Friday, September 27, 2013

ဖြစ်ကြောင်းကုန်စင်မှာ….

“လာ လာ တက်ထား အစ်မကြီး တိုးထား၊ အထဲထိ ဝင်ထား၊ ခဏလေး ခဏစောင့်မယ် ဆရာရေ၊ ဟိုးမှာ ပြေးလာနေတယ်”

“မင်းလမ်း လမ်းဆုံ မြလမ်း ရွှေဂုံတိုင် ဗဟန်းသုံးလမ်း ယောက်လမ်း ဘူတာကြီး ဆူးလေ လိုက်မလား၊ ဆူးလေ ဆူးလေ ဆယ့်နှစ်လုံးတန်းဆင်းမှာ ပြင်ထားမယ်”

ကားက ရုံးချိန်မို့ ဘတ်စ်ကားတစ်စီးဆိုတာထက် ငါးသေတ္တာတစ်ဘူးလို….။

“အစ်မ ပေး ခြင်းတောင်း၊ ကျွန်တော်ကိုင်ထားပေးရမလား”
ထိုင်နေသော လူငယ်အမေးကို ရပ်နေသော အမျိုးသမီးက ခေါင်းခါပြသည်။

“ရှင် ဘယ်လိုဖြစ်နေတာလဲ၊ ဟိုဘက်နည်းနည်းတိုးပါဦးတော့လား၊ ဒီမှာ လူက ရှင့်ရင်ခွင်ထဲ ရောက်တော့ မယ်၊ ကတည်းမှ…”
အမျိုးသားက ဘုကြည့်ကြည့်ရင်း ကိုယ်လုံးကို ဂဏန်းရွှေ့လေး ရွှေ့ပေးလိုက်သည်။ သို့သော် ယခင်အတိုင်း၊ ရွေ့ကား မရွေ့။

ရှေ့မှာ အဘိုး၊ အဘွား၊ လူလတ်ပိုင်းတစ်ယောက်နှင့် ကလေးနှစ်ယောက် အပြေးလာနေကြတာမို့ ယာဉ်မောင်းကို ရပ်ခိုင်းရင်း အဘိုးကြီးနှင့် အဘွားကြီးကို လက်မောင်းမှ ဆွဲတင်၊ ခါးမှလည်း တွန်းတင်ပေးလိုက်ရသည်။

“ရော့ သုံးယောက်အတွက် သုံးရာယူထား”
“အစ်ကိုရာ ကလေးနှစ်ယောက်က တစ်ယောက်စာတော့ ပေးပါဗျာ”

အဘိုးကြီး၊ အဘွားကြီး၊ လူလတ်ပိုင်းနှင့် ၅နှစ်အရွယ် ကလေးတစ်ယောက်၊ ၁၂နှစ်အရွယ်ကလေးတစ်ယောက်မို့ ကျွန်တော်က ၄ယောက်စာ တောင်းလိုက်သည်။

“ဟာဗျာ ခင်ဗျားဟာက တစ်ခြားလူတွေဆို မတောင်းဘူး၊ ခင်ဗျားကျမှ ကလေးတွေအတွက် တောင်းစရာလားဗျာ”

“အစ်ကိုလေးရာ ကလေးက နှစ်ယောက်လေဗျာ၊ တစ်ယောက်စာတော့ ပေးမှပေါ့”

“မပေးဘူးကွာ၊ ရော့ သုံးယောက်စာ နှစ်ရာပြန်အမ်း၊ ယူချင်ယူ၊  မယူချင်နေ”

“ကလေးနှစ်ယောက်အတွက် ကျွန်တော်က တစ်ယောက်စာပဲ တောင်းတာပါဗျ၊ တစ်ယောက်စာတော့ ပေးပါ၊ ရွှေဂုံတိုင် ဗဟန်းသုံးလမ်း ယောက်လမ်း ဘူတာကြီး ဆူးလေ လိုက်မလား၊ ဆူးလေ ဆူးလေ လာထားနော် ခဏလေး ဆရာရေ နောက်က တက်နေတုန်း”

“မပေးဘူးကွာ၊ မင်းတော့လား ခဏနေဦး၊ ငါ ဗဟန်းဆင်းမှ သိမယ်”

“ဟဲ့ တော်ကြပါတော့ဟယ်၊ ငွေလေးတစ်ရာနဲ့ ဖြစ်နေလိုက်ကြတာ၊ ကဲ ကဲ အဲဒီကလေးတစ်ယောက်စာ အတွက် ငွေတစ်ရာ ငါ့ဆီကသာ ယူလိုက်ပါ။  ရော့ ငါ့အတွက်တစ်ရာနဲ့ ပေါင်းပြီး နှစ်ရာ ယူလိုက်၊ ရှေ့မှတ်တိုင်ကျ  ငါဆင်းမှာ”

“မလိုပါဘူးဗျာ၊ ခင်ဗျား ပေးစရာ”

မိန်းမကြီးက ထိုလူကို မျက်စောင်းလှမ်းထိုးသည်။ မိန်းမကြီးလက်ထဲက နှစ်ရာတန်ကို ပြုံးပြီးယူလိုက်ရင်း ကလေးနှစ်ယောက်အဖေကို လှမ်းကြည့်တော့ ထိုသူက ရန်လိုဟန်ရှိနေသေးသည်။ မတတ်နိူင်၊ ကျွန်တော် သူ့ကို မကြည့်မိအောင် နေလိုက်ရသည်။ ကြာရင် ဆွဲထိုးမိတော့မည်။ ပြီးရင် စပါယ်ယာအဆိုးပဲ ဖြစ်ဦးမည်။ လူတွေက သည်လိုပါပဲ။ စပါယ်ယာက သဘောကောင်းတော့လည်း ခရီးသည်တွေက ဆိုးချင်သည်။ မိန်းမ မီးပူမတိုက်အား၍ တိုက်မပေးလိုက်သော ယူနီဖောင်းရှပ်လက်တိုအပြာကို လက်ဖြင့်ဆွဲဆန့်ရင်း ကားနောက်ပေါက်ကတက်သော ခရီးသည်များထံ ကားခတောင်းရန် ပြင်လိုက်သည်။

“ဟေ့လူ ခင်ဗျား မေ့ချင်ယောင်ဆောင်နေသလား၊ ကျုပ် ငါးရာတန် ပေးလိုက်တာ။ နှစ်ရာပြန်အမ်းဦး”

ကလေးအဖေက ပိုက်ဆံမရှိလို့ မဟုတ်၊ ငါးရာတန်တောင် ပေးထားသေးတာ၊ ကလေးနှစ်ယောက်စာသာ မပေးချင်လို့ ကပ်သပ်နေခြင်း ဖြစ်လေသည်။ ကျွန်တော် ဘာမှ ပြန်ပြောမနေတော့။ ခုနက မိန်းမကြီးပေး သွားသော လက်ထဲက နှစ်ရာတန်တစ်ရွက်ကို အမ်းပေးလိုက်သည်။ 

“ခင်ဗျားဗျာ အတော်မိုက်ရိုင်းပါလား၊ ခင်ဗျားနှစ်ရာတန်ကိုလည်းကြည့်ဦး၊ ဒီလောက် ထက်ခြမ်းကြီးပြဲနေတာကို တိတ်နဲ့ ကပ်ထားတာ၊ ပြန်လဲပေးဗျာ”

ဟာ….၊  ဒီလူ အတော်လွန်ပါလား၊ ပေးတဲ့သူတွေကလည်း ဒီငွေတွေပဲ ပေး၊ သုံးတဲ့သူတွေကလည်း ဒီငွေတွေပဲ သုံး၊ ဒီငွေတွေပဲ လည်ပတ်နေရတဲ့ဟာ၊ ကျွန်တော် တော်တော်လေး စိတ်ပျက် လက်ပျက်ဖြစ်သွားရသည်။ မတတ်နိူင်ပြန်ပါ။ ကျွန်တော့်လက်ထဲက အသစ်ဆုံးဖြစ်မည်ထင်ရသော တစ်ရာတန် ၂ရွက်ကမ်းပေးလိုက်သည်။ 

မျက်စေ့ထဲမတော့ နှစ်ရာတန်အပြဲကြီးကို စေတနာဗလပွနှင့် ပေးသွားသော စေတနာရှင်မိန်းမကြီးကိုသာ
 ပြေးမြင်မိတော့သည်။

အေးလေ ဒီငွေတွေပဲ သုံးနေရတာကို.... 

