Monday, October 29, 2012

အလုပ်ခွင်ထဲမှာ

ဘယ်သူမဆို တစ်နေ့နေ့မှာတော့ ကျောင်းနေစဉ်အရွယ်လွန်မြောက်ပြီးရင် အသက်မွေးဝမ်းကြောင်း အတွက် ကိုယ်စီလုပ်ငန်းခွင်ကို ၀င်ကြရမှာပါ။ မိဘလက်ငုတ်လက်ရင်း ဆက်လက်လုပ်ကိုင်သူတွေက လွဲရင်ပေါ့ရှင်။ အဲဒီအခါ လုပ်ငန်းခွင်ထဲမှာ တစ်သားတည်း ကျအောင် နေတတ်ထိုင်တတ်ကြဖို့ လိုလာပါပြီ။ လုပ်ငန်းခွင်ထဲမှာ သေချာပေါက် ကြုံတွေ့ရမှာတွေက နှစ်ပိုင်းရှိပါတယ်။ မိမိလုပ်ရမဲ့ အလုပ်ကို ကျွမ်းကျင်နားလည်ဖို့ (Dealing with your job) နဲ့ လုပ်ဖော်ကိုင်ဘက်တွေနဲ့ အဆင်တပြေပေါင်းသင်းဆက်ဆံနိူင်ဖို့ (Get along well with your colleagues) ပါ။

ပထမတစ်ခုဖြစ်တဲ့ မိမိလုပ်ရမဲ့အလုပ်ကို ကျွမ်းကျင်နားလည်ဖို့ဆိုတာ အလုပ်ခွင်ကို ပထမဆုံး စဝင်တော့မဲ့သူတိုင်း ကြုံတွေ့ရမဲ့ကိစ္စဖြစ်ပြီး အလုပ်ခွင်စိမ်ခေါ်မှုတွေဟာ လူသစ်တစ်ယောက်အတွက်တော့ တကယ့်ကို စိတ်လှုပ်ရှားစရာ ကောင်းနေမှာပါပဲ။ အဲဒီနေရာမှာ သူဟာ ကျောင်းတုန်းက လေ့လာသင်ယူခဲ့မှုတွေနဲ့ သူ တာဝန်ယူရမဲ့လုပ်ငန်းဆောင်တာတွေကို ပြန်လည်တိုက်ဆိုင် ကြည့်နေတတ်ပါတယ်။ များသောအားဖြင့်တော့ စာသင်ခန်းထဲက သင်ယူလာခဲ့ကြတာတွေနဲ့ အလုပ်ခွင်မှာ လက်တွေ့ပြန်လည် အသုံးချတဲ့အခါ အနည်းနဲ့အများဆိုသလို ကွာခြားနေတတ်ကြပါတယ်။

အထူးသဖြင့် စာရင်းနဲ့ ပတ်သက်တဲ့အလုပ်တွေဆို ပိုသိသာပါတယ်။ ဘယ်လို အလုပ်မျိုးမှာမဆို စာရင်းဋ္ဌာနရှိနေတာမို့ စာရင်းနဲ့ ပတ်သက်တဲ့ အလုပ်အခြေခံသဘောတွေက တူညီနေကြပေမဲ့ အလုပ်သဘာဝ (Industry Nature) ကွဲပြားသွားတဲ့အခါမှာ အဲဒီ့အလုပ်ရဲ့ သဘောသဘာဝကို နားလည်အောင် အရင်ကြိုးစားရတဲ့ အလုပ်အပေါ်ပဏာမနားလည်မှု (Prior understanding on Nature of Industry) လိုလာပါတယ်။

ဥမမာပေးရရင် ကျွန်မ ပထမဦးဆုံးဝင်ခဲ့တဲ့ အလုပ်က International Freight Forwarding လို့ခေါ်တဲ့ နိူင်ငံတကာကို ကုန်ပစ္စည်းအမြန်ပို့ဆောင်ပေးတဲ့ ကုမ္ပဏီတစ်ခုမှာပါ။ အကြမ်းပြောရရင် စာရင်းမှာ ပေးရန်ရှိစာရင်း (Accounts Payable)နဲ့ ရရန်ရှိစာရင်း (Accounts Receivable) ရယ်လို့ နှစ်မျိုးရှိတဲ့အနက်မှာ ကျွန်မက ရရန်ရှိစာရင်းကိုင်ရတာမို့ ကုမ္ပဏီရဲ့ အဓိက ဖောက်သည် (Major customers)တွေနဲ့ နေ့စဉ် ဆက်ဆံပြောဆိုနေရပါတော့တယ်။  သူတို့လိုအပ်တဲ့ စာရွက်စာတမ်းတွေတောင်းဆိုလာတဲ့အခါမှာ ဖြစ်စေ၊ ကိုယ်က ငွေတောင်းတဲ့အခါမှာ ဖြစ်စေ လုပ်ငန်းနဲ့ဆိုင်တဲ့ စာရွက်စာတမ်း၊ အသုံးအနှုန်းစတာတွေကို ယဉ်ပါးကျွမ်းဝင်အောင် အရင်လေ့လာဖို့လိုလာပါတယ်။

တကယ်တမ်း ကျွန်မလုပ်ရမဲ့ paper works အလုပ်တွေကို ကျွန်မနိူင်နင်းပေမဲ့ သူတို့ လုပ်ငန်းသုံးစကား (Industrial terms) တွေကို အတော်လေး လေ့လာခဲ့ရတာပါ။ ဆိုပါတော့ COO-Certificate Of Origin ဆိုရင် ပစ္စည်းတစ်ခုရဲ့ ဇစ်မြစ် ဘယ်ကဝင်လာတယ် ဆိုတာကို ပြောတာ။ B/L ဆိုတာ Bill of Lading၊ COD ဆိုရင် Collect /Cash On Delivery အဲသလို ကျွန်မတို့ နားယဉ်မနေတဲ့အခေါ်အဝေါ်တွေ အများကြီး ရှိနေပါတယ်။ အများကြီးကို ရှိနေပါသေးတယ်။ ဒါတွေဟာ ကြာလာရင် သိလာမှာပါ ဆိုပေမဲ့ လူတွေနဲ့ တိုက်ရိုက်ဆက်ဆံရတဲ့ ကျွန်မတို့လိုအလုပ်မျိုးကျတော့ အလုပ်ခွင်စဝင်တာနဲ့ သူပြောတာကိုယ်သိနေဖို့ လိုကို လိုအပ်ပါတယ်။

အဲဒီစာရွက်စာတမ်းတွေကို ဘယ်လိုခေါ်ဝေါ်တယ်၊ ဘယ်လိုပုံစံရှိတယ်ဆိုတာတွေ  မှတ်သားရတဲ့ အလုပ်က အရင်လာပါတယ်။ ပထမတော့ ဘာတွေမှန်းနားမလည်နိူင်ဘဲ အတော်လေး စိတ်ပျက်သွားမိတာပါပဲ။ နောက်တော့ သူများတွေ ၆နာရီ ရုံးဆင်းချိန်ပြန်လို့မှ ကိုယ်က မပြန်နိူင်သေးဘဲ နောက်ချန်နေခဲ့၊ စာရွက်စာတမ်းတွေ မွှေနှောက်ဖတ်၊ ဖိုင်အဟောင်းတွေ ပြန်ရှာဖတ်နဲ့ တကယ်လုပ်ရမဲ့ အလုပ်ကို ဘေးခဏထားပြီး သူတို့အခေါ်အဝေါ်တွေ အရင် လေ့လာနေခဲ့ရပါတယ်။ ကျွန်မဆိုချင်တာက ကိုယ်တတ်ထားတဲ့ ပညာကို တန်းပြီး မသုံးရသေးခင် အလုပ်မှာ အံဝင်ခွင်ကျဖြစ်အောင် အရင်လုပ်ရတယ်ဆိုတာရယ် အဲဒါမျိုးကြုံရတဲ့အခါ စိတ်မပျက်ဖို့ရယ်ပါ။

