ့။ ဒါကလည်း ကျွန်မပြောခဲ့သလို တစ်ဦးတစ်ယောက်ချင်းစီနဲ့သာ ဆိုင်ပါတယ်။ အပေးမှာ ယုံကြည်သူက အချစ်အတွက် ဘာမဆို ပုံပေးချင်သူ ဖြစ်နေဦးမှာပဲ၊ သူ့အတွက်တော့ အချစ်ဆိုသည်မှာ ပေးဆပ်ခြင်းပေ တကားလို့ ယုံကြည်နေဦးမှာ ဖြစ်သလို၊ အယူအပေါ်မှာ အားသန်သူကလည်း အချစ်ဆိုတာ ရယူ ပိုင်ဆိုင်ခြင်းဖြစ်တော့သကိုးလို့ ပြောနေဦးမှာ၊ အချစ်အတွက် စစ်ပဲဖြစ်ရဖြစ်ရလို့  လက်သီးလက်မောင်း တန်းချင်တန်းနေဦးမှာ။

ချက်ကော့ဗ်ကို ဘဝဆိုတာ ဘာပါလိမ့်လို့မေးတဲ့အခါ သူက "မုန်လာဥဆိုတာ ဘာလဲလို့ မေးသလိုဖြစ် မနေဘူးလားဗျာ၊  မုန်လာဥဟာ မုန်လာဥပဲပေါ့ဗျ" လို့ ပြန်ဖြေသတဲ့။ 

ဒီတော့ အချစ်ဆိုတာ ဘာလဲလို့ ကျွန်မကို မေးလာရင် အချစ်ဆိုတာ အချစ်ပဲပေါ့ လို့သာ ပြန်ဖြေလိုက်ပါ့မယ်။ ထားလိုက်ပါ၊ ရှင်တို့ အချစ်ကို တံဆိပ်ကပ်ဖို့ လုပ်နေတာတွေ ရပ်တန်းကသာ ရပ်ကြစမ်းပါလို့ ထပ်ပြောလိုက်ဦးမယ်။

ထွေရာ-၄) ဘာမှ ဟုတ်ခြင်း၊ မဟုတ်ခြင်း

"လူတွေဟာ တချို့အခြေအနေတွေမှာ ငါဟာ ဘာမျှမဟုတ်ဘူးပေါ့ဗျာ၊ သို့သော် ငါဟာ ဘာမျှမဟုတ်တာဟာ မကောင်းဘူး၊ ငါဟာ တစ်စုံတစ်ရာဖြစ်ရင် ကောင်းမယ်"လို့  ဆရာကိုတာက သူ့စာအုပ်ထဲမှာ ရေးဖူးပါတယ်။

ကျွန်မတို့လည်း တွေ့နေမြင်နေတတ်ကြပါတယ်။ ဘယ်လောက်ကြီးပဲ ကိုယ်ဟာ သာမန်ပါ လို့ ပြောနေသူတွေပဲ ဖြစ်ပါစေဦး၊ အနည်းဆုံးတော့ ကိုယ်ဟာ သာမန်မျှ မဟုတ်၊ တစ်ခုခုတော့ တစ်ခုခုပဲ ဆိုတာမျိုး သက်သေပြတတ်ချင်နေသေးတာပါပဲ။ အဲဒီအတွက် ကြိတ်ပြီး ချိုသွေးနေတတ်ကြတာပါပဲ။ အချိန်စောင့်နေသူများလို့ ပြောရင် ရနိူင်မှာပါ။ (အချိန်ကို အိပ်ပြီးစောင့်နေသူများတော့ ဒီအထဲ မပါဘူးပေါ့ရှင်၊ ချုံထဲကနေ ချိုသွေးသပ တမြမြများကိုသာ ဆိုလိုတာပါ)

ဒီမှာ ကျွန်မ သတိရမိတာလေးတစ်ခု ပြောချင်သေးတယ်။ ခုနက အပေါ်မှာ ရေးခဲ့သလို လူဟာ ကိုယ့်ကိုယ်ကို ဘာမျှမဟုတ်လို့ နှိမ့်ချနေရင်းကပဲ တစ်စုံတစ်ယောက်ဖြစ်လိုစိတ်ဟာ သူ့အတွင်းစိတ်မှာ ခိုနေတတ်ပါတယ်။ 

အစိုးရအထက်တန်းကျောင်းတွေမှာ အဖြူအစိမ်းဝတ်စုံဝတ်ကြရတယ်။ အဲဒီမှာ တန်းတူရည်တူ အရောင်အသွေးတူဝတ်ဆင်မှုဟာ တစ်စိတ်တစ်ဝမ်းထဲ ဖြစ်စေလိုမှုအတွက် တန်းညှိလိုက်တာပဲ မဟုတ်လား။ ဆင်းရဲချမ်းသာမှုတွေကိုပါ တစ်ခါထဲ ညီညွတ်စေလိုက်ခြင်းပဲပေါ့။ အဲဒီအဖြူအစိမ်းကိုမှ သရီးရိုင်ဖယ်၊ ရှန်မွိုင်း၊ ဖဲသားပိုးသား ဒီလိုကောင်းအောင် ဝတ်ဆင်ခြင်းမျိုးဟာ သူများထက်သာလိုစိတ်၊ တစ်စုံတစ်ယောက်ဖြစ်လိုစိတ်ရဲ့ အခြေခံပါပဲ။ 

ကျွန်မ ယုံကြည်တာနောက်တစ်ခု ရှိပါသေးတယ်။ အဲဒါက လူတွေဟာ လူ့အခွင့်အရေးနဲ့ ပတ်သက်ရင်သာ တန်းတူရည်တူ ခံစားခွင့်၊ လုပ်ပိုင်ခွင့်၊ ပြောရေးဆိုခွင့်တွေ ရှိရမယ်။ လူတိုင်းလူတိုင်း သာတူညီမျှအကျိုးခံစားခွင့် ရှိရမယ်ဆိုတာကိုတော့ ကျွန်မ လုံးဝလက်မခံနိူင်ပါဘူး။ လူတိုင်းလူတိုင်း သာတူညီမျှအကျိုးခံစားခွင့်ရှိရမယ်ဆိုရင်တော့ ဒါဟာ လူပျင်းတွေအတွက် သိပ်ကောင်းတဲ့ခံစားခွင့်ဖြစ် သွားပြီ။ 

န ဘိက္ခဝေ ဟိနေန
အဂ္ဂဿ ပတိ ဟောတိ

အဂ္ဂေန စ ခေါ ဘိက္ခဝေ
အဂ္ဂဿ ပတ္တိ ဟောတိ။

"ရဟန်းတို့ အညံ့စားလုံ့လဝီရိယဖြင့် အမြတ်စားအထွတ်အထိပ်သို့ ရောက်ရိုးထုံးစံ မရှိချေ။
ရဟန်းတို့ အမြတ်စားလုံ့လဝီရိယဖြင့်သာ အမြတ်စားအထွတ်အထိပ်သို့ ရောက်ရိုးထုံးစံရှိချေသည်" လို့ ကျွန်မတို့ မြတ်စွာဘုရားရှင်က ဆုံးမဟောပြောတော်မူခဲ့ပါတယ်။

အကျိုးခံစားခွင့်ဆိုတာ မိမိကိုယ်တိုင်ရဲ့ ကြိုးစားအားထုတ်မှုအပေါ်မှာသာ တည်သင့်တဲ့အရာပါ။ ဒီတော့ အဲဒီအားစိုက်ထုတ်မှုအပေါ်မူတည်ပြီး အကျိုးခံစားခွင့် အနည်းအများကွဲသွားမယ်၊ ဘာမျှမဟုတ်သူနဲ့ တစ်စုံတစ်ယောက်နဲ့ ကွာခြားသွားမယ်။  ဒါဟာ သဘာဝကျကျ ဖြစ်သင့်တဲ့ကိစ္စပါပဲ။