မိန်းမကြီးအလွန် မဟုတ်။ ကျွန်တော်လည်း မလွန်၊ ထိုလူလည်း နည်းနည်းတော့ လွန်သည်ဆိုပေမဲ့ လွန်တော့ မလွန်…..။


Sunday, September 22, 2013

ရင်၌ပွင့်လန်း၍ သွေးဖြင့်ရေးခြယ်သော



(၁)
သမီးထွေး….။ သမီးကို မေမေစတွေ့ခဲ့တာ ပအို့ဝ်ရွာလေးတစ်ရွာမှာ။ သမီးဖေဖေနေမကောင်းလို့ အိမ်တစ်အိမ်မှာ ဆေးဝါးကုသရင်း ခရီးတစ်ထောက်နားရာက အိမ်ရှင်ပအို့ဝ်အမျိုးသမီးရဲ့ သမီးထွေးလေးအဖြစ် သမီးကို စတွေ့ခဲ့ရတာ။ တွေ့တွေ့ချင်းမှာပဲ သမီးက လက်ကလေးနှစ်ဘက်ဆန့်တန်းလို့ မေမေ့ဆီ ပြေးလာမယ့် ဟန် ပြင်နေခဲ့ တာ။ မေမေချီတော့လည်း အလွယ်တကူ လိုက်ပါလာတာ။ ရှေးရေစက်ထင်ပါရဲ့၊ ပါးဖောင်းဖောင်းလေးနှစ်ဘက်က ပန်းသီးလေးလို ရဲရဲနီနေတဲ့သမီးကို မေမေ မြင်မြင်ချင်းချစ်သွားခဲ့တယ်။ မြေပေါ်မှာ လူးနေအောင် ဆော့ထားတဲ့ သမီးတစ်ကိုယ်လုံးကတော့ ပေကျံလို့။ ဖုန်မှုန့်တွေနဲ့ အလူးလူးရယ်။

သမီးတို့အိမ်မှာ မေမေတို့ သုံးရက်တိတိကြာခဲ့တယ်။ ဖေဖေနေကောင်းလို့ ပြန်ကြဖို့ပြင်တော့ မေမေက ရုတ်တရက် သမီးထွေးကို မခွဲနိူင်သလိုလို ဖြစ်ပါရော။ နွမ်းပါးတဲ့ သမီးမိဘတွေကလည်း ခေါ်သာသွားတဲ့လေ။ အသေအချာ စကားပြောဆိုပြီးကြတော့ သမီးကိုမွေးစားဖို့ သမီးမိဘတွေက သဘောတူခဲ့ပါတယ်။ မေမေတို့က သမီးကို ကျောင်းထားပေးမယ်၊ မေမေတို့နဲ့တန်းတူ စားသောက်နေထိုင်ရမယ်။ သမီးမိဘတွေက သမီးကို ပညာတတ်ကြီး ဖြစ်စေချင်တာတစ်ခုပဲ နားလည်တဲ့ ရိုးသားလွန်းသူတွေ။ ရွာရဲ့အကြီးအကဲရှေ့မှာပဲ ပြောဆိုပြီး သမီးကို မွေးစားခဲ့ကြတာ။ သူတို့က စာချုပ်တွေ ဘာတွေလည်း နားမလည်ကြဘူး။ မလိုပါဘူး၊ ပါးစပ်ကတိတစ်လုံးပဲ လိုတာပါ၊ သမီးထွေးကို ပညာတတ်အောင်သာ သင်ပေးပါတဲ့လေ။ ဘယ်လောက် ရိုးစင်းလိုက်ကြသလဲ။

မေမေတို့မိသားစုမှာ သမီးအတွက် ကစားဖော် ကိုကိုရယ် မမရယ် နှစ်ယောက် ရှိသေးတယ် သမီးရဲ့။ သမီးကို မြင်ရင် သူတို့ ချစ်ကြမှာပါ။ ခုဆို မေမေတို့ မိသားစုဝင်အားလုံး ငါးယောက် ဖြစ်သွားခဲ့ပြီပေါ့ သမီးထွေးရယ်။ ရယ်စရာကောင်းတာက ဖေဖေအညာသား၊ မေမေအညာသူကမွေးတာမို့ မေမေတို့မိသားစုဝင်အားလုံးက အသားခပ်ညိုညိုတွေ၊ သမီးထွေးကတော့ တောင်ပေါ်သူမို့ ဖွေးဥနေတဲ့ အသားအရည်နဲ့မို့ ကျီးမည်းတွေကြားက ဗျိုင်းဖြူကလေးလို အသွေးအရောင်ကွဲနေခဲ့တာ။ ဒါပေမဲ့ မေမေတို့ဟာ မိသားစုဝင်တွေ ဖြစ်သွားခဲ့ကြတယ်နော် သမီးထွေး။ ဘ၀အဆက်ဆက် သံသရာအလီလီက ဆုတောင်းကြောင့်သာ ဒီဘ၀မှာ မိသားစုဝင်အနေနဲ့ ပြန်တွေ့ကြရတာလို့ မေမေကတော့ ယုံတယ်။

(၂)

သမီးထွေးကို ကျောင်းစအပ်တော့ နာမည်ပေးဖို့ လိုလာတယ်။ ဒါနဲ့ သမီးကို ထွေးထွေးဆိုတဲ့နာမည်ရင်းနောက်မှာ အငယ်ဆုံးမို့ ငယ်တစ်လုံးထပ်ဖြည့်ပြီး ထွေးထွေးငယ်လို့ နာမည်ပေးခဲ့ကြတာ။ သမီးအသက် ဆယ့်နှစ်နှစ်ရောက်လို့ နားလည်သိတတ် လာတဲ့အခါ သမီးက တောင်းဆိုမှုတစ်ခု လုပ်ခဲ့တယ်။ 

“မေမေ မမရော၊ ကိုကိုရော နာမည်တွေနောက်မှာ ဖေဖေ့နာမည်ပါတယ်၊ ထွေးငယ်နာမည်ကျတော့ ဖေဖေ့နာမည် မပါဘူးနော်” တဲ့။ သမီးကြီးနာမည် သန္တာမျိုးမြတ်၊ သားကြီးနာမည် ရဲသွေးမျိုးမြတ်လို့ မေမေတို့က ပေးထားခဲ့တာကိုး။  ဒါနဲ့ပဲ သမီးထွေးနာမည်ကို သမီးကြေနပ်အောင် ထွေးထွေးမျိုးမြတ်လို့ သတင်းစာကနေ နာမည်ပြောင်း ထည့်ပေးခဲ့ရတာ။  ကြည့်စမ်း သမီးဟာ အဲဒီအရွယ်လေးကတည်းက မေမေတို့ဘယ်လိုမှ ထင်မထားတဲ့အကွက်ကို ကြည့်မြင်ခံစားတတ်ခဲ့တာ။ သမီးကိုကိုနဲ့မမက အဲဒါ “မေမေ့ပအို့ဝ်မက သမီးရင်းသားရင်းတွေနဲ့ ခြေရာချင်းတိုင်းတာမေမေ”လို့ မလိုတမာ ခနဲ့သေး ရဲ့။ မေမေကတော့ ခုလိုနာမည်ကလေး အသေးအဖွဲကအစ ခံစားတတ်တဲ့၊ မေမေတို့နဲ့ တသွေးတည်းတသားတည်းဖြစ်ချင်တဲ့ သမီးထွေးခံစားချက်ကလေးကို သဘောကျမဆုံးဖြစ်ခဲ့ရတယ် သမီးထွေးရေ။ 

သမီးထွေးက မေမေတို့ သူ့ကိုမွေးစားထားတယ်ဆိုတာကို သိတယ်။ သိဆို မေမေတို့ကလည်း ပွင့်ပွင့်လင်းလင်း ပြောပြထားခဲ့တယ်။ သမီးရင်းနဲ့မခြားထားတာမို့ မေမေတို့မေတ္တာကို သမီးနားလည်မယ်လို့လည်း ယုံကြည်တာ လည်း ပါတာပေါ့လေ။ သမီးမိဘရင်းတွေကလည်း ရန်ကုန်ကို နှနှစ် တစ်ခါလောက် ဆင်းလာတတ်ခဲ့ကြပြီး လာတိုင်းလည်း သမီးနဲ့ ပေးတွေ့လေ့ရှိပါတယ်။ သမီးအဖေရင်းက “ပြန်လိုက်မလား” ဆိုတာကိုတောင် “လိုက်ပါဘူး မေမေတို့နဲ့ပဲ နေမယ်” ဆိုခဲ့တာ။ သမီးအဖေက တမင်နောက်ပြောတာမှန်း သိသိကြီးနဲ့ သမီးက ခါးသည်းငြင်းဆန်ခဲ့သလေ။ အ၀တ်အစား နွမ်းနွမ်းဖတ်ဖတ်လေးတွေနဲ့ သမီးရဲ့မွေးချင်းမောင်နှမရင်း ပေပေတူးတူးလေးတွေကိုကြည့်ပြီး သမီးက နှာခေါင်းရှုံ့ပြ၊ သူဝတ်ထားတဲ့ဂါဝန်လှလှလေးကို ဂါဝန်အနားစကနေကိုင် မ ပြီး ကိုယ်လေးကိုပတ်ချာလှည့်ပြလို့ မဆုံးနိူင်တော့တာမို့ မေမေတို့မှာ သဘောကျရသေးတယ်။ အဲဒီကတည်းက မေမေတို့ ရိပ်စားမိပါရဲ့၊ သမီးထွေးဟာ ဘဝမြင့်မြင့်မားမားမှာ အထက်တန်းကျကျနေလိုသူ သမီးကလေးဆိုတာ….။­­­­­­­