အဲဒီအခေါ်အဝေါ်တွေနဲ့ အသားကျသွားပြီဆိုတော့မှ အဓိကတာဝန်ယူထားရတဲ့ ဖောက်သည်တွေရဲ့ အကြောကို ဖမ်းမိအောင် ကြိုးစားရပါတယ်။ ကျွန်မပြောခဲ့သလိုပါပဲ၊ ကျွန်မအလုပ်က ရရန်ရှိစာရင်းဖြစ်တာမို့ ကုမ္ပဏီက အကြွေးရောင်းထားတဲ့ ဖောက်သည်တွေဆီကနေ ပိုက်ဆံရအောင် ပြန်တောင်းရပါတယ်။ အဲဒီနေရာမှာ လူအမျိုးမျိုး စိတ်အထွေထွေမို့ လူပေါင်းစုံရဲ့ ဆင်ခြေပေါင်းစုံ၊ အပြောချိုချို အပြောဆိုးဆိုး စတာတွေနဲ့ နေ့စဉ်ကြုံတွေ့ခဲ့ရပါတယ်။

နည်းနည်းလေးကြာလာတဲ့အခါ သူတို့တွေရဲ့ အထာကို တီးမိခေါက်မိရှိလာတယ်။ တစ်ချို့က မနက်ဘက် ဖုန်းခေါ်အကြွေးတောင်းရင် မကြိုက်ဘူး၊ တစ်ချို့က ချော့တောင်းမှ ရတယ်၊ တစ်ချို့က ခပ်ငေါက်ငေါက်တောင်းမှ ရတယ်၊ တစ်ချို့က လလယ်လောက်မှ တောင်းလို့ရတယ်၊ တစ်ချို့က လမကုန်ခင်တစ်ပတ် သူတို့ စာရင်းပိတ်ခါနီးမှာ သတိပေးမှ ကြိုက်တယ်။ အဲသလို သူတို့အထာလေးတွေကို မှတ်သားထားရတယ်။ ဒီလိုဆိုတော့လည်း အလွယ်လေးပဲ ထင်စရာရယ်။ ဒါပေမဲ့ သူများပိုက်ဆံအိတ်ထဲက ငွေကို ကိုယ့်ပေးချင်အောင်လုပ်ရတာ တယ်မလွယ်လှပါဘူး။

ကျွန်မလည်း စိတ်နဲ့ပဲမို့ တစ်ခါတစ်လေတော့ စိတ်တို ဒေါသထွက်မိပါတယ်။ ပိုက်ဆံအကြွေးတောင်းဖို့ ဖုန်းခေါ်တဲ့အခါ သိသိကြီးနဲ့ အသံကို မှတ်မိနေရက်နဲ့ မရှိဘူး အပြင်သွားတယ် ဗြောင်လိမ်ခံရတာမျိုး ကြုံရလေ့ရှိတယ်။ တစ်ချို့ကျတော့လည်း ပိုက်ဆံမလည်သေးလို့၊ ရစရာရှိတဲ့ ငွေမဝင်သေးလို့ မပေးနိူင်သေးဘူး ဗြောင်ပဲ ငြင်းတတ်ကြပါတယ်။ တစ်ခါတစ်လေဆို နားလည်လို့ရပေမဲ့ အမြဲတမ်း ဆိုရင်တော့ စိုးရိမ်လာရပါပြီ။ အဲဒါမျိုးဆိုရင် သူတို့ကုမ္ပဏီရဲ့ ငွေကြေးလည်ပတ်နေမှုကို စုံစမ်းဖို့ လိုလာတဲ့အတွက် အထက်ကို သတင်းပို့ရပါတယ်။ သူတို့ရဲ့ အခက်အခဲဟာ ဘာဆိုတာ သိအောင်မေးမြန်းရပါတယ်။ ဘာဆက်လုပ်မလဲ အရစ်ကျစံနစ်နဲ့ ငွေပေးချေဖို့ ညှိနှိုင်းမလား၊ သူတို့ကို ဝန်ဆောင်မှုပေးနေတဲ့ လစဉ်အရောင်းတန်ဘိုးကို လျှော့ချမလားဆိုတာတွေကို မန်နေဂျာနဲ့ အစည်းအဝေးခေါ်ပြီး ဆုံးဖြတ်ချက်ချကြရပါတယ်။ များသောအားဖြင့်တော့ အရစ်ကျပေးတာနဲ့ အဆင်ပြေသွားတတ်ပါတယ်။

ကျွန်မဆက်ဆံနေရတဲ့ ဖောက်သည်တွေက စင်္ကာပူအပြင် တစ်ခြားနိူင်ငံတကာလည်း ပါဝင်တာမို့ ဖုန်းနဲ့ချည်းပဲ ခေါ်မနေနိူင်ဘဲ မေးလ်နဲ့  ဖက်စ်နဲ့ ပို့ပြီး ငွေတောင်းရတာတွေလည်း ရှိပါတယ်။ အဲဒီလို မေးလ်နဲ့ ဖက်စ်နဲ့ တောင်းတဲ့နေရာမှာ ပထမအဆင့် (ပုံမှန်) တောင်းခံတဲ့ စာ၊  ဒုတိယအဆင့် သတိပေးစာ၊ တတိယအဆင့် ထပ်မံ သတိပေးစာနဲ့ နောက်ဆုံးအဆင့် (Final reminder) တွေဆိုပြီး အဆင့်ဆင့် တိုးမြှင့်တောင်းခံသွားရပါတယ်။ နောက်ဆုံးအဆင့်မှာတော့ စာသားတွေက နည်းနည်းမာလာတဲ့ စာသားတွေ ဖြစ်လာပါပြီ။ ဘယ်နှစ်ရက်အတွင်း မပေးရင်ဖြင့် လက်ရှိဝန်ဆောင်မှုပေးနေတာတွေကို ဖြတ်တောက်မယ်၊ ပြီးရင် တရားဥပဒေအရ တင်ရှိနေတဲ့အကြွေးကို ပြန်လည်တောင်းခံရယူမယ် စတာတွေ ပါလာပါပြီ။ အဲသလိုမှ တစ်ဘက်က ဘာမှ ပြန်မလာဘူးဆိုရင်တော့ ဖုန်းခေါ်ရပါတယ်။ ဖုန်းခေါ်တဲ့အခါ ကျွန်မတစ်ယောက်ထဲ မဟုတ်ဘဲ မန်နေဂျာရော အရောင်းဝန်ထမ်းနဲ့ပါ ကွန်ဖရန့်ကောလ်ခေါ်ပြီး ပြောကြတာမို့ တစ်ဘက်က ငြင်းမရအောင် ချည်ပြီးတုတ်ပြီး မေးခွန်းတွေနဲ့ ပြောဆိုကြလေ့ရှိပါတယ်။ ငွေပမာဏ ဘယ်လောက်ကို နောက် ၃ရက်အတွင်း ပေးပါမယ် စသဖြင့် အဖြူအမဲတစ်ခုခု သိရတဲ့အထိ ပြောဆိုဆွေးနွေးကြတာပါ။  အားလုံးရှေ့မှာ ပေးထားတဲ့ကတိဖြစ်တာမို့ ပျက်ခဲပါတယ်။ ပျက်သွားတာမျိုးလည်း ကြုံခဲ့ဖူးပါတယ်။ နောက်ထပ်တစ်ခါ ဖုန်းပြန်ခေါ်ပြီး အကြောင်းရင်းကို မေးမြန်းကြရပါတယ်။ ကြေနပ်လောက်တဲ့ လုံလောက်တဲ့ အကြောင်းပြချက်မျိုးကိုဆို ကြေနပ်လိုက်ရပြီး နောက်ရက်ချိန်းတစ်ခု ထပ်စောင့်ရတော့တာပါပဲ။