အထက်ကစကားကို ပြန်ကောက်မယ်ဆိုရင် တစ်စုံတစ်ယောက်ဖြစ်ချင်စိတ်ရှိသူဟာ တစ်စုံတစ်ယောက် တူတူတန်တန်ဖြစ်ဖို့ အားစိုက်ထုတ်လိုသူဖြစ်ရပါမယ်။ သာမန်တွေလို အိပ်အိပ်စားစား ပုံမှန်နေနေရင်တော့ ဘာမျှမဟုတ်တဲ့သာမန်သာ ဖြစ်ပါလိမ့်မယ်ဆိုတာပါပဲ။ 


** မြတ်စွာဘုရားဆုံးမတော်မူခဲ့တဲ့ ပါဠိအပိုဒ်ကလေး ဖြည့်စွက်ပေးသော  ကိုဇက်အား ကျေးဇူးတင်ပါ သည်ရှင့်  :)



Friday, January 17, 2014

ကိုယ်ချင်းစာနာတတ်ကြပါစေ

ကျွန်မတို့ဗုဒ္ဓဘာသာဝင်များဟာ ကမောက်ကမလုပ်တဲ့နေရာမှာ အတော်လေး ထူးချွန်ပါတယ်။ ပြောတော့ ဘုရားကိုးကွယ်လိုက်တာ သူတို့အပြင်မရှိဘူး။ လုပ်တော့သာ တလွဲ။

ဆောင်းတွင်းကြီး ချမ်းချမ်းစီးစီးမနက်မှာ ကိုယ်တိုင်ကတော့ အနွေးထည်ကြီး ဝတ်လို့၊ မာဖလာကြီး ပတ်လို့၊ ဂြိုလ်ပြေနံပြေ အေးရာအေးကြောင်းဖြစ်ပါစေတော့ဆိုပြီး ဂြိုလ်တိုင်တွေမှာရှိတဲ့ ဘုရားဆင်းတုတော်တွေ ကို ခေါင်းပေါ်ကနေ ရေတွေ တစ်ခွက်ပြီး တစ်ခွက်လောင်းချလို့။ ရေသပ္ပါယ်သတဲ့။ လုပ်ပုံကလေ…။ ငါတော့ဖြင့် နွေးနွေးထွေးထွေးနေမယ်၊ ဘုရားတော့ အအေးပတ်ချင်ပတ်ပါစေ ဆိုတာမျိုး….။

ဒီနေရာမှာ ဗုဒ္ဓဘာသာဝင်တွေ သိသင့်တာက မြတ်စွာဘုရားကို သက်တော်ထင်ရှားမြတ်စွာဘုရားလို့ စိတ်ထဲက မှတ်ယူပူဇော်ရမယ်ဆိုတဲ့ အချက်ပါ။ တစ်ခုမေးချင်တယ်။ ကျွန်မတို့ ရှိခိုးနေကြတာဟာ မြတ်စွာဘုရားရုပ်တုကြီးသက်သက်ကိုပဲ ရှိခိုးနေကြတာလား။ မြတ်စွာဘုရားရဲ့ ဂုဏ်တော်တွေကို စိတ်ညွှတ်လို့ တကယ့်သက်တော်ထင်ရှားမြတ်ဘုရားရယ်လို့ စိတ်မှာမှတ်ပြီး ပူဇော်ကန်တော့နေကြတာလား။ ကွယ်လွန်သွားခဲ့ပြီးသော မိဘများဓါတ်ပုံကို ကျွန်မတို့ ရှိခိုးကြသလိုပါပဲ။ ဓါတ်ပုံမှန်ဘောင်ကြီးကို ရှိခိုးနေတာ မဟုတ်ဘဲ မိဘတွေရဲ့ကျေးဇူးကို ရည်မှတ်လို့ သက်ရှိထင်ရှားမိဘများသဖွယ် စိတ်က ရည်မှန်းပြီး ရှိခိုးကြတယ် မဟုတ်လားရှင့်။ အဲသလိုပါပဲ။

နောက်တစ်ခုက သစ်သီးဆွမ်းကပ်တဲ့အခါမှာပါ။ သစ်သီးတွေကို မခွဲမစိပ်ဘဲ အလုံးလိုက် မကပ်သင့်ပါဘူး။ သစ်သီးဆွမ်းကပ်လှူခြင်းဆိုတဲ့ ကုသိုလ်တော့ ဖြစ်ပါတယ်။ ဒါပေမဲ့ အဂါရဝလည်းဖြစ်ပါတယ်။ စဉ်းစားကြည့်လေ ကိုယ့်မိဘတွေကိုရော သစ်သီးတစ်လုံး လက်ထဲထည့်ပေးပြီး ရော့ စား ရယ်လို့ ကျွေးခဲ့ဖူးသလား။ သေချာ အခွံနွှာ ခွဲစိပ်၊ ပြီးမှ ပန်းကန်ထဲထည့်၊ ခရင်းလေးဘာလေး တပ်ပြီး ရိုရိုသေသေကျွေးခဲ့ကြတာ မဟုတ်လား။

အဲဒါနဲ့ပတ်သက်လို့ တစ်ခါက ကျွန်မအိမ်မှာ နေသွားတဲ့ သမီးတစ်ယောက်အကြောင်းပြောဦးမယ်။ သူကလေးက ဘုရားကို ပက်ပ်စီ ကပ်ပါတယ်။ ဖန်ခွက်ထဲကို ရေခဲထည့် ပက်ပ်စီထည့်ပြီးတဲ့အခါ ဖန်ခွက်မှာ ပိုက်ကလေးတစ်ချောင်း တပ်လိုက်ပါတယ်။ သူသောက်တဲ့အခါဆိုလည်း ပိုက်ကလေးနဲ့ သောက်တတ်တာ ကိုးရှင့်။ ကျွန်မဖြင့် သူလုပ်ပုံကိုကြည့်ရင်း သဘောတွေ ကျမိတယ်။ အဲဒါ ကျွန်မပြောချင်တဲ့ ကိုယ်ချင်းစာတရားပါပဲ။

နောက်တစ်ခုကတော့ ဘုရားကို သစ်သီးဆွမ်းတော်ကပ်တဲ့အခါ စိမ်းပေ့ဆိုတာတွေ ရွေးကပ်လေ့ရှိကြ တာပါပဲ။ ငှက်ပျောသီးတစ်ဖီးကပ်တယ်ဆိုပါတော့။ သီးမွှေးအစိမ်းတစ်ဖီးကို မြတ်စွာဘုရားရှေ့သွားပြီး တပည့်တော် သစ်သီးဆွမ်းကပ်ပါတယ်ဘုရား ဘာညာပေါ့၊ ဆုတွေဘာတွေ တရှည်တလျားတောင်းလို့။ နောက် ငှက်ပျောသီးမှည့်တော့မှ အသာလေးစွန့်ပြီး စားမယ်။ 

ဘာနဲ့တူသလဲဆိုတော့ကာ မြတ်စွာဘုရား ဒီငှက်ပျောသီးကိုတော့ ဘုရားရှေ့ ခဏလောက်အုပ်ထားပါရစေ၊ မှည့်တော့မှ တပည့်တော် စွန့်စားပါ့မယ်ဘုရားဆိုတာနဲ့ သွားတူမနေဘူးလား၊ လုပ်ပုံက  အဲသလို။