(၃)

သမီးထွေးဟာ ဆယ့်သုံးနှစ်သမီးမှာ မေမေ့ကို ကူလုပ်ပေးတတ်လာတယ်။ သမီးကိုကိုနဲ့ မမတို့ရဲ့အလုပ်တွေ လည်း နိူင်သလောက် ကူလုပ်ပေးလေ့ရှိတယ်။ သမီးက မနက်စောစော ငါးနာရီဆို ဘယ်သူမှမနှိုးရဘဲ နိူးနေပြီ။ မနက်မနက် ကိုကို ကျောင်းမသွားခင် ကိုကို့ဖိနပ်ကို ပြောင်နေအောင် တိုက်ပေးထားတတ်တယ်။ မမဝတ်မဲ့ အဝတ်အစားတွေကို ဘီရိုထဲက ထုတ်လို့ ပြန့်နေအောင် မီးပူတိုက်ပြီး ချိတ်ကလေးနဲ့ ရွရွလေး ချိတ်ထားပေးတတ်တယ်။ မမအလှပြင်ပြီဆို ဘေးနားကနေ မမလိုတာတွေ လုပ်ပေးရင်း မမမျက်နှာကလေးကို တငေးငေးပေါ့။

ဒီကြားထဲကမှ သမီးမမက သမီးထွေးကို “ဟဲ့ အထွေး ငါ့ ဖိုင်တစ်ခု ကုတင်ပေါ်မှာ ကျန်ခဲ့လို့ သွားယူပေးစမ်း၊ ငါ ဒီမှာ ဖိနပ်ဝတ်ပြီးသားဖြစ်နေလို့” အဲသလို ခပ်ငေါက်ငေါက် ခိုင်းတတ်သေးတာ။ သမီးကိုကိုရော ဘာထူးလို့လဲ၊ “မိထွေး ရေတစ်ခွက်လောက် ပေးစမ်း၊ ရေခဲနည်းနည်းထည့်ခဲ့ ကြားလား မြန်မြန်လုပ်” လို့ ခိုင်းတတ်တယ်။ မေမေက သမီးကြီးနဲ့ သားကို သမီးထွေးဟာ အိမ်အကူ မဟုတ်တဲ့အကြောင်း၊ သမီးတို့ သားတို့ရဲ့ ညီမငယ်လေး ဖြစ်တဲ့အကြောင်းနဲ့ တော်ရုံကိစ္စတွေ ကိုယ့်ဖာသာကိုယ် လုပ်ကြဖို့အကြောင်းတွေ တိုးတိုးတိတ်တိတ် ပြောပြရတယ်။

အားလုံးခိုင်းတာလုပ်ပြီးမှ သမီးက သူ ကျောင်းသွားဖို့ လုပ်တယ်။ သမီးထွေးကျောင်းကားက ရှစ်နာရီခွဲမှ လာတာမို့ မေမေ့ကို ငရုတ်သီးထောင်းပေးခဲ့တယ်။ ဖေဖေအလုပ်သွားရင် ဝတ်ဖို့အတွက် အဝတ်အစားနဲ့ခြေအိတ်တစ်စုံ ထုတ်ထားပေးခဲ့သေးတယ်။
ကျောင်းအားရက်တွေဆိုရင်တော့ မေမေ့ကို မီးဖိုထဲမှာ ကူလုပ်ပေးတော့တာပဲ။ ထမင်းချက်၊ ငရုတ်သီးထောင်းအပြင် ကြက်သား၊ ငါး ကြော်တတ်နေပြီ။ တစ်ခြားဟင်းအစပ်အဟပ်တွေကိုတော့ မေမေက သင်ပေးနေရတုန်းပဲ။ ချက်ပြုတ်ပြီးလို့ မီးဖိုချောင်ရှင်းလင်းတဲ့အလုပ်လည်း သမီးထွေးပဲ လုပ်တယ်။ မေမေ့ကိုတော့ နားနေပါ မေမေရယ် တဲ့။ အိမ်ကို ရှင်းလိုက်လင်းလိုက်တာလည်း မြန်မှ မြန်၊ ဖျတ် ဖျတ်နဲ့ လုပ်သွားလိုက်တာ။ မေမေကလေ ဈေးကပြန်လာလို့ သမီးထွေး ဆီးကြိုတိုက်လေ့ရှိတဲ့ ရေအေးအေးလေးတစ်ခွက်ကိုမှ မသောက်ရရင် အမောပြေတယ်ကို မထင်မိတော့တဲ့အထိ သမီးထွေးအပေါ် သံယောဇဉ်တွေ တိုး တိုးလာခဲ့တော့တာ။

သမီးကိုကိုနဲ့ မမကတော့ သူတို့အခန်းထဲကကို မထွက်ပါဘူး။ မေမေတို့က အခန်းတိုင်းမှာ ရေချိုးခန်းရှိတဲ့အပြင် တီဗီ၊ အောက်စက်ပါ တပ်ထားပေးတာမို့ သူတို့အခန်းထဲမှာတင် သူတို့တစ်ကမ္ဘာဖြစ်နေတော့တာ။ ကိစ္စရှိမှ၊ ဧည့်သည်လာမှ၊ ထမင်းလက်ဆုံစားကြတော့မှပဲ သူတို့အခန်းထဲက မဖြစ်မနေထွက်လာကြတော့တယ်။ ဧည့်သည်လာတိုင်းလည်း “ဒါ သမီးအထွေးကလေးပေါ့ သိပ်လိမ္မာတာ၊ အမေအားအကိုးရဆုံး”လို့ မိတ်ဆက်ပေးတဲ့အခါ သမီးထွေးကိုကိုနဲ့ မမက နှာခေါင်းရှုံ့ ပုခုံးတွန့်လုပ်ပြတတ်လေရဲ့။ မေမေကတော့ ပြောမြဲပဲ၊ ဒါမှလည်း သမီးကိုကိုနဲ့ မမ သိတတ်နားလည်တတ်မယ်။ အိမ်ကို လုပ်ကူတတ်လာမယ်လို့ မေမေက ထင်တယ်လေ။ ဒီလိုနဲ့ပဲ သမီးထွေးဟာ သားသမီးအားလုံးထဲမှာ မေမေ့အတွက် အမောပြေစေခဲ့တဲ့သမီးလေး ဖြစ်လာခဲ့တယ်။  မေမေ့အနီးဆုံးလူ၊ မေမေ့လက်ရုံးဖြစ်လာခဲ့တယ်။

သမီးထွေး အပျိုပေါက်ကလေးဖြစ်အလာမှာတော့ သိသိသာသာ အလှသွေးကြွယ်လာခဲ့တယ်။ ပင်ကိုယ်ဖြူသူမို့ အနေအစားကောင်းကောင်းနဲ့ အဆင်အပြင်ကောင်းကောင်းပါ ပိုးလိုက်တဲ့အခါ သမီးထွေးဟာ ဖြူနုလှပသူကလေး၊ ဝင်းဝင်းစက်စက်ရှု့မငြီးသူကလေး ဖြစ်လာတော့တယ်။ ပိုးပန်းသူတွေလည်း ရှိလာပြီရယ်လို့ မေမေ့ကို လာပြောရင်း ရယ်မောနေတတ်တယ်။ ဖေဖေကတော့ သမီးထွေးကို တစ်ချက်ငဲ့ကြည့်ရင်း ဘာမှမပြောဘဲ တွေတွေငေးငေးသာ ရှိနေတတ်တယ်။ 

သမီးကိုကိုနဲ့ မမတို့နှစ်ယောက်လည်း အရင်ကလို သမီးထွေးအပေါ် အနိုင်ကျင့်ခိုင်းတာတွေ သိပ်မရှိတော့ဘူး။ အထူးသဖြင့် ကိုကိုကဆို ခပ်ရှောင်ရှောင်နေတာ သိသာလာတယ်။ သမီးထွေးက လူကောင်ထွားတာမို့ အသက်ကွာပေမဲ့ အလုံးအထည်တူတွေလိုဖြစ်လာတယ်။  မောင်နှမအရင်းတွေ မဟုတ်မှန်းလည်းသိထားတော့ အတူ ငယ်ရာက ကြီးလာတာပေမဲ့ အတွင်းစိတ်ထဲ စိမ်းနေသေးတာပဲလို့ မေမေသိနေတယ်။ 