ဘာကြောင့်လဲဆိုတော့ ဘယ်ကုမ္ပဏီကမှ သူတို့ရဲ့ ဖောက်သည်ကို လွယ်လွယ် လက်မလွှတ် ချင်ကြလို့ပါ။ ဈေးကွက်မှာက အပြိုင်အဆိုင်တွေများတဲ့အလျှောက် ကိုယ့်ဆီက ဝန်ဆောင်မှုမပေးရင် နောက်ကုမ္ပဏီတစ်ခု သွားကြမှာပဲ မဟုတ်လား။ ဒါပေမဲ့ ငွေကြေးအရ လက်ခက်တဲ့ အစဉ်အလာရှိတဲ့ ဖောက်သည်မျိုးဆို တစ်ချို့ကုမ္ပဏီတွေက သတင်းအချက်အလက်တွေ စုံစမ်းသင့်သလောက် စုံစမ်းပြီး အကြွေးရောင်းလေ့မရှိဘဲ လက်ငင်း ငွေချေစံနစ်နဲ့သာ ဆက်ဆံလေ့ရှိကြပါတယ်။

နောက်တစ်ခုကတော့ Credit terms လို့ခေါ်တဲ့ အကြွေးကာလပါ။ တစ်ချို့ဖောက်သည်တွေအတွက် လက်ငင်းငွေချေ (COD-Cash on Delivery) တစ်ချို့တွေအတွက် ရက်-၃၀ (ဒါက ပုံမှန်ပါ) တစ်ချို့တွေအတွက် ရက်-၆၀ (စိတ်ချရတဲ့ ရင်းနှီးနေတဲ့ ဖောက်သည်)ဆိုပြီး ပေးလေ့ရှိပါတယ်။ အဲဒီသဘောကတော့ အကြွေးကို ဘီလ်နေ့စွဲကနေ ရက်၃၀အတွင်း သို့မဟုတ် ရက်၆၀အတွင်းပေးရမယ်လို့ ဆိုလိုပါတယ်။ များသောအားဖြင့်တော့ သတ်မှတ်ရက်ထက် ပိုကျော်ပြီးမှ ငွေရတတ်ပါတယ်။ ရက် ၃၀အတွင်း၊ ရက် ၆၀အတွင်းရယ်လို့ သတ်မှတ်ထားပေမဲ့ သူတို့ဘက်က ဘီလ်ရတဲ့ အချိန်ရယ်၊ ပေးဖို့ပြင်ဆင်ချိန်ရယ်ဆိုတဲ့ Turnaround time ကိုပါ ထည့်တွက်ပေးရပါတယ်။

နောက်အရေးကြီးတဲ့တစ်ခုက Credit Limit လို့ခေါ်တဲ့  အရောင်းငွေတန်ဘိုး ဘယ်လောက်ထိ အမြင့်ဆုံး ရောင်းပေးမလဲ ဆိုတာပါ။ အဲဒါကို ဖောက်သည်တစ်ဦးချင်းစီအလိုက် သတ်မှတ်ပေးထား ရပါတယ်။ တစ်ချို့ဖောက်သည်တွေအတွက် တစ်သန်းဘိုးရောင်းဖို့ ဆုံးဖြတ်ထားတယ် ဆိုပါစို့၊ သူ့ရဲ့ ၀ယ်လိုအားက များတဲ့အတွက် နှစ်လအတွင်းမှာ တစ်သန်းဘိုး ပြည့်သွားပြီဆိုရင် နောက်ထပ် ဝန်ဆောင်မှု အသစ်မပေးခင်မှာ အရင်အကြွေး တစ်သန်းဘိုးကို ဆပ်ဖို့ ပြောရပါမယ်။ ဘယ်လိုအချိန်မှာမဆို သူ့ရဲ့ ပေးရန်ရှိတဲ့ ငွေအကြွေးဟာ တစ်သန်းအောက်မှာပဲ ရှိနေရမယ်ဆိုတဲ့ သဘောပါ။ အဲဒီလို Credit limit သတ်မှတ်ပေးရတာကိုတော့ အထက်လူကြီးတွေကပဲ ဆုံးဖြတ်ချက်ချပြီး သတ်မှတ်ပေးပါတယ်။ များသောအားဖြင့်တော့ ကုမ္ပဏီတစ်ခုရဲ့ သတင်းအချက်အလက်တွေကိုရောင်းတဲ့ ကုမ္ပဏီတွေဆီကနေ သတင်းရယူပြီးမှ ဆုံးဖြတ်လေ့ရှိပါတယ်။

တစ်လတစ်ကြိမ် Statement of account လို့ခေါ်တဲ့ လစဉ်အရောင်း စာရင်းတွေကို ဖောက်သည်တစ်ဦးချင်းဆီကို လကုန်တိုင်းပို့ပေးရပါတယ်။ အဲဒီမှာ ပြီးခဲ့တဲ့လက အရောင်းစာရင်းအပြင် ငွေမချေရသေးတဲ့ လွန်ခဲ့တဲ့ သုံး-လေးလက အရောင်းစာရင်း အကြွေးတွေကိုပါ ဖော်ပြထားပါတယ်။

ပုံမှန်အားဖြင့် ဖောက်သည်တွေရဲ့ လစဉ်အရောင်းစာရင်းချုပ်ကို Aging Report လို့ခေါ်တဲ့ အကြွေးကာလပြစာရင်းမှာ ကြည့်ပြီး ကိုယ်ဘယ်သူ့ဆီက ရစရာ ဘယ်လောက်ရှိတယ်၊  ဘယ်သူ့ဆီမှာဖြင့် မရသေးတဲ့ ရက်လွန်အကြွေးတွေ ရှိနေတယ် စသဖြင့်ကြည့်ပြီးမှ အလုပ်လုပ်ရပါတယ်။ အလုပ်မှာ ကိုယ့်အချိန်ဇယားနဲ့ကိုယ် စီမံရတာပါ။ ဘယ်သူကမှ ကိုယ့်ကိုကြည့်နေပြီး ဒါပြီး ဒါလုပ်လို့ ပြောမနေပါဘူး။ လကုန်စာရင်းပိတ်လို့ ကိုယ့်ဘက်က အလုပ်တာဝန်ကျေနေရင် ရပါပြီ။ ဒီတော့ ကိုယ့်အလုပ်ကို ကိုယ်တိုင် စီမံခန့်ခွဲရပါတယ်။ အလုပ်တွေက တစ်ခုပြီးမှ တစ်ခုလာတာမဟုတ်ဘဲ အများကြီး တန်းစီစောင့်နေတတ်တာမျိုးမို့ အရေးကြီးရင် ကြီးသလို ဦးစားပေးသတ်မှတ်ပြီး လုပ်တတ်ရပါမယ်။  