သောက်တော်ရေ ကပ်တဲ့အခါမှာလည်း ဒီလိုပါပဲ။ ရေကို ခွက်နဲ့အပြည့်အလျှံကပ်တာမျိုးကို ရှောင်ရပါမယ်။ ကျွန်မတို့ ရေသောက်ချင်တဲ့အခါ ရေခွက်ထဲမှာ ရေအပြည့်ထည့်ထားရင် လက်လှမ်းလိုက်တာနဲ့ ရေတွေ ဖိတ်စင်ကျတတ်ရဲ့ မဟုတ်လား။ အဲသလိုပါပဲ မြတ်စွာဘုရားကို ရေတော်ကပ်တဲ့အခါမှာ ရေကို ဖန်ခွက်နှုတ်ခမ်းမရောက်ခင် လက်တစ်လုံးအလိုလောက် မှန်းထည့်ပြီး ကပ်ရပါမယ်။

ဆွမ်းတော်ကပ်တာကိုတော့ ပြောရရင် အတတ်နိူင်ဆုံး သက်ရှိထင်ရှားဘုရားကို အိမ်ပင့်ဆွမ်းကပ် သလို ဖြစ်အောင် ကပ်နိူင်ရင် အကောင်းဆုံးပါပဲ။ ဆွမ်းထမင်းဖြူပေါ် ထန်းလျက်ခဲလေး၊ ပေါက်ပေါက် ဆုပ်လေးဖြူးကပ်တာက ကုသိုလ်တော့ရပါရဲ့။ ဒါပေမဲ့ ကိုယ်တိုင်တောင်မှ နေ့တိုင်း ကြက်ဥပြုတ်နဲ့ချည်း စားနိူင်ကြလို့လား။ ကျွန်မကြားဖူးတာ တစ်ခုရှိတယ်။ မြို့တစ်မြို့မှာ အမျိုးသမီးကြီးတစ်ယောက်ဟာ ဘုရားဆွမ်းကပ်တဲ့အခါ ထမင်းဝိုင်းပြင်ပြီး ပန်းကန်ခွက်ယောက်တွေကအစ လူတစ်ယောက် စားသလိုပြင်ဆင်ပြီး ကပ်လေ့ရှိသတဲ့။ လက်ဆေးရေတို့ လက်သုတ်ပုဝါတို့ကအစ သေချာပြင်ဆင်ပြီး ကပ်တာ။ အားလုံးပြင်ဆင်ပြီးလို့ ဘုရားကို ပင့်ပြီး ဆွမ်းကပ်တဲ့အခါ ဘေးကနေ ယပ်လေးခပ်ပေးလို့ တဲ့ရှင်။  ကျွန်မဖြင့် ကြားရတာနဲ့တင် ကြက်သီးထလောက်အောင် ပီတိဖြစ်မိပါရဲ့။

ကျွန်မ နားလည်ပါတယ်။ ကျွန်မတို့တွေအားလုံး စားဝတ်နေအတွက် ရုန်းကန်ရှာဖွေနေကြရတာမို့ အဲဒီလို သေချာပြင်ဆင်ပြီး ဆွမ်းကပ်ချင်မှ ကပ်နိူင်မှာပါ။ ဒါပေမဲ့ အလုပ်ပိတ်ရက်တွေမှာ တခါလောက် အဲဒီလို ကပ်ကြည့်စေချင်ပါတယ်။ သီလရှင်လူထွက်ပြီးကာစ အလုပ်မဝင်သေးခင်အချိန်တွေမှာ ကျွန်မ အဲသလို ဆွမ်းကပ်ဖူးပါတယ်။  ရလာတဲ့ ပီတိက ဘာနဲ့မှ မတူပါဘူး။ ကြက်သီးတဖြန်းဖြန်းထအောင်ကို ခံစားရတာပါ။

အမွှေးတိုင်ပူဇော်သူများလည်း အတူတူပါပဲ။ ဖြစ်နိူင်ရင် အမွှေးရနံ့လေးရရုံလောက် ပူဇော်တာပဲ ကောင်းပါ တယ်။ ဘုရားချောင်းဆိုးရင်ကြပ်ဖြစ်လောက်အောင်တော့ မကောင်းပေဘူးပေါ့။

အချုပ်ပြောရရင် မြတ်စွာဘုရားကို သက်တော်ထင်ရှားဘုရားလို့ စိတ်ဝယ်မှတ်ပြီး ဘာလှူလှူ ဘာကပ်ကပ် ကိုယ်နဲ့ ကိုယ်ချင်းစာပြီး တွေးဆပူဇော်နိူင်ကြဖို့ပါပဲ။ ကိုယ်ချင်းစာတရားဆိုတာက လူလူချင်းဖြစ်စေ၊ သတ္တဝါတွေအပေါ်မှာ ဖြစ်စေ၊ သစ်ပင်ပန်းမာန်တွေအပေါ်မှာပဲ ဖြစ်စေ ထားနိုင်အောင်၊ ထားတတ်အောင် ကြိုးစားတာ အကောင်းဆုံးပါပဲ။ ဒီလိုပြုမူကျင့်ကြံနိူင်ဖို့ အလေ့အကျင့်လေးလုပ်ပေးကြည့်ပါ။ ကိုယ်တိုင် စိတ်နှလုံးနုညံ့သူ ဖြစ်လာပါလိမ့်မယ်။

မြင်နေတွေ့နေရတာတွေက အချိုးမကျလွန်းလို့ ပြောမိပါတယ်။ စေတနာအလျှောက် ကပ်လှူတာဖြစ်ပေမဲ့ တကယ်ရသင့်တဲ့ တင်းပြည့်ကျပ်ပြည့်ကုသိုလ်လေးရစေချင်လို့ပါ။ တစ်ကျပ်တန်လက်မှတ်ဝယ်ထားပြီးမှ ငါးမူးခရီးလောက်အရောက်မှာ လမ်းဆင်းလျှောက်ရမှာမျိုးကဖြင့် မတန်ဘူး မဟုတ်လားရှင်။

ကိုင်း တရားပွဲလည်း ပြီးပြီ။ အိမ်ပြန်ကြပါစို့။ သာဓု  သာဓု  သာဓု…..:)


မှတ်ချက်။   ။ စာထဲမှတစ်ချို့ကို ဆရာတော်ဥူးဥက္ကဌ (မြစိမ်းတောင်တောရ) ၏ ဟောတရားများ နာယူခဲ့စဉ်က မှတ်သားခဲ့သည်များကို ပြန်လည်ဝေမျှခြင်းပါ။



Sunday, January 12, 2014

ဆွေရယ်မျိုးရယ် အိမ်ရယ်ယာရယ်



မြို့ကလေးထဲ ကားဝင်လာတော့ မနက်လင်းအားကြီး လေးနာရီခွဲခန့်သာ ရှိသေးသည်။

ညကားမို့ ကားပေါ်မှာမအိပ်တတ်သော ကျွန်မက တစ်ညလုံး လမ်းဘေးဝဲယာမှ မှောင်နှင့်မည်းမည်းများကို မျက်လုံးအကြောင်သားကြည့်ကာ ငုတ်တုတ်လိုက်ခဲ့ရသည်။ တကယ်ကိုအိပ်ချင်လှပါပြီ၊ လူက လုံးလုံးမျှ ဇက်မခိုင်တော့ချိန်၊ ခဏကလေးမှေးကနဲ မှေးမိချိန်ကျကာမှ ရောက်ပြီဆင်းကြရအောင်ဟုဆိုတော့ ခေါင်းပေါ်ရှိစင်ကလေးမှ အထုတ်များကို ကမူးရှူးထိုးဆွဲချကာ နှစ်ယောက်သား ကားပေါ်မှ ကသောကမျော ဆင်းခဲ့လိုက်ရလေသည်။ 

ကျွန်မတို့စီးလာသောကားက နေပြည်တော်-တောင်ညိုလမ်းမှ မောင်းသည်မို့ လမ်းကြောတိုပြီး စောရောက်တာ ဖြစ်မယ်ဟု သူငယ်ချင်းက ပြောသည်။ ကားအောက်ရောက်မှ ပါလာသောအထုတ်များ စေ့မစေ့စစ်ကြည့်ကြရင်း သူငယ်ချင်းက သူ့အိမ်သားများကို ဖုန်းဆက်ပြီး လာမကြိုနဲ့တော့ဟုဆိုကာ ကားဂိတ်မှ ဆိုင်ကယ်ကယ်ရီနှင့်ပင် ကျွန်မတို့နှစ်ယောက် သွားခဲ့ကြ၏။