တစ်နေ့မှာ အဲဒီအနေစိမ်းမှုဟာ မေမေတို့ မိသားစုဘဝထဲက သမီးထွေးကို ခွဲထွက်စေမယ်လို့ မေမေဘယ်လိုမှ ထင်မထား ခဲ့တာ….။ သမီးထွေးရယ်….။

(၄)

သမီးထွေးဆုံးဖြတ်လိုက်မှုအပေါ် ရုတ်တရက်မို့ မေမေ ရင်ကွဲမတတ်ဖြစ်ခဲ့ရတယ်။ သမီးထွေးကတော့ အထုပ်အပိုးပြင်ပြီး သိမ်းဆည်းပြီးဖြစ်နေခဲ့ပြီ။ နှုတ်ခမ်းတွေကို တင်းတင်းစေ့လို့ ခဏနေ လာခေါ်တော့မယ့် သူ့အဖေ အရင်းနောက် ပြန်လိုက် ဖို့ ပြင်နေရဲ့။

“သမီးထွေးရယ်၊  မေမေနဲ့ ခွဲနိူင်လို့လား ဟင်”

ဝိုင်းစက်နေတဲ့မျက်လုံးကြည်ကြည်ကြီးတွေကို ဝင့်လို့ ကျွန်မကို တစ်ချက်ကြည့်ပြီး သူ လုပ်စရာရှိတာကိုသာ ဆက်လုပ်နေတော့တယ်။

“သမီးပင်ပမ်းတော့မှာပေါ့ သမီးထွေးရယ်၊ အနေအထိုင် အစားအသောက် ငါ့သမီးနေတတ်ပါတော့မလားကွယ်”

သမီးထွေးက မေမေ့ကို မော့ကြည့်ရင်း “သမီးရရာအလုပ်လေးတစ်ခု ဝင်လုပ်ရမှာပေါ့၊ ခု သမီးဖေဖေက ကျန်းမာရေး သိပ်ကောင်းတာ မဟုတ်ဘူး၊ မမတို့ကလည်း သူ့အိမ်ထောင်နဲ့သူမို့ ဖေဖေ့ကို ဂရုမစိုက်နိူင်ဘူး မေမေရဲ့” တဲ့လေ။

“အေးပေါ့လေ၊ ဟိုက အဖေရင်းကိုး၊ အချိန်တန်တော့လည်း သွေးက စကားပြောတာနေမှာပေါ့” တဲ့ ဖေဖေက တစ်ခွန်းဝင်ပြောတော့ သမီးထွေးက စူးကနဲ ဖေဖေ့မျက်နှာကို တစ်ချက်စိုက်ကြည့်တယ်။ ဖေဖေက မျက်နှာလွှဲသွားတဲ့အခါ သမီးထွေးက ပြုံးတယ်။ တစ်မျိုးပဲ၊  အဲ့ဒီအပြုံးမျိုးကို မေမေ မကြိုက်ပါဘူး။ 

သမီးထွေးက ဖေဖေ့ကို ပခုံးကြောတွေ ဇက်ကြောတွေ ဆွဲပေး၊ နှိပ်ပေးလေ့ရှိတယ်။ သမီးထွေးလက်က လက်ပေါက်တာမို့ မေမေ့ကိုရော မမကိုပါ နှိပ်ပေးတတ်သေးတယ်။ သမီးဖေဖေက လုံးကြီးပေါက်လှ မွေးစားသမီး ဝင်းဝင်းစက်စက်ကလေးနဲ့ ပတ်ဝန်းကျင်အမြင် မသင့်တော်မှာစိုးလို့ဆိုပြီး သမီးထွေးနဲ့ ခပ်ခွာခွာနေလာတဲ့အခါမှာတော့ အကင်းပါးတဲ့ သမီးထွေးက ဝမ်းနည်းရှာတယ် ထင်ရဲ့။ သူကိုယ်တိုင်က အဖေကို ရှောင်ဖယ်ဖယ်လုပ်လာတတ်တော့တာ။

“ကိုကို အထွေး နှိပ်ပေးရမလား”လို့ သမီးထွေးက မေးတဲ့အခါ ကိုကိုက “မနှိပ်ချင်ပါဘူး၊ အသားနာတယ်”လို့ ရှောင်နေ တတ်တယ်။ အဲဒီလို ဖေဖေကရော ကိုကိုကပါ ခပ်ခွာခွာလုပ်လာတဲ့အပေါ် သမီးထွေးက ဝမ်းနည်းရှာတယ်။ နောက်တော့လည်း မသင့်တော်လို့ဆိုတာ သမီးထွေးကိုယ်တိုင် ချင့်ချိန်တတ်ခဲ့ပြီ ထင်ပါရဲ့။

ဘာပဲဖြစ်ဖြစ်ပါလေ၊ သမီးထွေးဟာ အသိအလိမ္မာပိုတဲ့အပြင် မေမေ့ကို အလိုက်တသိ ကူညီလုပ်ကိုင်ပေးတတ်တာမို့ အတူနေခဲ့စဉ်မှာ သားသမီးရင်းတွေဖြစ်တဲ့ ကိုကိုနဲ့မမနည်းတူ ချစ်သံယောဇဉ်ရှိရ၊ မေမေ့အတွက် သားသမီးရင်းတွေ ထက်တောင် အားလည်းကိုးခဲ့ရတာပါ။

မေမေ့စိတ်ထဲတော့ ပညာစုံကာမှ၊ လောက်လောက်လားလား အားထားစရာအရွယ်ရောက်လာကာမှ သမီးထွေးကို ပြန်လိုချင်တဲ့ သမီးထွေးမိဘရင်းတွေအပေါ် ငြိုငြင်စိတ်ဝင်မိသလို သားသမီးရင်းနဲ့ တန်းတူချစ်ပြခဲ့တာတောင် မေမေတို့ကိုထားသွားရက်တဲ့ သမီးထွေးအပေါ်လည်း စိတ်နာမိသလိုလို။ နောက်ဆုံးတော့ ဖေဖေပြောသလို သွေးက စကားပြောတာပါပဲကွာဆိုတာကိုသာ မျက်စေ့စုံမှိတ် နားဝင်ရတော့တယ်။
 
ဘာကြောင့်ရယ်လို့ သေချာမသိပေမဲ့ သူ့ကိုချစ်တဲ့မေမေနဲ့အတူ မိသားစုကိုပါခွဲလို့ မိဘရင်းတွေဆီ သမီးထွေး ပြန်လိုက်သွားခဲ့တာ သုံးနှစ်နီးပါးရှိခဲ့ပါပြီကော။ တခါတလေမှာတော့ အိပ်မက်တွေထဲ သားအမိတွေ ခါတိုင်းလို အတူတူချက်ကြပြုတ်ကြ၊ စားသောက်ကြတယ်လို့ မေမေမြင်မက်နေမိပါရဲ့ သမီးရယ်။

(၅)

“သမီးထွေး”

လုံးဝမျှော်လင့်မထားတာမို့ သမီးထွေးက မျက်လုံးဝိုင်းကြီးတွေနဲ့ တွေတွေလေးကြည့်ရှာတယ်။ ပြီးမှ မေမေ့ကို လက်ဆွဲပြီး အိမ်ကလေးထဲကို ခေါ်တယ်။ ဟိုးလွန်ခဲ့တဲ့ နှစ်ပေါင်း နှစ်ဆယ်လောက်က မေမေ့ဆီ လက်ကလေးကမ်းပေးရင်း ပြေးဝင်လာတဲ့ သမီးထွေးပုံရိပ်ကလေးကို မေမေမျက်စေ့ထဲ မြင်ယောင်နေမိတယ်။

ခုတော့ အကွာကြီး ကွာခြားခဲ့ပြီ။ မေမေက လက်ကမ်းပေးလို့ သမီးထွေးက ပြေးဝင်လာတဲ့ အခြေအနေမျိုး။

သမီးထွေးကို မေမေ အိပ်မက် မက်တယ်။ သမီးထွေးက လှလို့ ပလို့။ အိပ်မက်ထဲ လှလှပပမြင်မက်ရင် အပြင်မှာ နေထိုင်မကောင်းဖြစ်တတ်တယ်လို့ မေမေက ယုံကြည်လို့ အဲ့ဒီနေ့က မနက်အိပ်ရာနိုးကတည်းက သမီးထွေးမျက်နှာကို အာရုံမှာ ဖော်ရင်း မေတ္တာပို့ပေးနေမိတာ…

တိုက်တိုက်ဆိုင်ဆိုင်ပဲ ဖေဖေ့အလုပ်က သမီးထွေးတို့ တောင်ပေါ်ဘက်ကို ခရီးထွက်ဖို့ဖြစ်လာတဲ့အခါ မေမေပါ လိုက်ပါရစေလို့ ခွင့်တောင်းရင်း ဖေဖေနဲ့အတူလိုက်ဖြစ်ခဲ့တယ်။