ကျွန်မရဲ့နည်းကို ပြောပြပါမယ်။ ကျွန်မမှာ ပလပ်စတစ် ဖိုလ်ဒါလေးတွေ ရှိပါတယ်။ အဲဒီထဲမှာ အလုပ်တွေကို ဆိုင်ရာခေါင်းစဉ်ခွဲတစ်ခုချင်းစီနဲ့ ထည့်သိမ်းပြီး အရင်ဦးစားပေး ၁၊ ၂၊ ၃ စသဖြင့် အမှတ်စဉ်လိုက်လေး တပ်ထားလိုက်ပြီး တစ်ခုပြီးမှ တစ်ခု လုပ်သွားလိုက်ပါတယ်။ အဲဒါကို နေ့တစ်နေ့ရဲ့ အစမှာ စီစဉ်ထားရပါတယ်။ ဒီကြားထဲ တစ်ခြားကိစ္စလေးတွေ ဖောက်ပြီးဝင်လာရင် ကြားဖြတ်လုပ်သင့်တာရှိရင် လုပ်လိုက်ဖို့ပါပဲ။

များသောအားဖြင့်တော့ စာရွက်စာတမ်းတွေ၊ စာရင်းသွင်းစရာရှိတာတွေကို မနက်ဘက်မှာ လုပ်လေ့ရှိပြီး နေ့လည်ဘက်ရောက်မှ အကြွေးတောင်းတဲ့အလုပ်ကို လုပ်လေ့ရှိပါတယ်။ သေချာတာက ဘယ်သူမဆို မနက်စောစော ပိုက်ဆံအကြွေးတောင်းရင် မကြိုက်တတ်ကြဘူး မဟုတ်လား။ နောက်တစ်ခုက နေ့လည် ထမင်းစားပြီးချိန်ဆိုရင် ဘာပဲဖြစ်ဖြစ် စိတ်ခင်းလက်ခင်းလေး ကြည်လင်နေချိန်လည်း ဖြစ်တတ်တယ် မဟုတ်လားရှင်။

မေးလ်ထဲမှာရှိတဲ့ ကလန်ဒါတူးလ်ကိုသုံးပြီး အလုပ်လုပ်တတ်ရင် အကောင်းဆုံးပါပဲ။ ဘယ်နေ့မှာ ဘာလုပ်ရမယ် ဆိုတာတွေကို သတိပေးနိူင်တာမို့ မေ့လျော့တာမျိုးမဖြစ်စေဘဲ မှန်မှန် စဉ်ဆက်လုပ်ရမဲ့ follow up တွေအတွက် အဆင်ပြေလှပါတယ်။

ပြန်ပြီးချုပ်ရရင် ကျွန်မလို ရရန်ရှိစာရင်းကိုင်သူတွေအတွက်

၁) Aging Report ကို မှန်မှန်ကြည့်ပြီး နေ့စဉ်အလုပ်တွေကို ဇယားချပါ

၂) Credit terms  ရော၊ Credit Limit ရော ကျော်နေတဲ့ ဖောက်သည်တွေကို အထူး စောင့်ကြည့်ပြီး ငွေတောင်းပါ။ လိုအပ်ရင် အထက်က မန်နေဂျာဖြစ်ဖြစ် အရောင်းတာဝန်ခံနဲ့ဖြစ်ဖြစ် ညှိပြီး အကူအညီရယူပါ

၃) နေ့စဉ် လစဉ် လုပ်ရမဲ့ အလုပ်တွေကို မမေ့လျော့အောင် သတိပေးနေမဲ့ ကလန်ဒါ-calendar entry နဲ့ အလုပ်လုပ်တဲ့ အကျင့်ရယူပါ

၎) လုပ်ရမဲ့အလုပ်တွေ ဘယ်လောက်များများ အရေးကြီးတဲ့အတိုင်း အမှတ်စဉ်မှတ်ပြီး ပထမ ဒုတိယ ဦးစားပေးတွေ သတ်မှတ်ပြီး အစဉ်အတိုင်းသာ လုပ်သွားပါ

၅) အလုပ်ချိန် နောက်မကျပါစေနဲ့

၆) ကိုယ်အမှားလုပ်မိရင် ဝန်ခံတတ်သူဖြစ်ပါစေ၊ အမှားပြင်ဆင်ပြီးတာနဲ့ အမှန်အတွက် ကြေနပ် ရင်း ရှေ့ဆက်မမှားဖို့ ကြိုးစားပါ

၇) ဖုန်းနဲ့ ပြောဆိုတာမှာပဲ ဖြစ်စေ၊ မေးလ်နဲ့ပို့ပြီး ပြောဆိုတာမှာပဲ ဖြစ်စေ ကိုယ့်ဖောက်သည်နဲ့ ဆက်ဆံတဲ့ အခါ ဆောင်သင့် ရှောင်သင့်တဲ့ အသုံးအနှုန်းလေးတွေ ရှိပါတယ်။ သူတို့နဲ့ ဆက်ဆံပြောဆို ငွေတောင်းခံတဲ့အခါမှာ ရိုင်းပျမှုမရှိစေဘဲ ယဉ်ယဉ်ကျေးကျေး၊ ဒါပေမဲ့ ကိုယ်လိုချင်တာရအောင် တင်းတင်းရင်းရင်း တောင်းဆိုတတ်ရပါမယ်။ကျွန်မ ကြုံရင် ရေးပါဦးမယ်

နောက်တစ်ခုဖြစ်တဲ့ လုပ်ဖော်ကိုင်ဘက်တွေနဲ့ အဆင်တပြေပေါင်းသင်းဆက်ဆံနိူင်ဖို့ (Get along well with your colleagues) ကို နောက်တစ်ပိုစ့်မှာ ရေးပါဦးမယ်ရှင်။ မိတ်ဆွေများအားလုံးပဲ အလုပ်ခွင်ထဲမှာ အဆင်ပြေ အောင်မြင်သူများ ဖြစ်ကြပါစေ။


Thursday, October 11, 2012

ပုဇွန်ထုပ်ကြီးများလည်း ကူးခတ်ဆဲဖြစ်သော ထိုပင်လယ်



၁)
“ညည်းနာမည် ဘယ်လိုခေါ်လဲ”

“မြရည်ပါ မမကြီး”

 “အဖေက ဘာလုပ်တုန်း”

“အဖေက ထန်းလျှောလို့ သေပြီ”

“ထန်းလျှောတယ်ဆိုတာ တန်းပင်ပေါ်က ပြုတ်ကျပြီးသေတာကိုပြောတာ ခင်လေးခန့်ရဲ့”

ထန်းလျှောဆိုတဲ့အဓိပ္ပါယ်ကို မျက်မှောင်ကုတ်ရင်း စဉ်းစားနေဟန်ကြောင့် ပွဲစားမမမြတ်က ၀င်ရှင်းပြတယ်။

“သြော်… ဒါနဲ့ အမေကရော”

“အမေက အငြိမ့်ကရင်း နောက်ယောက်ျားယူသွားပြီ”

“သြော်…”

ခင်လေး ဒုတိယအကြိမ် သြော်လိုက်မိပြန်တယ်။ ကလေးမလေး ရုပ်ကလေးသနားကမားနဲ့ အဖေကလည်းသေ၊ အမေကလည်း နောက်ယောကျာ်းယူသွားနဲ့ သနားစရာရယ်။

“ထမင်း ဟင်းရော ချက်တတ်ရဲ့လား”