ဆိုင်ကယ်နောက်မှာ တင်ပါးလွှဲထိုင်လိုက်ရင်း လက်မှ အထုတ်တစ်ထုတ်ကိုင်လျှက်၊ စလွယ်သိုင်းထားသော ပိုက်ဆံအိတ်တစ်လုံးအပြင် လည်ပင်းမှာလည်း ချိတ်ထားသောကင်မရာနှင့်မို့ လူက ပြုတ်ကျကျန်ရစ်ခဲ့ချင်စရာ။ ဆိုင်ကယ်နောက်မှ စတီးတန်းကလေးကို သတိနှင့်မြဲမြဲကိုင်ရင်း မျက်နှာကို ခပ်ကြမ်းကြမ်းတိုးဝှေ့လာသော နံနက်ခင်းလေအေးအေးရှရှများကြောင့် အိပ်ချင်စိတ်တို့ ဖျတ်ကနဲ လွင့်သွားသလိုပေ။

“အစ်မက နယ်ခံမဟုတ်ဘူး ထင်တယ်”

“အင်း အစ်မက ရန်ကုန်သူ”

“အော် ဒါ ပထမဆုံးအကြိမ် ရောက်ဖူးတာလား”

“ဟုတ်တယ်”

“ဒါက မြို့ထဲလေ အစ်မ၊ အစ်မတို့သွားမယ့်နေရာနဲ့ သိပ်မဝေးပါဘူး”

“ဟုတ်လား”

“ခုချိန်က နေလို့ကောင်းတယ်။ မိုးလည်းကုန်စ၊ သိပ်လည်း မပူသေးဘူး၊ ရာသီဥတုကလည်း ခြောက်ခြောက်သွေ့သွေ့နဲ့ လည်လို့ကောင်းတယ်။ အစ်မလာတာ အချိန်ကောင်းပဲ”

“ဟုတ်”

ဆိုင်ကယ်မောင်းသောကောင်ကလေး ပြောသမျှ အလိုက်တသင့်နားထောင်ရင်း မျက်နှာမူရာဘက်ကို ငေးရင်း လိုက်ပါလာခဲ့ရသည်။ မနက်ခင်းကမူ ကောင်းစွာ မလင်းချင်းချင်လှသေးပေ။

“ဒီမြို့မှာ အင်တာနက် ရလား”

“ဟုတ်ကဲ့ ရပါတယ် အစ်မ”

ကောင်ကလေးပြောသမျှကိုသာ အလိုက်သင့် ဖြေ၊ ပြော၊ နားထောင်နေရာက ပထမဦးဆုံးသော ကျွန်မမေးခွန်းမှာ စိတ်တိုတတ်သောဒေသခံအတွက်ဆိုလျှင် ရိုက်ချင်စရာကောင်းလှလေသည်။ ဒါ တောင်တွင်းကြီးမြို့ပေပဲ။ တောမှ မဟုတ်တာ၊ အင်တာနက်သုံးလို့ ရမှာပေါ့၊ ကျွန်မအမေးကို ကျွန်မဖာသာ ပြန်လည်အားနာသွားမိကာ တိတ်ဆိတ်စွာပင် လိုက်ခဲ့တော့သည်။

သူငယ်ချင်းအိမ်ရောက်တော့ ငါးနာရီသာသာ။  သူငယ်ချင်းက ကြိုတင်မှာကြားထားတာမို့ အိပ်စရာက အဆင်သင့်။ သည်မှာတော့ သူတို့က မွေ့ရာနှင့်မအိပ်ကြချေ။  ရန်ကုန်သူကျွန်မအတွက် သင်ဖြူးဖျာပေါ်မှာ ဂွမ်းစောင်ကလေး ခင်း၊ အဲသည်အပေါ်ကမှ အညာစောင်လေးနှစ်ထပ်လောက် ထပ်ခင်းကာ အိပ်စေသည်။ သို့သော် ဘယ်လှည့်ညာလှည့်လိုက်တိုင်း ကြမ်းနှင့်အရိုးတွေ ထိနေသလိုခံစားရသည်မို့ သက်တောင့်သက်သာ မရှိချင်ဘဲ ကိုယ်လက်တွေနာလာရသည်။ သို့တိုင်အောင် တစ်ညလုံး ကားပေါ်ငုတ်တုတ်စီးလာရသူမို့ အိပ်ချင်လွန်းကာ ခဏနေတော့ မှေးကနဲ အိပ်ပျော်သွားလေသည်။

မနက်ရှစ်နာရီလောက်မှာ သူငယ်ချင်းက “နိူးသေးဘူးလားဟေ့”ဆိုမှ ကျွန်မမျက်လုံးများကို အတင်းဖွင့်ယူရသည်။ ခဏတော့ မှေးကနဲ အိပ်ပျော်သွားခဲ့သည်ပဲ။ “လာ အောက်ဆင်းခဲ့ မနက်စာ စားရအောင်”ဆိုသည်နှင့် အိပ်ချင်သေးသော်လည်း လူးလဲထကာ အောက်ထပ်ဆင်းခဲ့ရတော့၏။ သူငယ်ချင်းကတော့ ညကားပေါ်မှာ အိပ်ပျော်ခဲ့သူမို့ လန်းဆန်းလျှက်ရှိသည်။ ကျွန်မမှာသာ… မျက်လုံးများကျိန်းစပ်ဆဲ။

အောက်ထပ်ရောက်မှပဲ အိမ်ကလေးကို သေချာကြည့်မိရသည်။ တကယ်တော့ အိမ်ကလေး မဟုတ်၊ အိမ်ကြီးသာ ဖြစ်လေသည်။ အိမ်တိုင်တွေက ကျွန်းလား၊ ပျဉ်းကတိုးလား ကျွန်မသေချာမသိသော (အရင်က ရှေးဘုန်းကြီးကျောင်းတွေမှာသာ ကျွန်မတွေ့ဖူးခဲ့သော) တိုင်လုံးကြီးတွေနှင့်။

အိပ်စရာဆိုလည်း အိပ်ခန်းရယ်လို့ ဖွဲ့စည်းမထားဘဲ ခုတင်တွေချင်းပူးကပ်ကာ ခြင်ထောင်ကြိုးတန်းများ နွယ်ဆက်ကာ အိပ်ကြခြင်းဖြစ်သည်။ ခြင်ထောင်များထဲမှ တစ်ယောက်မျက်နှာ တစ်ယောက် လှမ်းကြည့်လို့၊ အိပ်မပျော်မချင်း စကားတွေလှမ်းပြောလို့ရသော အနေအထားဖြစ်သည်။ အခန်းဆိုလို့ အပေါ်ထပ်မှာ၊ ကျွန်မတို့အိပ်သောနေရာလေးဘေးမှာ ကန့်ထားသော အခန်းလေးတစ်ခန်းသာရှိသည်။ ထိုအခန်းကတော့ အဝတ်အစားလဲစရာ၊ အလှပြင် သနပ်ခါးလူးစရာ အမျိုးသမီးအခန်းဖြစ်သည်။  သည်တစ်ခန်းကလွဲလို့ ကျန်သည်က ဟင်းလင်းပွင့်များသာ ဖြစ်လေသည်။