“ဖေဖေရော”

“သမီးဖေဖေက မေမေ့ကို သမီးဆီဝင်ပို့ခဲ့ပြီး သူ့အလုပ်ကိစ္စဆက်သွားပြီ။ ညနေလာဝင်ခေါ်တော့ သမီးတွေ့ပါလိမ့်မယ်”

ပါးကလေးတွေချောင်လို့ သွယ်သွယ်ကလေးဖြစ်နေတဲ့ သမီးထွေးကိုကြည့်ရင်း မေမေစိတ်မကောင်းဖြစ်မိတယ်။ ဝတ်ထားတာလေးကလည်း ဖြူဖွေးသန့်စင်နေအောင် လျှော်ဖွတ်ထားပေမဲ့ အနွမ်းကလေးမှန်း သိသာလှတယ်။ သမီးထွေး ဘာတွေနဲ့များ စားနေရှာပါလိမ့်။ စိတ်မကောင်းဖြစ်လိုက်ရတာ သမီးထွေးရယ်။ 

သမီးထွေးကတော့ မေမေ့မျက်လုံးအကြည့်ထဲက ဂရုဏာတွေကို မမြင်မသိဟန်ဆောင်ရင်း လက်ရှိမှာ နေပျော်ပုံ ကြိုးစားပြရှာပါရဲ့။ ဘယ်လိုပဲ သမီးကြိုးစား ကြိုးစား၊ ကလေးခြောက်ယောက်နဲ့ တောင်ယာစိုက်စားတဲ့ မိဘနဲ့ ရွာမူလတန်းကျောင်းလေးမှာ ဆရာမဝင်လုပ်နေတဲ့ သမီးထွေးကလေးရဲ့ ရှာစာဖွေစာဟာ ဝမ်းဝတယ်ဆိုရင်တောင် ဘယ်လိုများ ခါးလှနိူင်ပါ့မလဲလေ။

“သမီးထွေး မေမေတို့နဲ့ ပြန်လိုက်ခဲ့ပါ့လား ဟင်၊ ဖေဖေ့အလုပ်မှာပဲ ဝင်လုပ်လေ၊ ဒီမှာ ရတာထက် သမီးလစာ ဆယ်ဆမက ရမှာ။ သမီးမိသားစုကိုလည်း ပိုထောက်ပံ့နိူင်တာပေါ့ သမီးရယ်။ ဟင် ပြန်လိုက်မလား သမီးထွေး”

သမီးထွေးက ခေါင်းကို သာသာခါရမ်းပြတယ်။ ပြန်မလိုက်ချင်ဘူးပေ့ါ နော် သမီးထွေး….။ သမီးထွေးအပေါ် ချစ်တဲ့စိတ်၊ လက်ပေါ်မှာတင် လူလားမြောက်ခဲ့ရတဲ့ သံယောဇဉ်တွေဟာ မေမေ့ကို ဒီလောက်နဲ့ လက်မလျှော့စေဘူး သမီး။

“ပြန်စဉ်းစားပါဦး သမီးရယ်၊  သမီးဘဝတက်လမ်း ရှိသေးတယ်လေ၊ နောက်ပြီး သမီး မောင်လေး၊ ညီမလေးတွေ ကျောင်းခေါ်ထားချင်ရင်လည်း မေမေတို့ စီစဉ်ပေးမှာပေါ့ နော် သမီး”

“ဟင့်အင်း သမီး ဆုံးဖြတ်ပြီးပြီ၊ မေမေတို့နဲ့ ဘယ်တော့မှ အတူပြန်မနေဘူး”

ရက်စက်လိုက်တာ၊  သမီးထွေးရဲ့ ပြတ်ပြတ်သားသား ငြင်းဆန်မှုမှာ မေမေနှလုံးကွဲမတတ်ခံစားရတဲ့အပြင် သမီးထွေး ဘာကြောင့် ခုလောက် ခါးခါးသည်းသည်း ငြင်းရတာပါလိမ့်ဆိုတဲ့ အတွေးဟာ မေမေ့ကို နားမလည်နိူင်မှုတွေနဲ့ စကားတင်းတင်း ဆိုမိစေတယ်။

“အေးပေါ့လေ သမီးထွေးရယ်၊ မေမေတို့က သမီးနဲ့ သွေးသားရင်းမှ မဟုတ်တာဘဲ နော်၊ မေမေ့ရင်က မွေးတဲ့ မေမေ့သွေး အရင်းမှ မဟုတ်တော့ သမီးက မေမေချစ်သလို၊ မေမေသံယောဇဉ်ရှိသလို ဘယ်သံယောဇဉ်ရှိပါ့မလဲ၊  ဟုတ်လား သမီး၊ ဟင် ဟုတ်သလား”

မေမေ့စကားတွေက သမီးထွေးရင်ကို တည့်တည့်ဝင်တိုက်မိတယ် ထင်ပါရဲ့၊ ပြောရင်းက မေမေ မျက်ရည် အကျမှာ မေမေ့မျက်နှာတည့်တည့်ကို သမီးထွေးမျက်ဝန်းအကြည့်တွေ ခပ်ရဲရဲ ပြန်ကြည့်ရင်း နှုတ်ခမ်းတွေ တဆတ်ဆတ်တုန်လို့ သမီးနှုတ်က စကားလုံးတွေ ကြွေကျလာခဲ့တယ်။

“မေမေတို့နဲ့ အတူနေကတည်းက မေမေ့အပေါ်၊ ဖေဖေ့အပေါ်၊ ကိုကိုနဲ့ မမအပေါ် မိသားစုဝင်တွေလို့ သမီးစိတ်ထဲ အရင်းအတိုင်း ခံစားချစ်ခင်ခဲ့ရတာ။ အားကိုတကြီး ချစ်ခဲ့ရတာပါ မေမေရယ်”

“ဒါနဲ့များ သမီးရယ်”

“အင်း၊ မေမေနားထောင်ပါဦးလေ၊ သမီး ပြောပြပါ့မယ်”

“မေမေကတော့ ဖေဖေပြောခဲ့တာတွေကို သိချင်မှ သိမယ်။ သမီးကို ကိုကိုနဲ့ ရင်းရင်းနှီးနှီး မနေဖို့၊ ကိုကို့ကို တစ်နေ့မှာ မြနဲ့ရွှေကွပ်သလို အဆင့်အတန်းတူနဲ့ရည်ရွယ်တာမို့ မဖြစ်သင့်တာတွေ မဖြစ်စေချင်တဲ့အကြောင်း၊ ကိုယ့်ဘဝ ကိုယ့်အခြေအနေကို မမေ့ဖို့အကြောင်းတွေ ပြောခဲ့တယ်”

 “ဖေဖေပြောသလိုပဲ သမီးနေပါတယ်။ ဒါပေမဲ့ နောက်ပိုင်းမှာ ဖေဖေ့မျက်လုံးအကြည့်တွေက သမီးအပေါ် စောင့်ကြည့်နေသလို ခံစားလာရတယ်။ သမီးက ဒီမိသားစုနဲ့ သွေးသားရင်းဖြစ်ဖို့၊ ဒီမိသားစု ပိုင်ဆိုင်သမျှ အမွေစား အမွေခံ ခွဲဝေပိုင်ဆိုင်ချင်လို့ အဲသလို အမြင်မျိုးနဲ့ သမီးအပေါ် အကြည့်တွေလွဲလာခဲ့ပြီလို့ သမီး သိခဲ့ပါတယ်”

ဘုရား ဘုရား၊ သမီးဖေဖေ တကယ်ပဲ ပြောရက်ခဲ့သလား၊ တကယ်ပဲ အဲသလို ပြုမူခဲ့ သလား။ ဖြူစင်ရိုးအလွန်းတဲ့ သမီးထွေးကလေး အဲဒီအချိန်က ဘယ်လိုများ ခံစားခဲ့ရပါ့မလဲလို့ မေမေ့ရင်ထဲ နင့်ကနဲ။ သမီးထွေး တိတ်တိတ်ကလေးများ ငိုနေခဲ့ရရှာမလား….။

“သမီး နေရတာ မပျော်တော့ဘူး မေမေ၊ မေမေသိပါတယ်။ သမီးက မေမေတို့မိသားစုနဲ့ ပတ်သက်ပိုင်ဆိုင်ခွင့်ဆိုလို့ သမီးနာမည်နောက်မှာ ဖေဖေ့နာမည်လေး ထည့်ခွင့်ရတာကိုပဲ မက်မောခဲ့တာ၊ ကြည်နူးခဲ့တာပါ မေမေရာ။ မေမေ သက်သာပါစေတော့ရယ်လို့ အိမ်အလုပ်တွေ ကူပေး၊ ကိုကိုနဲ့ မမအလုပ်တွေ၊ ဖေဖေ့အလုပ်တွေ ကူလုပ်ခွင့်ရနေတာကိုပဲ သမီးက ကြေနပ်နေခဲ့တာ”