“ချက်တတ်ပါ့ မမကြီးရယ်။ မြရည်က လေးတန်းကတည်းက ထမင်းအိုးတည်၊ ဟင်းချက်ခဲ့ရတာ။ တောချက်တော့ တောချက်ပေါ့ မမကြီး။ မမကြီးတို့ စားချင်တဲ့ဟင်းစပ်ရှိရင် သင်ပေးလေ၊ မြရည်က တတ်လွယ်ပါတယ်”

အင်း ဒီကလေးမ မဆိုးဘူး။ ခင်လေးတို့အရွယ် သုံးဆယ့်သုံးနှစ်ကို သူ့တို့လို ဆယ့်ရှစ်ဆယ့်ကိုးတွေက အန်တီတို့၊ ကြီးကြီးတို့ခေါ်နေကြချိန်မှာ သူက မမကြီးတဲ့။ ငယ်ရွယ်ပေမဲ့ လူ့သဘောလူ့မနော သိတတ်ပါပေတယ်။ ခင်လေးစိတ်ထဲက ကြိတ်အမှတ်ပေးနေမိတယ်။

“အော်…အေး၊ ကောင်းတာပေါ့ မြရည်ရယ်”

 “ထားခဲ့လေ မမမြတ်၊ ခင်လေး ယူလိုက်ပါ့မယ်”

မဆိုးပါဘူး။ ကလေးမလေးက သွက်သွက်လက်လက် ချက်ချက်ချာချာလေး။ တစ်လက်စထဲ မမမြတ်အတွက် ပွဲစားခရယ်၊ မြရည်အတွက် တစ်လစာအကြိုငွေရယ်ကို မမမြတ်လက်ထဲ ထည့်ပေးလိုက်တယ်။

“ဒါဆို ငါပြန်တော့မယ်၊ ခင်လေးခန့်တို့ ခင်ဦးသန့်တို့ညီအစ်မက သဘောကောင်းတွေ၊ ညည်းသာလိမ္မာရင် သမီးလို ထားမှာ၊ နားလည်လားမြရည်၊ အေး အေး  ဒါပဲမြရည် ငါပြန်ပြီ”

မမမြတ်က မြရည်ကို မှာစရာရှိတာမှာပြီး ပိုက်ဆံအိတ်ကြိုးကလေး ပခုံးပေါ်ကောက်တင်ပြီး ထွက်သွားတော့တယ်။
ခင်လေးလည်း မြရည်ကို သူနေရမဲ့အခန်း၊ မီးဖိုချောင်၊ ရေချိုးခန်း၊ အိမ်သာတွေလိုက်ပြရင်း ဒီနေ့တော့ ခဏနားပါစေလေ ဆိုတဲ့စိတ်နဲ့ သူ့အခန်းထဲထားခဲ့ပြီး မမခင်ဦးရှိရာဆိုင်ကို သွားဖို့ပြင်ရတယ်။ ခင်လေးတို့မှာ ပြေးကြည့်မှ ဒီညီအစ်မနှစ်ယောက်ထဲ။ မိဘလက်ငုတ်လက်ရင်း ရွှေဆိုင်လေးကျန်နေလို့သာ အခြေမပျက်နေနိူင်ခဲ့ကြတာ။ မနက်ဆို မမခင်ဦးက မြို့မဈေးကြီးထဲမှာ ရွှေဆိုင်လေးသွားဖွင့်၊ ဈေးကြီးက မနက် ၆နာရီခွဲလောက်ဆို ဈေးဝယ်တွေနဲ့ စည်ကားစပြုပြီ။ ခင်လေးကတော့ မနက်ဆို အိမ်ကကောင်မလေးနဲ့ ဈေးသွား၊ ဟင်းစားဝယ်၊ ပြန်လာ ချက်ပြုတ်၊ ပြီးမှ ထမင်းချိုင့်လေးဆွဲပြီး မမခင်ဦးရှိရာ ဆိုင်နောက်လိုက်ရတာ။ တစ်နေ့လုံးဆိုင်မှာနေကြပြီး ညနေဈေးပိတ်မှ ညီအစ်မနှစ်ယောက်သား ဒရိုင်ဘာမောင်စိုး လာကြိုတဲ့ကားနဲ့ အိမ်ပြန်ကြရတယ်။

နေ့လည်နေ့ခင်းတွေဆို မမခင်ဦးက ဆိုင်မှာနေရင်း လက်ဝတ်လက်စား ဒီဇိုင်းအသစ်လေးတွေ ဆွဲကြည့်နေတတ်တယ်။ ဘယ်နေရာမှာ ကျောက်ဘာရောင်လေးနဲ့ စပ်သုံးရင်ကောင်းမလဲ။ သတို့သမီးတွေက အဖြူဝတ်ကြတာများတာမို့ ပတ္တမြားလို အရောင်ရဲရဲနဲ့၊ ဒါမှမဟုတ် မဟူရာလို အရောင်နက်နက်နဲ့ တွဲဖက်ပြီး ခေတ်မီဒီဇိုင်းလေးတွေ စိတ်တိုင်းကျ ပုံဖော်တာပဲ။ ခုတော့ဖြင့် အ၀ါရောင်ပယင်းကျောက်တွေနဲ့ စပ်ဝတ်နေကြပြန်ပြီ။ အ၀ါရောင် ခေတ်စားနေတာပေါ့။ အရင်က ပြောင်ခေါင်းစိမ်းတွေ ခေတ်စားသေးတယ်လေ။ ဒီလိုပဲ ရတနာလုပ်ငန်းက ဖက်ရှင်ရေစီးကြောင်းနဲ့ ဆက်စပ်နေတာ ဆိုတော့ ခေတ်နဲ့ မျက်ခြေပြတ်လို့မရဘူး။ မမခင်ဦးကြိုးစားလွန်းလို့သာ ခင်လေးတို့ရတနာဆိုင်လေး သက်ဆိုးရှည်နေတာ။

နိူင်ငံခြားကသူငယ်ချင်းတွေဆီက ကတ်တလောက်တွေ ပို့ပေးလေ့ရှိတော့ ခင်လေးတို့ဆိုင်လက်ရာပစ္စည်းတွေဟာ ခပ်ပါးပါး ဘိုဆန်ဆန်ဒီဇိုင်းလန်းလန်းလေးတွေ များတယ်။ တစ်ခါတစ်လေလည်း ဒီဇိုင်းက အနုစိတ်လွန်းပြီး ရွှေလေများနိူင်တာ၊ အလျော့တွက်များသွားနိူင်တာမျိုးဆို ဒီဇိုင်းကို ပြန်စဉ်းစားရတယ်။ မမခင်ဦးက ပန်းထိမ်ဖိုထဲကို တစ်ပတ်တစ်ခါလောက်တော့ သွားလေ့ရှိတယ်။ အဲဒီပန်းထိမ်ဖိုရဲ့ရှေ့အိမ်မှာ မမခင်ဦးရဲ့ အချစ်ဟောင်း ကိုမြတ်တို့အိမ် ရှိတယ်။ အချစ်ဟောင်းလို့ပြောရတာက မမခင်ဦးနဲ့လွဲပြီး တစ်ခြားမိန်းကလေးတစ်ယောက်နဲ့ လက်ထပ်သွားလို့ပဲ။ မမခင်ဦးခမျာ လိမ့်နေအောင် ခံခဲ့ရရှာတာပေါ့။ အဲ့တုန်းက ခင်လေးက ဆယ့်သုံးနှစ်လောက်ပဲ ရှိသေးတာ။ မမခင်ဦးက နှစ်ဆယ့်တစ်နှစ်။ ချစ်သူနဲ့ကွဲရလို့ တငိုငို တငိုင်ငိုင်ဖြစ်နေတဲ့ မမခင်ဦးကိုကြည့်ပြီး နားမလည်ပါးမလည် ၀င်ပြောခဲ့လို့ ခင်လေးခေါင်းကို ပူကနဲနေအောင်ခေါက်ခံလိုက်ရတာ မှတ်မိသေးတယ်။ ခင်လေး ပြောလိုက်တာကိုလည်း ကြည့်ဦးလေ။ “မမခင်ဦးရာ ကိုကိုမြတ် မိန်းမယူသွားလည်း သွားပါစေပေါ့၊ ငိုမနေပါနဲ့၊ ယောကျာ်းများ စားကောင်းတဲ့ အသီးမှတ်လို့”  တဲ့။ ခုနေ ပြန်တွေးတော့ ရယ်ရသေးတယ်။