မိသားစု၏ နွေးထွေးမှု၊ အဆီးအတားမရှိ တစ်စုတစ်စည်းထဲဖြစ်တည်မှု၊ မရှိအတူရှိအတူဖြစ်မှုများနှင့် အိမ်ဟူသောအဓိပ္ပါယ်ကို အပြည့်အဝဖော်ပြနေသည့် အိမ်ပါပေ။ ရေနံချေးများဝနေကာ အိမ်ဝိုင်းကြီးထဲမှာ တစ်အိမ်ထဲမဟုတ်ဘဲ တစ်ခြားအိမ်ကလေးများကိုပါတွေ့ရ၍ ကျွန်မက မေးမိပါသည်။

“ဟဲ့ နင်တို့ခြံဝိုင်းထဲမှာ အိမ်ကလေးတွေက လေး-ငါးလုံးတောင် ရှိတယ်နော်”

“အေးလေ အမျိုးတွေ စုနေကြတာလေ၊ အမေ့အမျိုးတွေရော၊ အဖေ့အမျိုးတွေရောပေါ့”

“ဒီခြံဝိုင်းကြီးကို အစကတည်းက တစ်ဝိုင်းလုံးချည်း ဝယ်ထားတာမဟုတ်ဘူး။ အကွက်လေးတွေ ရိုက်ရိုက်ပြီး ပိုင်းရောင်းတာကို ဝယ်ထားတာ။ အဲဒါကို အမျိုးတွေ အနီးအနားမှာ အတူနေကြရအောင် တစ်ပိုင်းစီ တစ်ကွက်စီ ဝယ်ဝယ်ထားကြတာလေ”

“ဟယ် ကောင်းလိုက်တာ နော်။ နင်တို့အမျိုးတွေ တည့်ကြသလား၊ အဲလို အတူနေကြတော့”

“ဒီလိုပါပဲဟယ်၊ ဖြစ်ကာမှ ဖြစ်ရောပေါ့။ အနားမှာ မရှိအတူ ရှိအတူနေကြတာပဲ။ ငါ့အမေပဲ ပေးကမ်းနေရတာ များတယ်ပေါ့ဟာ”

တစ်ဧကနီးပါးကျယ်သော ခြံဝန်းကျယ်ကြီးကိုကြည့်ကာ ကျွန်မမှာ သဘောကျမဆုံး။ ရေချိုးတော့ လည်း ရေဘုံဘိုင်ခေါင်းကိုဖွင့်ကာ ခွက်နှင့်တဘွမ်းဘွမ်းခပ်ချိုးရသည့် အမိုးသာပါရှိသော လေး ဘက်လေးတန်အပွင့်အောက်က အုတ်ကန်အကြီးကြီးမှာ ဖြစ်သည်။ ရေချိုးပြီး လန်းလန်းဆန်းဆန်းဖြစ် မှပဲ ခြံကြီးထဲ သေချာလှည့်ပတ်ကြည့်ရသည်။

ခြံကြီးထဲမှာ မန်ကျည်း၊ ထနောင်းလို အပင်ကြီးတွေကပဲ မနည်းမနော။ သင်္ဘောပင်တွေလည်း တွေ့မိသည်။ ထိုနေ့က နေ့လည်စာစားကြတော့ ဟင်းတွေမှ အများကြီး၊ သင်္ဘောဖူးသုပ် ဟင်းတစ်ခွက်လည်းပါသည်။ ကျွန်မ တစ်ခါမှ မစားဖူးပါ။ သင်္ဘောအဖိုပင်က အသီးမသီးဘဲ ဖူးသည့်အဖူးကို ရေနွေးနှင့်ဖျော၍ ကြက်သွန်နီဆီချက်ကလေးထည့်၊ နှမ်းထည့်ကာ သုတ်ထားတာဟု ဆိုလေသည်။ မွှေးမွှေးစိမ့်စိမ့်ကလေးနှင့် စားကောင်းလှသည်။ နောက်ဟင်းတစ်ခွက်မှာ ချဉ်ပေါင်ကြော်ဖြစ်သည်။ ကျွန်မတို့ ရန်ကုန်ချဉ်ပေါင်ကြော်လို မဟုတ်ဘဲ ချဉ်ပေါင်လက်ကြားကို ငါးပိကလေးမျှသာထည့်ကာ သိပ်မကြေစေဘဲ အရွက်မပျက် ကြော်ထားခြင်းပင်။ ချဉ်ခါးခါးကလေး။ ရန်ကုန်ကစားသောက်ဆိုင်တွေမှာသာ ဆိုင်တင်ရောင်းရင်တော့ ကန်စွန်းပလိန်းလို ချဉ်ပေါင်ပလိန်းဟုများ ခေါ်မည်လား မသိ။

ဘာကိုမှ ဟန်မဆောင်တတ်သောကျွန်မက စားရာတွင်လည်း ရှက်မနေဘဲ အားပါးတရစားတော့ သူတို့ သဘောကျကြသည်။ ကျွန်မပန်းကန်ထဲ ထမင်းတွေ ဟင်းတွေ ထပ်ထပ်ဖြည့်ပေးနေတာမို့ တော်ပြီ တကယ်ဝပါပြီဟု ပြောယူရတော့သည်အထိ။ သည်ကြားထဲ ခြင်ကိုက်မှာစိုးလို့ဟုဆိုကာ သူငယ်ချင်း အစ်မဖြစ်သူက ဘေးမှ တစ်ချိန်လုံးယပ်ခတ်ပေးနေတာမို့ အလွန်ပင်အားနာစရာကောင်းလောက်အောင် ဧည့်ဝတ်ကျေလွန်းလှသူများပင်။

ထမင်းစားအပြီး နေ့လည်ခင်းမှာ တောင်တွင်းကြီးမြို့ထဲ သွားသင့်သည့်နေရာများသို့ လိုက်ပို့ကြရာ ကျွန်မရောက်ဖူးချင်လွန်းသော ဗိဿနိူးမြို့ဟောင်းအပြင် ကျောက်ကွင်းအရေးတော်ပုံ ဆရာတော် သျှင်ဥက္ကဌကျောင်းသို့လည်း အရောက်ပို့ပေးလေသည်။ ကျွန်မမှာ ထိုကျောင်းသို့ မရည်ရွယ်ပါဘဲ ရောက်သွားရသည့်အတွက် သဘောကျလိုက်သည့်ဖြစ်ခြင်း။ ပါလာသောကင်မရာကို လက်ကမချနိူင်ဘဲ ဓါတ်ပုံတွေတစ်ပုံပြီးတစ်ပုံ တဖျတ်ဖျတ်ရိုက်နေခဲ့မိတော့သည်။ 

ညနေစောင်း၍ အိမ်သို့ပြန်ရောက်သော် အိမ်မှာ ဆွေမျိုးအတော်စုံနေပြီကိုတွေ့ရသည်။ စကားတွေ တစ်ယောက်တစ်ပေါက် အော်ဟစ်ပြောဆိုကြနှင့် ပျော်စရာကြီးပင်။ သူတို့ပြောသမျှမှာ စိုက်ထားပျိုးထားသော စပါးအကြောင်း၊ ပြောင်းနှမ်းများအကြောင်းဖြစ်သည်။ အချိန်အခါမဟုတ်ဘဲ ရွာသောမိုးကြောင့် နှမ်းခါရတာ ဒုက္ခများပုံ၊ ချွေပြီးသားနှမ်းများ မိုးလွတ်ရာ ပြောင်းရွှေ့ရပုံ၊ ပဲဆီနှမ်းဆီများ ဈေးတက်ပုံတို့ ဖြစ်လေ၏။