“နောက်ပိုင်းမှာ သမီးကို ဖေဖေရော ကိုကိုပါ ရှောင်လာတယ်၊ သမီးက ကူလုပ်ပေးချင်ပေမဲ့ အမြင်တစ်မျိုးနဲ့ ကြည့်လာတတ်တော့ သမီးနေရတာ ခက်လာတယ်။ သမီး ခဏခဏ တိတ်တိတ်လေး ငိုရတယ်။ မေမေ မသိအောင်၊ မေမေသိရင် စိတ်မကောင်းဖြစ်မှာလည်း စိုးတယ်။ သမီးအတွက် ခက်ခဲလှတယ်မေမေ ရယ်။ မေမေတို့အိမ်မှာ နေရစားရတာ အကောင်းစားတွေချည်းပေမဲ့ သမီးလေ အမေ့တောင်ပေါ်အိမ်က ထမင်းကြမ်းနဲ့ ငါးပိဖုတ် စားရင်း နေချင်လည်း နေရပါစေတော့ရယ်လို့ တွေးမိလာခဲ့တယ်။ ဘဝမှာ စိတ်ချမ်းသာပျော်ရွှင်မှုထက် ဘယ်အရာကမှ အရေးမကြီးဘူးမဟုတ်လား မေမေ”

“အရင်းအချာမဟုတ်ပေမဲ့ မိသားစုဆိုတဲ့ သံယောဇဉ်အနှောင်အဖွဲ့ထဲမှာ နေပျော်ချင်တာတောင် တစ်ဘက်က သိသိသာသာဖြတ်တောက်လာတဲ့အခါ သမီးဘက်က ဘယ်လောက်ပဲဆက်ဆက်၊ အကောင်းအတိုင်း ပြန်မရနိူင်တော့ဘူး မဟုတ်လားမေမေရယ်။ မေမေ့ကို သမီး လွမ်းပါတယ်။ ခဏခဏ သတိရမိတယ်။ မေမေသိလား၊ မေမေ့ ပါတိတ်ထဘီအဟောင်းလေးတစ်ထည် သမီး ခွင့်မတောင်းဘဲ ယူလာခဲ့မိတယ်။ မေမေ့ကို လွမ်းတဲ့အခါတိုင်း သမီး ထုတ်ထုတ်ကြည့်မိတာ”

“မတောင်းဘဲနဲ့ယူလာခဲ့မိတဲ့ အဲဒီထမီလေးအစား သမီးအုံးအိပ်နေကျ ခေါင်းအုံးကလေး မေမေ့ကို အစားပြန်ပေး လိုက်ပါရစေ၊ အဲဒီခေါင်းအုံးကလေးမှာလေ သမီးမျက်ရည်တွေရှိတယ် သိလားမေမေ၊ မေမေ့ကို သတိရတိုင်း အဲဒီခေါင်းအုံးကလေးပေါ် သမီးမျက်ရည်ကျခဲ့ရတာ၊ မေမေယူသွားပါ နော်”

သမီး….၊ သမီးထွေးရယ်….။  မေမေ ဆက်နားထောင်နိုင်စွမ်း မရှိတော့ဘူး သမီးရယ်၊ တော်ပါတော့ တော်ပါတော့နော်၊ မေမေ အခြေအနေအားလုံးကို နားလည်ပါပြီကွယ်။ ဒါတွေကို တစ်အိမ်ထဲအတူနေပြီး မေမေဘာ့ကြောင့် မရိပ်မိရတာပါလိမ့်။ မေမေ့ကိုယ်ကိုသာ အပြစ်တင်နေမိတော့တယ်။ ဆယ်နှစ်ကျော်ကျော် အတူနေခဲ့တဲ့ သမီးထွေးအပေါ် ဖေဖေ ဘာကြောင့်များ ရက်စက်နိူင်ခဲ့ပါလိမ့်။ ကိုယ့်ရဲ့ သားသမီးအရွယ် သမီးငယ်တစ်ယောက်အပေါ် သွေးသားရင်းမဟုတ်ဘူးဆိုတဲ့ အသိရယ်၊ ပိုင်ဆိုင်မှုပစ္စည်းတွေများ ခွဲဝေပေးရနိူးဆိုတဲ့ စိုးစိတ်ရယ်ကြောင့်များ ဖေဖေ စိတ်ရိုင်းတွေ ဝင်ခဲ့လေသလား...

မေမေ့လက်က လက်စွပ်ကို ချွတ်ပြီး သမီးထွေးလက်ကလေးထဲ ဝတ်ပေးမိတော့ သမီးက မရဲတရဲ ငြင်းဆန်ရှာတယ်။ 

“ဒါ မေမေတို့ မျိုးရိုးစဉ်ဆက် လက်ဆင့်ကမ်းဝတ်ခဲ့တဲ့လက်စွပ်ပဲ သမီး၊ မမအိမ်ထောင်ကျတဲ့အခါ မေမေ လက်ဖွဲ့ဖို့ပေါ့။ ဒါပေမဲ့ သမီးထွေးကို မေမေ ဝတ်စေချင်လို့”

“ဟင့်အင်း သမီး မယူချင်ဘူး။ မယူပါရစေနဲ့ မေမေ၊ ကိုကိုနဲ့ ဖေဖေ့အမုန်းတွေ၊ အထင်လွဲမှုတွေနဲ့တင် လုံလောက်ပါပြီ။ မမအမုန်းတွေကို သမီး ထပ်မယူပါရစေနဲ့တော့၊ ဒါ သမီးရင်းဖြစ်တဲ့ မမရဲ့ရပိုင်ခွင့်ပါ။ ဒီလက်စွပ်ကို မမကိုသာ လက်ဖွဲ့လိုက် ပါ။ မေမေ ထမင်းစားလိုက်ပါဦးလေ၊ မနေ့က တောဝက်သား ရှားရှားပါးပါးရလာတာမို့ မေမေကံကောင်း တယ်။ မေမေကြိုက်တဲ့ ရှောက်ရွက်နုနုကလေးတွေ တို့စားရအောင် သမီး ခြံထဲသွားခူးလိုက်ဦးမယ်”

ပြောရင်းက သမီးထွေး အိမ်ပေါ်က ဆင်းသွားတယ်။ မေမေ သိတယ်။ အိမ်လှေကားပေါ်က အဆင်းမှာ သမီးထွေး လက်ကလေးတဖက် ဝင့်လို့ မျက်နှာကိုတို့သုတ်လိုက်ဟန်…. 

သမီးထွေး ငိုနေသလား ဟင်….။ မငိုပါနဲ့ မငိုပါနဲ့တော့ သမီးရယ်။ သမီးကို ဖေဖေ့ကိုယ်စား မေမေကပဲ တောင်းပန်ပါရစေ။ 

သမီးဟာ မေမေ့ရင်မှာ မပွင့်လန်း၊ မေမေ့သွေးနဲ့ မရေးခြယ်ခဲ့ပေမဲ့ မေမေ့နှလုံးသားထဲမှာ အမြဲပွင့်လန်းနေတော့မယ့် ပန်းကလေးတစ်ပွင့်၊ မေမေ့နှလုံးသားမြေဆီလွှာပေါ်မှာ အမြဲရှင်သန်နေတော့မယ့် မနွမ်းပန်းလေးတစ်ပွင့်ပါ သမီးရယ်....



Friday, September 20, 2013

ပြည့်စုံခြင်း မပြည့်စုံခြင်း

"ဒီတစ်နှစ်ရော ကျပြန်ပြီလား၊  တော်ပြီ နင့်ကို ဒီနှစ်တော့ စာသင်ဝိုင်းက ထုတ်တော့မယ်"

"အမေ့သမီးက အလှအပပဲ မက်နေတာကိုး အမေရဲ့၊ ထုတ်ပစ်လိုက် အမေ။ သူ့အတွက်ကုန်မဲ့ပိုက်ဆံ သားကို ဂစ်တာ ဝယ်ပေး နော် အမေ"

"အောင်မာ ကိုကိုနော်၊  နင့်လိုရည်းစားတွေ ပွနေတယ်များ မှတ်လား၊ ညီမလေးက ကိုယ့်ဖာသာကိုယ် လှချင်တာသက်သက်ပဲ"

"တော်ကြစမ်း နင်တို့ နှစ်ကောင်လုံး၊ ခဏနေ နင်တို့အဖေလာမှ နင်တို့အဖေနဲ့ တိုင်မယ်။ နင်တို့က အဖေပဲ အသက်ရှိတယ် ထင်ကြတာ"

"ဟမ် အမေကလည်း...."