ခင်လေးအရွယ်လေးရောက်လာတဲ့အချိန်မှာ မိဘတွေဆုံးပါးသွားတော့ မမခင်ဦးအဆုံးအမနဲ့ပဲ အပျိုဖြစ်လာခဲ့ရတာ။ အဲဒါကြောင့်နဲ့တော့ ခင်လေးအပျိုကြီးဖြစ်တာနဲ့ မဆိုင်ပါဘူးနော်။ ခင်လေးတို့ ညီအစ်မနှစ်ယောက်က ကံတူအကျိုးပေးတွေ ထင်ပါရဲ့။ ခင်လေးရည်းစားလည်း အိမ်ကပေးစားတဲ့သူနဲ့ ယူသွားခဲ့တာပဲ။ ခင်လေးက ဘွဲ့မရလို့ တဲ့။ ဒီလိုနဲ့ပဲ ခင်လေးတို့ ညီအစ်မနှစ်ယောက် တစ်ယောက် တစ်ယောက်အားပြုပြီးနေလာကြရတယ်။

ဘဘကြီးအကြောင်းပြောရဦးမယ်။ အဖေ့အစ်ကို ဘဘကြီးကျပြန်တော့ ကျန်းမာရေးကောင်းလိုက်တာများ ခုထိ သံတစ်ချက်ရိုက်၊ သစ်တစ်ချောင်းကာ။ အုန်းပင်တောင် တက်မယ်တကဲကဲလုပ်နေလို့ တားယူရတယ်။ ခြံထဲက အုန်းပင်ချတော့မယ်ဆို လမ်းထဲက အုန်းသီးလိုက်ချပေးတဲ့ မောင်ဋ္ဌေးလေး ခေါ်ချခိုင်းလိုက်တာပဲ။ မတော်လို့ ဘဘကြီးကျိုးပဲ့သွားရင် မခက်ပါလား။ ခင်လေးတို့ညီအစ်မမှာ လူရိုသေရှင်ရိုသေ ဘဘကြီးတစ်ယောက် မားမားမတ်မတ်ရှိနေတာကိုပဲ ၀မ်းသာရတယ်။

ဘဘကြီးက မိန်းမနှစ်ယောက်တောင် ရှိခဲ့ဖူးတာ။ ဖူးစာရေးရာမှာ ခင်လေးတို့ ညီအစ်မနဲ့မတူဘဲ စွံတယ်ဆိုရမယ်။ ပထမမိန်းမဆုံးသွားတော့ မိန်းမရဲ့ ညီမကို လက်ထပ်ခဲ့တာ။ ကလေးတွေမျက်နှာနဲ့ပေါ့။ ခုတော့ အဲဒီမိန်းမကလည်း မီးယပ်ရောဂါနဲ့ ဆုံးသွားရှာ၊ သမီးနှစ်ယောက်ကလည်း အိမ်ထောင်တွေကျပြီး ယောကျာ်းအိမ်တွေမှာ လိုက်နေတာမို့ နောက်ဆုံးတော့ ဘဘကြီးက ခင်လေးတို့ညီအစ်မတွေနဲ့ပဲ လာနေဖြစ်တော့တာ။ ခင်လေးတို့ကလည်း ဘဘကြီးလက်ပေါ်ကြီးလာရတာမို့ ဘဘကြီးကိုတော့ ချစ်တယ်။ သံယောဇဉ်လည်း ရှိတယ်လေ။

၂)

“ဟုတ်ရဲ့လားစိန်စိန်ရယ် ဖြစ်မှဖြစ်ရလေ”

“ဟုတ်ပါ့ ခင်ဦးရယ်၊ အဲဒီကောင်မလေးမိနွေဟာလေ အခု ပြန်ရောက်လာပါရောလား ကိုယ်ဝန်ပါလာတယ် တဲ့”

“အဲဒီတော့ ယောကျာ်းလေးမိဘဘက်က ဘာလုပ်ပေးမယ်တဲ့လဲ”

“ဘာမှ လုပ်ပေးချင်ပုံမရလို့ ခက်နေတာပေါ့ ခင်ဦးရယ် သူတို့သားနဲ့ သဘောမတူပါဘူးဆိုနေတာ”

“ခက်တယ်နော် စိန်စိန်ရယ် မိန်းကလေးတွေများ သိတ်ခက်တာပဲ”

“ကဲပါအေ ငါလည်း ပြန်လိုက်ပါဦးမယ် ဒီနေ့ ကျေးဇူးရှင်က ငါးရံ့လေးနဲ့ ဒန့်ဒလွန်သီးနဲ့ စားချင်လှ ချည်ရဲ့ သွေးတောင်းနေတော် မူလို့  အဲဒါအိမ်ပြန်ရောက်မှ ချက်ရမှာ၊ သွားပြီဟေ့”

ခင်လေးကတော့ ဘာမှဝင်မပြောဖြစ်ပါဘူး။ မမခင်ဦးနဲ့ အန်တီစိန်စိန်ပြောနေကြတာကိုပဲ နားထောင်နေလိုက်တယ်။ ဒီလိုပဲ အန်တီစိန်စိန်ဈေးကပြန်လာတိုင်း ရပ်ကွက်ထဲကသတင်း တစ်ခုမဟုတ် တစ်ခု ပါလာတတ်တာ။ ခုလည်း မိနွေဆိုတဲ့ကောင်မလေး ခိုးရာလိုက်တာ အထက်မြန်မာပြည်ဘက်ထွက်ပြေးတယ်။ အဲဒါမိဘတွေက စိတ်ဆိုးဆိုးနဲ့ လိုက်မရှာကြဘဲပစ်ထားလိုက်တော့ သူတို့ဘာသာပြန်ရောက်လာကြတာ ခုကိုယ်ဝန်တောင်ပါလာတယ်တဲ့။ သားရှင်ဘက်ကလည်း သဘောမတူတာမို့ ကလေးတွေ ဒုက္ခရောက်နေကြတာပေါ့။ အဓိကကတော့ မိန်းကလေးဘက်က နစ်နာတာပဲလေ။

“မြရည် ကြားလိုက်လား ဟိုမှာ ပြောသွားတာ”

“ဟုတ် ကြားပါတယ် မမကြီး”

“အဲဒါပဲနော် ယောကျာ်းတွေဆိုတာ၊ ခုသူ့မိဘတွေက သဘောမတူတော့ မိန်းကလေးကိုတာဝန်မယူနိူင်သလိုလိုနဲ့ ပြောနေတာတဲ၊့ ခိုးပြေးတုန်းက သူပဲ ခိုးပြေးပြီး။ ညည်း မှတ်ထားနော် မြရည်၊ အဲလိုတော့ ဘယ်တော့မှ မလုပ်နဲ့ လိုချင်ရင် မမကြီးတို့ကိုပြော၊ မမကြီးတို့ကောင်းအောင် စီစဉ်ပေးမယ် ကြားလား”