ကျွန်မ မသိသောအကြောင်းအရာများမို့ ဝင်မပြောသာဘဲ ဘေးမှနားထောင်သူအဖြစ်နှင့်ရှိစဉ် သူငယ်ချင်းက လက်ကုတ်ကာ တစ်ညစာအဝတ်အစားနှင့် မနက်ဖြန် သူတို့အလှူမှာဝတ်မည့် အဝတ်အစားများယူပြီး အထုတ်ပြင်ရန် ပြောခြင်းပေ။ မနက်ဖြန်ဆိုလျှင် သူတို့အိမ်မှာ အလှူမို့ သည်ညအဖို့တော့ တစ်ညလုံးချက်ကြပြုတ်ကြနှင့် ဆွေမျိုးစုံခိုက် စကားတွေအော်ကြပြောကြမှာမို့ ကျွန်မ အိပ်မရမှာစိုးသောကြောင့်ပင်တည်း။ ကျွန်မမှာ ကိုယ့်အကြောင်းကိုယ်သာသိသူမို့ မငြင်းနိူင်ဘဲ အထုတ်ပြင်ကာ သူငယ်ချင်းခေါ်ရာလိုက်ရလေသည်။ ကျွန်မတို့သွားအိပ်ရမည့်အိမ်သည် သူတို့အမျိုးအိမ် နောက်တစ်အိမ်ဖြစ်ပြီး သူတို့အိမ်မှ ဆယ်မိနစ်ခန့်လမ်းလျှောက်သွားရုံနှင့် ရောက်လေ၏။

@@@@@@@@@@@@@@@

သူငယ်ချင်းအိမ်ဝိုင်းကို အလွန်ကျယ်လှပြီထင်ထားခဲ့သော ကျွန်မသည် ယခု သူတို့အမျိုးအိမ်တွေ့မှ ပိုအံ့သြရသည်။ သုံးဧကကျော်ကျော်ကျယ်ဝန်းသော ခြံဝိုင်းကြီးထဲတွင် တိုက်အိမ်ကလေးတွေက အရှေ့ဘက်၊ အနောက်ဘက်၊ တောင် မြောက်ဘက်တွေမှာ ခပ်ခြားခြား ခပ်ကျဲကျဲ ဆောက်လုပ်ဝန်းရံလို့၊ ပျဉ်ထောင်နှစ်ထပ်အိမ်ကြီး နှစ်လုံးလည်းပါသေးသည်။ အားလုံးမှာ ဆွေနီးမျိုးစပ်တွေပင်။

သူတို့က ပဲခြမ်းကြော်လုပ်ငန်းလုပ်ကိုင်တာမို့ ပဲကြီးရေစိမ်ပုံ၊ အခွံချွတ်ပုံ၊ ကြော်လှော်ပုံများကို ကျွန်မအား ခြံကြီးထဲပတ်ကာ လိုက်ပြလေသည်။ အခွံချွတ်တာတောင်မှ စက်ဖျစ် လက်ဖျစ်ခွဲထားသေး၏။ ကျွမ်းကျင်ရာလိမ်မာမို့ ဖြစ်မည်။ ရေစိမ်ထားသော ပဲကြီးစေ့များကို စားပွဲစောင်းပေါ်တင်ပြီး ဖျတ် ဖျတ်နှင့် လက်မကလေးနှင့် ဖိကာဖျစ်ကာ အခွံချွတ်သွားသည်မှာ ကြည့်လို့ပင်ကောင်းသေးတော့။

သူငယ်ချင်းက ကျွန်မလက်ကိုဆွဲကာ အမျိုးများကို တစ်အိမ်ပြီးတစ်အိမ် လိုက်လံနှုတ်ဆက်လေသည်။

ကျွန်မ မနေနိူင်တော့ဘဲ ခပ်တိုးတိုးဖွင့်မေးမိပြန်သည်မှာ ဒီလိုအမျိုးတွေ နီးနီးနားနားစုနေကြတာ တည့်ကြသလားဟူသော ထပ်ကျော့မေးခွန်းပင်ဖြစ်လေသည်။ သူမက ရယ်ကာမောကာနှင့်ပင် ဒီလိုပဲ တည့်လိုက်၊ မတည့်လိုက်ပေါ့ဟာဟု ဆိုသည်။

“အရင်က ပေ၃၀ကွက်လေးတွေ ပေ၆၀ကွက်လေးတွေ နီးစပ်ရာစုစုပြီး တစ်ကွက်ချင်း ဝယ်ထားကြတာ။ အဲ့တုန်းကမှ တစ်ကွက်ကို လေး-ငါး-ဆယ်သိန်းတောင်မရှိဘူး။ ခုတော့ နင် မှန်းကြည့်စမ်း ဘယ်လောက်မှတ်နေပြီလဲ” ဟု မေးလေသည်။

“သိန်းထောင်ချီနေမှာပေါ့” ဟူသော ကျွန်မအဖြေကို သူမက ခေါင်းညိတ်ရင်း “သိန်းလေးထောင်ကျော် တန်နေပြီ”ဟုဆိုသည်။

“ဒီလိုပဲ အနီးအနားမှာ အတူနေချင်ကြတာလေ၊ အသက်ကြီးလာတဲ့အခါ ဒီဆွေဒီမျိုးတွေပဲ တိုးတိုးဖော်၊ နေထိုင်မကောင်း မကျန်းမာတဲ့အခါ ဒီဆွေဒီမျိုးတွေပဲ အားကိုးရတာ။ အမျိုးဆိုတာကတော့ ကောင်းကောင်း မကောင်းကောင်း အချိန်တန်တော့လည်း သွေးစည်းကြတာပါပဲ”

သူမပြောသည်များကို ခေါင်းညိတ်နားထောင်ရင်း ကျွန်မစိတ်ထဲ ကိုယ့်ကိုယ်ကိုပဲ အပြစ်တင်ရမလိုလို။

“ဟင့်အင်း မနေချင်ဘူးနော် ကိုကို၊ ချို့ဆွေမျိုးတွေနဲ့ရော၊ ကိုကို့ဘက်ကဆွေမျိုးတွေနဲ့ရော။ စိတ်ရှုပ်တယ်၊ နားငြီးတယ်။ ချိုက အေးအေးဆေးဆေးပဲနေချင်တာ။ ဆွေမျိုးတွေနဲ့ ဝေးလေကောင်းလေ၊ နီးတကျက်ကျက် ဝေးတသက်သက်ဆိုတာလိုပေါ့၊ ကိုကို သိတယ်နော်။ ဒါပဲ”

ကျွန်မခင်ပွန်းအား ကျွန်မပြောခဲ့ဖူးသော စကားများပါပေ။ ခုမှ စိတ်ထဲ ကျောမလုံသလိုခံစားရကာ ရှက်လာသလိုလို ဘာလိုလို။  ရန်ကုန်မှာ ပြန်အခြေချကာ အမေတို့နဲ့နီးနီးနားနားမှာ အိမ်လေး တစ်လုံးလောက်တော့ ရှာကြည့်မှဟု ကြိတ်တွေးရသည်။ ရေကိုသား၍ အကြားမထင်လို့ ဆိုကြသည်၊  သွေးက ရေထက် ပိုပျစ်သည်ဟုလည်း ကြားဖူးသားပေ။ ဟုတ်များနေသလား မသိ။

ကျွန်မကပဲ ဆွေမျိုးတွေအပေါ် နားမလည်သူ၊ သစ္စာဖောက်သူ၊ အပြစ်ရှိနေသူပမာ ခံစားလာရကာ ကျွန်မကိုယ်ကျွန်မ ဘယ်လိုမှ သဘောမကျနိူင်တော့၊ ရှက်လိုက်တာ။  သူမကတော့ နယ်သူနယ်သားပီပီ သည်မြို့အပေါ် သံယောဇဉ်ကြီးသလို မိသားစုအားလုံး ဆွေမျိုးများအားလုံးအပေါ်လည်း သံယောဇဉ်ကြီးလှသည်။ အို သူတို့အမျိုးတွေက တစ်ယောက်အပေါ် တစ်ယောက် ကောင်းကြလို့ နေမှာပေါ့။ နေပါဦး ကျွန်မကရော ကျွန်မဆွေမျိုးတွေအပေါ် ကောင်းဖူးလို့လား။ တတ်နိူင်သမျှတော့ ကောင်းခဲ့ဖူးသည် ထင်တာပါပဲ။ ကျွန်မဆွေမျိုးတွေကရော ကျွန်မအပေါ် ကောင်းကြလို့လား။ ဘယ်တုန်းကများ…ကောင်းဖူးသလဲ၊  ဘာများ လုပ်ပေးခဲ့ဖူးလို့လဲ၊ ကျွန်မစိတ်ထဲ မှတ်မှတ်ထင်ထင် ရှိမနေပါ။