"ဟဲ့ အိမ်ရှေ့မှာ လူသံကြားတယ် သွားကြည့်စမ်း"

"အမေ အမေခေါ်ထားတာဆို၊  မီးပူတိုက်ဖို့ တဲ့"

"အော် အေး  အေး၊  ဟုတ်သားပဲ...။  လာ  လာ ညီမ။ ခဏလေး နားပါဦး၊ ရေလေးဘာလေး သောက်၊  ပြီးမှ မီးပူတိုက်တာပေါ့"

"ရတယ် အစ်မ၊ မနားတော့ပါဘူး။ တိုက်စရာရှိတာတွေသာ ပေးပါ၊ ကျွန်မ အိမ်အစောပြန်ချင်လို့"

"ဟုတ်လား အေး အေး၊ ဒါဆိုလည်း တိုက်လေ"

@@@@@@@@@@

"ဘယ်လောက်ပေးရမလဲ ညီမ"

"အစ်မပဲ ကြည့်ပေးပါ အစ်မရယ်"

"ရော့ ဒါဆိုလည်း နှစ်ထောင်ယူလိုက် နော်၊ နည်းသလား၊ တိုက်ရတဲ့ အဝတ်တွေနဲ့စာရင် အစ်မပေးတာ နည်းများနေသလား"

"ရပါတယ် အစ်မ၊ မနည်းပါဘူး။ ကျွန်မယောကျာ်း တစ်နေ့လုံး ဆိုက်ကားနင်းတာ အုံနာခ တစ်ထောင်ပေးပြီးရင် ကိုယ့်အတွက် နှစ်ထောင်လောက် ကျန်တာ။ ကျွန်မက ခု နေ့ဝက်တောင်မရှိသေးဘူး၊ မီးပူတိုက်ခ နှစ်ထောင်ရတာလေ အစ်မရဲ့"

"ဟင်  လောက်သလား၊  ညီမယောကျာ်းရတဲ့ ပိုက်ဆံနဲ့ ညီမရတဲ့ပိုက်ဆံပေါင်းရင်တောင် တစ်နေ့လေးထောင်ပဲ ရှိတဲ့ဟာ...."

"ဘယ်လောက်ပါ့မလဲ အစ်မရယ်။  ဒါတောင် ယောကျာ်းက ကျွန်မကို လုပ်စေချင်တာ မဟုတ်ဘူး။ ကျွန်မမှ မလုပ်ရင်လည်း ကျွန်မကလေးတွေ ငတ်ရုံရှိတာအစ်မရယ်။ ဒီတော့ ဒီလိုပဲ ကျဘမ်းအလုပ်လေးတွေ သူများအိမ်တွေမှာ လုပ်ရတော့တာပေါ့။  ပေါင်နှံချေးငှားသင့်ရင်လည်း ချေးငှားရတာပေါ့"

"ထမင်းစားသွားပါလား ညီမ"

"ဟင့်အင်း မစားတော့ပါဘူး အစ်မရယ်"


"ကဲပါ ဒါဆိုလည်း ညီမကလေးတွေစားဖို့ ယူသွား"

"ယူမသွားတော့ဘူး အစ်မ။  ကျွန်မသမီးလေး ဆယ်တန်းကို ဂုဏ်ထူး လေးဘာသာနဲ့ အောင်တယ် အစ်မရဲ့၊  အဲဒါ သူ့အဖေက စောစောပြန်လာခဲ့ဖို့ မှာတယ်။ အပြန်ကို ခေါက်ဆွဲကြော်ဝယ်ခဲ့မယ်တဲ့၊ မိသားစု ထမင်းလက်စုံ စားကြရအောင်လို့လေ။ ပြန်တော့မယ် နော် အစ်မ၊ ကျေးဇူးတင်ပါတယ်။ နောက်လည်း အဝတ်လျှော်စရာ၊  မီးပူတိုက်စရာ ရှိရင် ခေါ်နော် အစ်မ"




Monday, September 16, 2013

ဒေါက်ဖိနပ်စီးခြင်း အနုပညာ (သို့) အမြင့်၌ တည်အောင်နေခြင်း



အမျိုးသမီးအတော်များများ ဒေါက်ဖိနပ်စီးဖူးကြပါလိမ့်မည်။ ဒေါက်မြင့်ဖိနပ်မကြိုက်၍ ဖိနပ်အပါးစီးသူများမှ လွဲပြီး ကျန်အမျိုးသမီးများအားလုံးပင် တစ်လက်မ၊  နှစ်လက်မမှသည် ခြောက်လက်မခန့်ထိမြင့်သော ဒေါက်မြင့်ဖိနပ်များကို စီးဖူးကြလိမ့်မည်။ သာမန်အမျိုးသမီးများအတွက်မူ တစ်လက်မမှ လေးလက်မမြင့်သော ဒေါက်မြင့်ဖိနပ်များကို အစီးများကာ မော်ဒယ်များ၊ အလှမယ်များ၊ စင်ပေါ်တက် လူလုံးထွက်အလှပြသည့်အလုပ်ကို လုပ်ကြရသော အမျိုးသမီးများမှာမူ လေးလက်မနှင့်အထက် ငါးလက်မ၊ ခြောက်လက်မစသည့် မြင့်လွန်းသောဒေါက်ဖိနပ်များကို ဟန်ချက်ညီညီစီးကျင့်ရှိအောင် ကျင့်လျှက် မဖြစ်မနေစီးကြရသည်သာ။ ဒေါက်မြင့်ဖိနပ်မှ ပေးသော အနာတရများကိုလည်း မခုံမင်သည့်တိုင် ရွေးချယ်စရာမရှိသည့်အလျှောက် အနာခံကာ စီးကြရမြဲပင်ဖြစ်သည်။

ထိုအခါ ဒေါက်မြင့်ဖိနပ်များနှင့် ပတ်သက်သည့် အမျိုးသမီးတို့၏ ခံယူစိတ်ထားများမှာ စိတ်ဝင်စားဖွယ်ရာဖြစ်လာတော့သည်။ အသက်မွေးဝမ်းကြောင်းအတွက် မဖြစ်မနေစီးရသော အမျိုးသမီးများမှ လွဲ၍ ကျန်အမျိုးသမီးများကို လက်လှမ်းမီသလောက် ကျွန်မ မေးမြန်းကြည့်မိပါသည်။

“ဒေါက်မြင့်ဖိနပ်စီးရမှ လူက ပိုပြီး ကိုယ်နေဟန်ကျော့ရှင်းသလို ခံစားရတယ်”

“ဒေါက်မြင့်ဖိနပ်စီးမှ လမ်းလျှောက်ရတာ ကြွကြွရွရွလေးရှိတယ်လို့ ခံစားရတယ်။ ဖိနပ်အပါးစီးရင် လူက နောက်ပြန်လန်ကျတော့မလိုလို ခြေလှမ်းတွေက နောက်ပြန်ဆွဲနေသလိုမျိုး”

“ဒေါက်မြင့်ဖိနပ်စီးမှ ရင်လေးချီ၊ တင်လေးစွင့်ပြီး လမ်းလျှောက်ရတာ ယုံကြည်မှု ပိုရစေတယ်။ ကိုယ့်ကိုယ်ကိုလည်း ပိုလှတယ်လို့ ခံစားမိစေတယ်”

“အရပ်ပုသူမို့ ဒေါက်မြင့်ဖိနပ်စီးမှပဲ ကိုယ်လုံးလေးက သွယ်လျသွားသလိုလိုမို့ အမြဲစီးလေ့ရှိတယ်”

“အရပ်မြင့်ပေမဲ့ ဒေါက်မြင့်ဖိနပ်စီးလိုက်မှ တစ်ခြားသူတွေထက် ခေါင်းတစ်လုံး ပိုမြင့်သွားသလိုခံစားရတယ်။ လူတွေကို အပေါ်စီးက မြင်ရတာ သဘောကျတယ်”

အမျိုးသမီးများမှာ သည်လို သဘောထားအမျိုးမျိုးနှင့် ဒေါက်မြင့်ဖိနပ်များကို တစွဲတလမ်းစီးလေ့ရှိကြသည်။

အချစ်နှင့် ဒေါက်မြင့်ဖိနပ်

ဒေါက်မြင့်ဖိနပ်များစီးခြင်းကြောင့် ဟန်ချက်လွဲ၍ ခြေချော်လဲလျှင်တောင် ခြေထောက်နာတုန်းခဏ မစီးနိူင်ခင်သာ ပစ်ထားလိုက်မည်၊ ခြေနာပျောက်ပါက ပြန်လည် စီးမြဲစီးကြမည်။ ကျွန်မသည် ဒေါက်မြင့်ဖိနပ်ကြောင့် ခြေဆစ်လွဲ၍ အနာကြီးနာကာ လမ်းမလျှောက်နိူင်ဖြစ်ခဲ့ဖူးသော်လည်း ခြေနာပျောက်သည်နှင့် စိတ်မနာနိူင်ဘဲ ဒေါက်မြင့်ဖိနပ်လေးကို တယုတယ ပြန်လည်စီးမိသည်သာ။ ဤသည်မှာ တစ်ကြိမ်တစ်ခါမျှလည်း မကပါပေ။