“ဟုတ် ကြားပါတယ် မမကြီး”

“မယူရဘူးလို့ မပြောဘူး၊ ကိုယ့်မှာ မျက်စေ့ရှိတယ်၊ နားရှိတယ် ကြည့် စဉ်းစား ရွေးချယ်။ မမကြီးတို့က မယူချင်လို့ အပူမရှာချင်လို့ကို ဒင်းတို့နဲ့ ဝေးဝေးနေတာ။ ကြားတယ်နော် မြရည်”

“ဟုတ် ကြားပါတယ် မမကြီး”

ခင်လေးစိတ်ထဲ ရယ်ချင်ပက်ကျိပေမဲ့ မမခင်ဦးရှေ့မှာ ပြုံးစေ့စေ့တောင် မလုပ်ရဲပါဘူး။ မမခင်ဦးအတည်ပြောနေတာ သိနေတာကိုး။ အရင် အိမ်မှာခေါ်ထားတဲ့ကောင်မလေးနှစ်ယောက်က ရှေ့မှာ သင်ခန်းစာ တစ်နဲ့ နှစ်ပေးသွားကြတာ။ ဒီတော့ မမခင်ဦး စိတ်ပူမယ်ဆိုလည်း ပူစရာ။

ပထမကောင်မလေး ညိုညို့တုန်းက အိမ်ရှေ့ခြံလာပြင်နေတဲ့ ပန်းရံသမားလေးနဲ့ လိုက်ပြေးသွားတာ။  ပြီးတော့ယောကျာ်းလေးရှင်ကပဲ တစ်ပြန်စီး အပေါ်ကနေသေးတာ။ မမခင်ဦးမှာ ရှက်လည်းရှက်၊ ဒေါသလည်း ထွက်။ ဒုတိယကောင်မလေး ၀င်းမာတုန်းကကျတော့ သူ့ရွာက ယောကျာ်းပေးစားဖို့ဆိုပြီး လာပြန်ခေါ်သွားပြန်ရော။ ၀င်းမာနဲ့တုန်းကဆို မမခင်ဦးတော်တော်လေး ခံစားလိုက်ရသေးတယ်။

ဝင်းမာက လိမ္မာသိတတ်မှုရှိတယ်။ အိမ်မှာ ၂နှစ်ပြည့်တော့ မမခင်ဦးက နားကပ်ကလေးတစ်ရံတောင် ဆင်ရှာတာ။ ပြောရရင် သမီးလိုပါပဲ။ အိမ်မှာရှိတဲ့ လူသုံးယောက်ရဲ့အကြိုက်တွေကို ၀င်းမာက အကုန်သိတယ်။ သံပုရာရည်ကအစ ဘဘကြီးအတွက် အချိုပေါ့၊ ခင်လေးအတွက် ချိုချိုနဲ့ မမခင်ဦးအတွက် အချဉ်ကဲအောင် သုံးယောက် သုံးမျိုးဖျော်ပေးရှာတာ။ ဟင်းတွေဘာတွေ ခိုးဝှက်လည်း မစားတတ်ဘူး။ အသားကလေးညိုပေမဲ့ ညိုပြောင်ပြောင်လေး၊ မျက်လုံးကြည်ကြည်ကလေးတွေနဲ့ ရုပ်ရည်သန့်ကလေး။ အိမ်ရောက်လို့မှ လေး ငါးလရှိသေး မမခင်ဦး ဘာကြိုက်တယ်၊ ခင်လေးဘာကြိုက်တယ်၊ ဘဘကြီးကဘယ်လိုဆိုတာ အကုန်ကြေညက်နေအောင် သိတော့တာ။

အိပ်ရာခင်းတွေဆို လျှော်ဖွတ်မီးပူထိုးပြီးတာနဲ့ ပရုတ်လုံးလေးတွေထည့်ပြီး ပလပ်စတစ်အိတ်ထဲ ထည့်သိမ်းတာ။ မျက်နှာသုတ်ပုဝါကို တစ်ပတ်တစ်ခါလဲတယ်။ မီးဖိုချောင်ဆို အမြဲသန့်ရှင်းနေတာမျိုး။ ဟင်းဆိုလည်း မမခင်ဦးအကြိုက် ငါးနုသန်းရေချိုကလေးကို ရှမ်းနံနံအုပ်ပြီးချက်တာ တစ်မျိုး၊ ခင်လေးအကြိုက် ကြက်သားကို ခပ်စပ်စပ်ချက်ပြီး ပဲသီးတောင့်လေးတွေကို လက်တစ်ဆစ်လောက်ဖြတ်ထည့်ချက်တာက တစ်မျိုး၊ ဘဘကြီးအကြိုက် ငါးရံ့ပေါင်းထုပ်က တစ်မျိုး အဲသလို။

အံမာလေး အဲဒီလိုအချိုးတကျဖြစ်လာဖို့ ခင်လေးရော မမခင်ဦးပါ ပါးစပ်ကအမြှုတ်ထွက်မတတ် သင်ရတာ။ တစ်ခုက ၀င်းမာဟင်းချက်ရင် ဆနွင်းမှုန့်တွေများလွန်းလို့ ဟင်းတိုင်း ၀ါဝါ၀င်းရွှေဖြစ်တော့တာရယ်၊  ဘယ်ဟင်းမဆို ခရမ်းချဉ်သီးထည့်ချက်ပစ်လိုက်တတ်တာရယ် အဲဒီနှစ်ခုကို တော်တော်လေး ဖျောက်ယူရတယ်။ ထမင်းကြော်ရင်တောင် ဆနွင်းတွေနဲ့ဝါထိန်နေတာကို ပဲငံပြာရည်လေးနဲ့ ခရုဆီလေးထည့်ပြီး ကြော်တတ်အောင် သင်ပေးခဲ့ရတာ။

ဟော အားလုံးလည်း အချိုးတကျတတ်မြောက်ပါလေရော၊ သူ့မိဘတွေက ရွာမှာ ယောကျာ်းပေးစားဖို့ဆိုပြီး ပွဲစားမမမြတ်ကတစ်ဆင့် ပြန်ခေါ်သွားပါလေရော။ မမခင်ဦးခမျာ ၀င်းမာအပေါ် သနားတာအပြင် ချစ်တာပါပိုလေတော့ အတော်လေး စိတ်မကောင်းဖြစ်ခဲ့တာပေါ့။ ရွာမှာ သူများမိန်းမတွေလို ချက်ပြုတ်၊ လယ်ထဲဆင်းတဲ့ ယောကျာ်းကို အိမ်ကနေ ထမင်းတောင်းလေးလယ်ထဲလိုက်ပေး၊ နောက်တော့ ကလေးတွေတစ်ပြုံကြီးနဲ့ ဖတ်သီ ဖတ်သီဖြစ်ရှာတော့မယ် ရယ်လို့ တွေးပူနေသေးတာ။ ခင်လေးကတော့ မပူပါဘူး၊ သူ့ဘ၀နဲ့ သူပဲလေ။