“ဒီလိုပါပဲဟာ သူတို့ ကောင်းကောင်းဆိုးဆိုး ငါ့အမေက အကြီးဆုံးဆိုတော့ အစ်မကြီး အမိအရာဆိုတာလို သူ့မောင်နှမတွေကို စောင့်ရှောက်ထားတဲ့ သဘောပေါ့”

ဘုရားရေ၊ သူမက ကျွန်မအတွေးတွေကို သိများနေသလား။ ကျွန်မလည်း အမိနေရာမှာ ရှိရမည်ဖြစ်သော အစ်မအကြီးဆုံး မဟုတ်လား။

“တခါတလေတော့ ငါလည်း ငါ့ဦးလေးတွေ အဒေါ်တွေကို စိတ်ထဲ ငြိုငြင်မိတာပေါ့။ ငါ့အမေ အိုပဲနေပြီ သူတို့က ခုထိ လာလက်ဖြန့်တုန်းဆိုပြီးတော့လေ၊ နောက်တော့လည်း ဘဝမှာ လက်ဖမိုးနဲ့ပေးနိူင်တဲ့သူဖြစ်ရတာဟာ လက်ဖဝါးဖြန့်ပြီးတောင်းတဲ့သူဖြစ်ရတာထက် ပိုကောင်းတယ်လို့ လက်ခံမိတော့ လက်ရှိကို ကျေနပ်တတ်သွားတာပါပဲဟာ”

အင်း ဟုတ်တာပေါ့၊ ကျွန်မ သူ့ကို စိတ်ထဲမှ ထောက်ခံမိသည်။ အမေ့ဆီ ခဏခဏ မုန့်ဘိုးလာလာတောင်းသော ကျွန်မဦးလေး အမေ့မောင်အငယ်ကောင် လူပျိုကြီးကို ကျွန်မ စိတ်ချဉ်ပေါက်ကာ ရန်လုပ်ဖူးသည်။ အမေစိတ်ဆိုးကာ ရိုက်သောကြောင့် ကျွန်မခြေသလုံးမှ အရှိုးများကို အဖွားက ဆနွင်းသိပ်ပေးခဲ့ရဖူးသည်။ ခုတော့ ကျွန်မကိုယ်တိုင် လူကြီးဖြစ်ပြီ၊ အစ်မအကြီးမို့ အမိနေရာရောက်နေပြီ။ အမေ၏ မောင်ငယ်ကို စောင့်ရှောက်ချင်သော အစ်မကြီးအမိအရာမေတ္တာကို ကျွန်မ နားလည်သင့်သလောက် နားလည်ခဲ့ရပြီ။

သို့သော် ကျွန်မမှာ ငယ်စဉ်ကတည်းက ဖာသိဖာသာနေတတ်သူမို့ထင့်၊ မိသားစုမောင်နှမများ၊ အမေအဖေဘက်က ဆွေမျိုးအရင်းများနှင့် သိပ်မရင်းဘဲ တစ်ကိုယ်ကောင်းဆန်ချင်သူဟုပြောလျှင် ပြော၍ရမည်ပေ။  ဘုရား ဘုရား။ ကျွန်မသေလျှင်တောင် ကျွန်မအသုဘမှာ လိုက်ပို့မည့်ဆွေမျိုး ရှိပါ့မလားဟု တွေးမိတော့ မျက်နှာတွေ ဖြန်းကနဲ ပူလာရလေတော့သည်။ အို နေပေါ့၊ သေတဲ့သူက သေပြီပဲ။ မပို့လည်း နေကြပေါ့။ ခေါင်းမာသော၊ အခံစိတ်ကို လွယ်လွယ်နှင့်မပြင်တတ်သော ကျွန်မစိတ်က အထွန့်တက်မိပြန်သည်။

အဲဒီမိန်းမသေတုန်းက လိုက်ပို့မဲ့ဆွေမျိုးတောင် မရှိဘူး၊ ကျီးနဲ့ဖုတ်ဖုတ်ပဲ၊ ရပ်ကွက်ကောင်းလို့သာပေါ့ဟုများ တင်းဆိုခံရမည်လား။ ကျွန်မ ဘုရားသာ တ မိပြန်လေသည်။

@@@@@@@@@@@@@@@

“ကိုရေ ချိုတို့ အမေတို့အိမ်နားမှာ အိမ်လေးရှာကြရအောင်ကွာ နော်၊ အမေက ပြောတယ်။ တစ်ခြံကျော်က သူတို့မြေကွက်ကလေး ဖဲ့ရောင်းချင်လို့ တဲ့။ ပေ၂၀ ပေ၆၀လေးတဲ့ မဆိုးဘူး ပြောတယ်။ ဈေးလည်း မဆိုးဘူး သိန်း ၁၂၀၀ တဲ့”

“မျိုးတို့ကလေ သူတို့နယ်မှာ ခြံဝိုင်းကြီးတွေမှ အကျယ်ကြီးနဲ့နေတာရယ်၊ ပြီးတော့ ဆွေမျိုးတွေ ဟိုဘက်ဒီဘက်အကုန်လုံး စုစုဝေးဝေးနဲ့နေကြတာ၊ ပျော်စရာကြီးပဲ။ ချိုတို့လည်း တစ်နေ့ မြန်မာပြည်ပြန်လို့ အသက်လေးဘာလေးရလာတဲ့အခါ  ဆွေမျိုးတွေနဲ့ အဲသလို သိုက်သိုက်ဝန်းဝန်းလေးနေကြရရင် ကောင်းမလားလို့”

စင်ကာပူပြန်ရောက်တော့  ခင်ပွန်းသည်ကို ခရီးရောက်မဆိုက် ပြောမိသည်။

“ဘာ ချိုရယ်၊ သိန်း ၁၂၀၀ကို ဈေးမဆိုးဘူး၊ ပြီးတော့ ပေ၂၀  ပေ၆၀ ဟုတ်လား”

“အင်းလေ”

“ဘယ်မှာတုန်း ငွေက၊ မင်းပြောတဲ့ သိန်း ၁၂၀၀က”

“ကိုနဲ့ချို စုထားတာလေးတွေ ထုတ်လိုက်ရင်ရော”

ကို့လည်ပင်းကို သိုင်းဖက်ရင်း ကို့မျက်နှာကို တည့်တည့်ကြည့်ကာ ပြောလိုက်သည်။

“အေး အဲဒါတွေ အားလုံးထုတ်လိုက်ရင်တောင် စင်ကာပူဒေါ်လာ တစ်သိန်းဆို မြန်မာငွေ သိန်း ၇၀၀ကျော် ရှိတာ။ ကျန်တာလေးတွေနည်းနည်းပါးပါး ဟိုစု ဒီစုလုပ်ရင်တောင် သိန်းတစ်ထောင်စွန်းစွန်းရှိတာ”

“အင်း ဟုတ်တာပဲနော်”

“ပြီးတော့ အိမ်ချည်းပဲ မဟုတ်သေးဘူး၊ ကိုတို့ ရင်းနှီးဖို့ အလုပ်လုပ်ဖို့ ငွေရင်းလိုသေးတယ်၊ မှန်းသလိုဖြစ်မလာရင် ငွေမလည်သေးတဲ့ ပထမနှစ်တွေမှာ တောင့်ခံနိူင်ဖို့ ထိုင်စားနိူင်ဖို့ငွေ လိုသေးတယ်”