သည်တော့ကျွန်မအတွက် ဒေါက်မြင့်ဖိနပ်သည် ချစ်ရလွန်းသူနှင့် တူလှသည်။ ပမာနှိုင်းပြရလျှင် ချစ်သူက မည်မျှပင် စိတ်နာအောင် ဆိုးလွန်းသည်ဖြစ်စေ၊  စိတ်နာစဉ်ခဏသာ မုန်းသလိုလိုဖြစ်မိသော်လည်း စိတ်ပြေသည်နှင့် အချစ်တို့ ခေါင်းထောင်ထကာ ချစ်သူအပေါ် အရင်လို ချစ်မြဲတည်း။

လက်တွေ့ဘဝနှင့် ဒေါက်မြင့်ဖိနပ်

လက်တွေ့ဘဝ၌ အောင်မြင်နေသူများအား ဒေါက်မြင့်ဖိနပ်ကို ပိုင်နိူင်ကျွမ်းကျင်စွာ စီးနင်းကာ အများသူထက် ခေါင်းတစ်လုံးအမြင့်ရောက်နေသူများနှင့် တူသည်ဟု ဆိုချင်ပါသေးသည်။
ဒေါက်မြင့်ဖိနပ်များတွင် ဒေါက်ချိုးထားပုံများကို သေချာလေ့လာကြည့်လျင် မြင့်ရင်ပြီးရောဟူ၍ အမြင့်ချိုးထားခြင်း မဟုတ်ဘဲ ဒေါက်ပုံသဏ္ဍာန်အနေအထားများ တစ်ရံနှင့် တစ်ရံ ကွဲပြားနေကြသည်ကို တွေ့ရမည်။ တစ်ချို့မှာ ပန်စယ်လ်ဟီးလ်ဟု ခေါ်သော ခဲတံချွန်ပုံ အမြင့်ဖြစ်သည်။ စီးရခက်သည်။ ခြေထောက်ကို ဖနောင့်ပေါ်တွင် အားမထည့်ဘဲ ခြေဖမိုးပေါ်အားပြုစီးရသော အမျိုးအစားမို့ (ခြေဖျားထောက်ထားရသလို) စီးရတာ ပင်ပမ်းသော ဒေါက်မျိုးဖြစ်သည်။ သို့သော် အမြင်လှသည်။ ဆွဲဆောင်မှုရှိသည်၊ ချွန်မြသော ဒေါက်ကလေးပေါ်တွင် တစ်ကိုယ်လုံး၏ ဟန်ချက်ကို တည်ကာ လှလှပပကလေး စီးရသော ပွဲတက်အမျိုးအစား ဖိနပ်မျိုးဖြစ်သည်။ စွန့်စားလိုသော ဘဝဖြတ်သန်းမှုပိုင်ရှင်များနှင့် တူသည်။ Do or Die သေသေရှင်ရှင် စွန့်လုပ်ရသော အနေအထားရှိသည်ဆိုကာမူ ရှင်လျှင် ရွှေထီးဆိုသလိုပါပေ။

နောက်တစ်မျိုးမှာ ပလက်ဖောင်းဟီးလ်ဟု ခေါ်သော ခုံအထူစား ဒေါက်ပုံစံအတုံးလိုက်ကြီး ဖြစ်သည်။ လဲကျခဲသည်။ ပို၍ မြဲမြံသည်။ ခြေဖမိုးထက် ခြေဖနောင့်ပေါ်အားပြုကာ စိတ်ချလက်ချစီးနိူင်သော ဖိနပ်မျိုး။ ထိုအမျိုးအစားမှာ စွန့်စားရခြင်းနည်း၍ အမြတ်ပြန်အရလည်း နည်းသော၊ ဖြည်းဖြည်းသာသာ အေးအေးချမ်းချမ်းနှင့် ပုံမှန်လည်ပတ်မှုကိုသာ လိုလားသော၊  စိမ်ခေါ်မှုကို မလိုလားသော ဘဝပိုင်ရှင်များနှင့် တူလေသည်။

ဒေါက်မြင့်ဖိနပ်နှင့် လက်တွေ့ဘဝထဲက အနိမ့်အမြင့်ရွေးချယ်မှု

ဒေါက်အနိမ့်အမြင့်ပေါ် မူတည်၍ တစ်ပါးသူများအား အပေါ်မှ စီးမိုးမြင်ရမည့် မြင်ကွင်းချင်းလည်း ကွာခြားပေမည်။
သေချာသည်ကတော့ မြင့်မြင့်စီးလျှင် လူပင်ပမ်းပြီး နိမ့်နိမ့်စီးလျှင် လူသက်သာမည်။ ပို၍မြင့်မြင့်စီးနိူင်လေ၊  ခေါင်းတစ်လုံးစာမက ပို၍အပေါ်စီးမှ မြင်နိူင်လေ။ လက်တွေ့ဘဝတွင်လည်း ထို့အတူပင် စိမ်ခေါ်မှု၊ စိတ်ဖိအား၊ စွန့်စားမှု များများလက်ခံယူနိူင်လေလေ အမြင့်သို့ရောက်ရန် သူတစ်ပါးထက် အခွင့်အလန်းပိုလေလေ၊ ပို၍နာကျင်လေလေ ဖြစ်မည်။  

ဒေါက်မြင့်ဖိနပ်နှင့် တစ်နေ့လုံး သွားလာလှုပ်ရှားခဲ့သမျှ အိမ်ပြန်ရောက်မှ တောင့်တင်းနာကျင်နေသော ခြေသလုံး ကြွက်သားကို ရေနွေးစိမ်၍ နှိပ်နယ်ခြင်း၊ အနှိပ်ဆီတစ်မျိုးမျိုးလူးပြီး နှိပ်နယ်ပေးခြင်း စသည်များ ပြုလုပ်ပေးကာ ခြေထောက် အညောင်းအညာ ပြေစေရသည်။ သို့မှသာ  နောက်တစ်နေ့မှာ နောက်ထပ်တစ်ကြိမ် စီးရန် အဆင်သင့်ဖြစ်နေမည်။ 

လက်တွေ့ဘဝတွင်လည်း ထို့အတူပေ၊ အမြင့်မှာနေလို၍ သူတစ်ကာထက် မြင့်မြင့်မြင်နိူင်ပြီဆိုလျှင် ထိုအမြင့်တွင် မြဲရန် အားထုတ်မှု လိုပေသေးသည်။ သည်တစ်ကြိမ်အောင်မြင်ပြီးသော်လည်း ရပ်တန့်မနေဘဲ နောက်တစ်ကြိမ်အောင်မြင်မှုအတွက် အားဖြည့်ရမည်။ မိမိလုပ်ဆောင်မှုအပေါ် ပြန်လည်ကြည့်မြင်သုံးသပ်မှုများ အမြဲတစေရှိနေရန်လိုအပ်ပြီး ပိုမို တိုးတက်အောင်မြင်ရေးအတွက် အခါမလပ် ကြံဆနေရမည်သာ။

မိမိကိုယ်တိုင်ရွေးချယ်ဖြတ်သန်းမည့် ဘဝပုံစံအတိုင်း ရွေးချယ်စီးနင်းသည့် ဒေါက်အနိမ့်အမြင့်ကွဲပြားသွားကာ ရရှိလာမည့် နေရာအနိမ့်အမြင့်၊ မြင်တွေ့ခံစားရရမည့် မြင်ကွင်း စသည်များ ခြားနားမည်ပေ။ မတော်တဆ ခြေချော်လက်ချော် လဲခဲ့သည်ရှိသော် ထိုင်မှိုင်မနေဘဲ နောက်တစ်ကြိမ် ပြန်လည်ထူမတ်ရန် နည်းလမ်းရှာ အားမွေးရမည်။

ဘဝဖြတ်သန်းမှုတစ်ခုရလာခိုက် လူများ၏နေထိုင်မှုဘဝပုံစံသည် ဒေါက်ဖိနပ်စီးသူများနှင့်တူလှကာ ဒေါက်နိမ့်နိမ့်စီး၍ သက်သက်သာသာ အေးဆေးနေလိုသည်ဖြစ်စေ၊ ဒေါက်မြင့်မြင့်စီး၍ အများထက် ခေါင်းတစ်လုံး သာလွန်ချင်သည် ဖြစ်စေ အားထုတ်မှု အနည်းနှင့်အများတော့ လိုအပ်သည်ပင်။