အင်း ကိုပြောတော့လည်း ဟုတ်တာပဲ။

“အားမငယ်ပါနဲ့ကွာ၊ ခု ကို သတင်းတွေဖတ်နေတာ၊ တန်ဖိုးနည်းအိမ်ရာတဲ့၊ သိန်းနှစ်ရာ-သုံးရာနဲ့ တိုက်ခန်းတစ်ခန်းဝယ်နိူင်မယ်တဲ့”

“ဟင် တိုက်ခန်း...တန်ဘိုးနည်းအိမ်ရာ…။  နေချင်ပါဘူး အဲ့မှာ”

ကျွန်မကမူ ဘယ်လောက်ကျဉ်းကျဉ်း ကိုယ့်ခြံကိုယ့်ဝန်းကလေးထဲ သီးပင်စားပင်ကလေးများ၊ ပန်းကလေးများ ရသလောက်စိုက်ကာ မြေကြီးပေါ်ခြေချလိုသူသာ ဖြစ်သည်။

“အံမာ ဒေါ်ရွှေချို နေချင်ပါဘူး မလုပ်နဲ့။ ဒီလိုပဲ ခဏနေပြီး ကျန်တာနဲ့ သိန်းတစ်ရာတန်လောက် ကားလေးတစ်စီးဝယ်၊ ကျန်တာကို အရင်းအနှီးလုပ်၊ တဖြည်းဖြည်းငွေပွားလာတော့မှ မင်းနေချင်တဲ့ တန်ဘိုးကြီး အိမ်ရာမျိုးကို ဝယ်ပြီး ပြောင်း ဟုတ်ပြီလား”

ကို့မျက်နှာက ပြုံးစစနဲ့မို့ ချို့မှာ စိတ်မတိုသာ။ ဟိုအရင်က ကျွန်မတို့ဝယ်ထားသော ရန်ကုန်က အိမ်နှင့်မြေကွက်ကို ဟိုတုန်းကဈေးနဲ့ ပြန်ရောင်းခဲ့ရတာ မှတ်မိသည်။ အဲသည်တုန်းကတော့ စင်ကာပူမှာ အိမ်ငှားဘဝနဲ့ မနေချင်တော့တာမို့ အိမ်အပိုင်ဝယ်ပြီး ငွေလက်ငင်းပေးချေရသော ပမာဏပြည့်အောင် ရန်ကုန်ကပိုင်ဆိုင်သမျှလေးတွေ ရောင်းလိုက် ရတာဖြစ်သည်။ ထိုစဉ်က တန်ဘိုးစုစုပေါင်းမှာ ကျပ်သိန်း၅၀၀ ကျော်သာ တန်ကြေးရှိခဲ့ကာ ၂၀၀၈ခုနှစ်ဝန်းကျင်ဟု  မှတ်မိနေသည်။ ခုတော့ ထိုအိမ်နှင့်မြေတန်ဘိုးက သိန်း သုံး-လေးထောင်ကျော်တန်နေပြီဟုသိရတော့  ရင်ထုမနာဖြစ်လိုက်ရသေးသည်။

စင်ကာပူကအိမ် ပြန်ရောင်းရင်လည်း ဒေါ်လာနှစ်သိန်းလောက်တော့ မြတ်မှာပါလေဟု စိတ်ကိုဖော့တွေးမိသည်။ သို့သော် ဒေါ်လာနှစ်သိန်းသည်ပင် မြန်မာငွေ ကျပ်သိန်းထောင့်ငါးရာမျှသာ။ စင်ကာပူသည် ကိုယ့်မြေကိုယ့်ရေ မဟုတ်၍ အပြီးတိုင်မနေလို၊ ရန်ကုန်ကပိုင်သမျှကိုလည်း ထုတ်ရောင်းလိုက်ရတာမို့ ကိုယ့်မြေကိုယ့်ရေမှာ အခြေချနေထိုင်လိုသော်မှ အိမ်ရာပိုင်ပိုင်မရှိသေးသော လက်မဲ့ဘဝ။ အိမ်ဈေးမြေဈေးတွေကလည်း လိုက်လေ ဝေးလေ၊ ပါးစပ်ထဲမှာတင် ခေါ်ဈေးပေါက်နေကာ ဘယ်လိုမှ မမီသာ။ ခက်လေပြီ။

ဘာကြောင့်များ အိမ်ဈေး မြေဈေးတွေ သည်လောက်တောင်ထိုးတက်သွားရတာပါလိမ့်။ ငါးနှစ်-ခြောက်နှစ် အတွင်းမှာကိုပဲ ဈေးတွေက အဆမတန်။ တစ်နေ့ထက် တစ်နေ့ အတက်ချည်းသာနေသည်။ ကျွန်မတို့လို နိူင်ငံရပ်ခြားမှာ ဆယ်နှစ်ကျော် အလုပ်လုပ်ကိုင်စုဆောင်းပြီး ပြည်တော်ပြန်မည့် နိူင်ငံခြားပြန်တွေတောင် မြို့တွင်းမှာ မဝယ်နိူင်၊  မြေကွက်ကျယ်ကျယ်မှာ အိမ်ကလေးတစ်လုံးနှင့်နေဖို့ရာ မတတ်နိူင်။ သာမန် လက်လုပ်လက်စားတွေ၊ အလယ်အလတ်တန်းစားတွေ၊ အိမ်ပိုင်မရှိသေးသူတွေ၊ ဘဝနှစ်ခုကို အတူတကွ အိမ်ရာထူထောင်တော့မည့် ချစ်သူတွေ။ ဘယ်လိုများ အိမ်တစ်လုံး ပိုင်ဆိုင်နိူင်ကြမှာပါလိမ့်။ တွေးကြည့်မိတာနှင့်ပင် စိတ်မော၍လာသည်။

“ဘာမှ မပူနဲ့ မိန်းမ၊ ကို အခု ထီတိုက်လိုက်ဦးမယ်”

ပြောပြောဆိုဆို တီဗီကိုဖွင့်ကာ တယ်လီတက်ခ်နှင့် ထီတိုက်ဖို့ပြင်နေသောကို့ကို  မျက်စောင်းလှမ်းချိတ် လိုက်မိသည်။ မပေါက်နိူင်တဲ့စင်ကာပူထီကိုများ သူမို့ စိတ်ရှည်လက်ရှည် အပတ်တိုင်း ထိုးနိုင်တိုက်နိုင် လွန်းသည်။

“ဟာ တိုက်တယ်ဟေ့။ နေ့စွဲ  နေ့စွဲ ထီလက်မှတ်ပေါ်က နေ့စွဲ ဟားဟားဟား”

ပြောလည်းပြော၊ ရယ်လည်းရယ်ကာ ထီလက်မှတ်ကိုလုံးချေလိုက်ပြီး အနားရှိ အမှိုက်ထုပ်ထဲ လှမ်းထည့်လိုက်သော ကို့ကိုကြည့်ရင်း ပြုံးမိရသည်။ ကိုကတော့ ရယ်နိူင် နောက်နိူင်နေသေးသည်။ 

ကျွန်မမှာသာ….။ 

ခြံကျယ်ကြီးတစ်ခြံထဲ ပြတင်းပေါက်များများပါသော  အိမ်ကလေးပိစိဆောက်ကာ အိမ်ရှေ့မြေကျယ်ကျယ်မှာ စိုက်ထားသည့် ပန်းခင်းများအကြား၊ လိပ်ပြာရောင်စုံကလေးများအကြား ပြုံးပျော်ပြေးလွှားနေသည့် ကျွန်မကို အဖန်ဖန်အလဲလဲ မြင်မက်နေကျ အိပ်မက်ဟောင်းကြီးထဲတွင် သည်ညလည်းပဲ မြင်မက်ရလိမ့်ဦးမည်ပင်။