ခု နောက်တစ်ယောက် မြရည်။ မမခင်ဦးက အရင်နှစ်ယောက်တုန်းကလိုပဲ သူစံနစ်တကျ သင်ကြားပြုစုလာပြီးမှ လင်ရသွားမှာ စိုးတော့ လက်ချာတွေ စွတ်ပေးတော့တာပဲ။ ခင်လေးကတော့လေ မမခင်ဦးရင်ထဲကအနာကိုလည်း သိ၊ ရှေ့ကနှစ်ယောက် လုပ်သွားတာတွေလည်း သိနေတော့ မမခင်ဦးအပေါ် အဆိုးမဆိုသာပေမဲ့ ဒါတွေဟာ တားမရဘူးလို့ ထင်တာပါပဲ။ အချိန်တန်လို့ ယူချင်လည်း ယူပါစေပေါ့။ ကိုယ့်သားသမီးလည်း မဟုတ်၊ ကိုယ့်သားသမီးဆိုရင်တောင် သီးချိန်တန် သီးရမဲ့ကိစ္စမဟုတ်လား။

၃)

မြရည်ကလေးဟာ အရိပ်အောက်မှာနေရလို့မှ မကြာခင် အသွေးအမွေးပြောင်းလာတယ်။ စိုစိုပြေပြေနဲ့ ကိုယ်လုံးကိုယ်ပေါက်လေးဆို လာကာစနဲ့တောင်မတူဘဲ တင်းတင်းရင်းရင်းလေးနဲ့ လှလာတယ်။ အဲဒီလိုဖြစ်လေ မမခင်ဦးက စိတ်ပူလေ။ အိမ်အနီးအနားမှာများ အိမ်ပြင်ဆောက်နေတာ ရှိသလား၊ ပန်းရံအလုပ်သမားတွေ ဘာတွေများ ရှိသလား၊ လမ်းထိပ်က ဆိုက်ကားဂိတ်မှာ မြရည်နဲ့ ရွယ်တူလူငယ်တွေများ ရှိနေသလား။ သူ့မှာ ကျီးကြည့်ကြောင်ကြည့်ရယ်။ ဒရိုင်ဘာမောင်စိုး နဲ့တောင် နှစ်ယောက်ထဲ သိတ်မလွှတ်ဘူး။ မဖြစ်လွန်းမှသာ။

မြရည်က သူ့အမေသွေးအပြည့်ပါတယ်ထင်ပါရဲ့။ ပိုက်ဆံစုပြီး ပန်တျာကျောင်းတက်မတဲ့၊ ကျောင်းကဆင်းရင် သူ့အမေလို အငြိမ့်မင်းသမီးလုပ်မတဲ့။ ယောကျာ်းမယူဘူးတဲ့။ ဟုတ် မဟုတ်မသိနိူင်ပေမဲ့ အဲဒါကိုပဲ မမခင်ဦးက သဘောခွေ့နေတာ။ တီဗီမှာ အငြိမ့်များလာလို့ကတော့ အထဲကမင်းသမီးကြည့်ရတာတစ်မျိုး၊ မြရည် ထ ကနေတာကို ကြည့်ရတာ တစ်မျိုး။ အဲလိုအချိန်မျိုးမှာ ဘဘကြီးကတောင် လက်ခုပ်လက်ဝါးတီးပြီး ပျော်လို့ ပြုံးလို့။ တစ်အိမ်လုံးလည်း မြရည်ရောက်မှ စိုပြည်လာတယ် ထင်ရတယ်။

“မြနဲ့မောင်နဲ့ ခုမှတွေ့တာ  လူပါးမ၀ခင်သေးတော့ ပြောရတော့ ရယ်စရာပါ အာ..ဟာ…အာ…ငှာ  ငှာ  ငှာ”

မြရည်က မေးရိုက်သံတွေဘာတွေထည့်ပြီး အဟုတ်ဆိုတော့ ခင်လေးတို့မှာ တစ်ဝါးဝါးပွဲကျရတာ။ မြရည် ကံကောင်းပါတယ်လေ။ ဒီလိုပဲ ခင်လေးတို့လည်း ကံကောင်းတာပါပဲ။ မြရည်က ငယ်ပေမဲ့ အိမ်လုံတယ်။ ထမင်းဟင်းချက်ပြုတ်တာရော၊  သိမ်းဆည်းတာရော ပြန်ကြည့်စရာမလိုတော့အောင် စိတ်ချနေရပြီ။ မြရည်အိမ်ရောက်တာလည်း ဘာလိုလိုနဲ့ ၂နှစ်နီးပါးရှိခဲ့ပြီလေ။

၎)

“မမခင်ဦး မနက်ကလေ ပွဲစားမမမြတ် ဖုန်းဆက်တယ် သိလား”

မမခင်ဦးက ခင်လေးပြောတာကို ဆတ်ကနဲခေါင်းညိတ်ပြရင်း သောက်နေတဲ့လက်ထဲကခွက်ကို ဆောင့်ချရင်း ပြောလိုက်တယ်။

“အင်း ညိုညိုတစ်ယောက် သူ့ယောကျာ်းပန်းရံသမားနဲ့ အဆင်မပြေဘူး၊ ကလေးနှစ်ကောင်နဲ့။ ယောကျာ်းကလည်း သောက်လာရင် သွေးဆိုးပြီး ရိုက်ဟယ်နှက်ဟယ်နဲ့။ ဖြစ်နိူင်ရင် မမခင်ဦးတို့အိမ်ပြန်လာ လုပ်ချင်လို့တဲ့ အဲဒါပြောတာ ဟုတ်တယ်မှတ်လား။ ငါ သိသားပဲ ငါ့ကိုလည်း ဖုန်းဆက်ပြောသေးတယ်”

မမခင်ဦးအသံက လင်ရကံဆိုးတဲ့ သမီးအရင်းတစ်ယောက်အကြောင်းကြားရသလို မသက်မသာရှိလှတယ်။

“ငါ့လည်း ယောကျာ်းလာစပ်နေသေးတယ်၊ အဲဒီမမမြတ်တစ်ယောက်ဟာ ပွဲစားလို့ မပြောရဘူး။ ငါ စိတ်မ၀င်စားတော့ပါဘူးခင်လေးရယ်၊ ဒီအရွယ်ရောက်မှ ငါရှာသမျှ လင်က ဖြုန်းတီးနေတဲ့ဟာမျိုး မလိုချင်ပါဘူး၊ ကိုယ့်ဟာကိုယ်အေးအေးပဲ ထမင်းကြမ်း ယပ်ခပ်စားနေလိုက်မယ်”

“ဟုတ်တယ်မမခင်ဦး၊ ဘဘကြီးလည်း ရှိတယ်၊ ခင်လေးလည်း ရှိတာပဲဟာ”

“မြရည် ကြားလား၊ အဲဒါ မမကြီးတို့အိမ်မှာ အရင်ကလုပ်သွားတဲ့ ကလေးမ၊ လင်ကို ရွေး မယူလို့၊ အချစ်မှာ မျက်စေ့မပါတဲ့ မိန်းကလေး ခု ဒုက္ခတွေ့နေပြီလေ”

မြရည်ကို မမကြီးရဲ့ ဓါတ်ပြားဟောင်းဖွင့်ပြနေတာတွေ ကျွန်မ ကြားရပြန်ပြီ။ မြရည်မျက်နှာကလေးက မျက်နှာပိုးသေသေလေးနဲ့ မမကြီးပြောသမျှ ဟုတ်ကဲ့ပါ မမကြီးပဲလုပ်နေတော့ မမကြီးမျက်နှာက သဘောတကျ ပြုံးလို့။

၅)

တစ်မနက် အိပ်ယာက မနှိုးစဖူး မမခင်ဦးလာနှိုးတာမို့ ခင်လေးလည်း မထချင်ထချင်နဲ့ လူးလဲပြီး အိပ်ယာက ထလိုက်ရတယ်။ ခင်လေးက မနက်အစောကြီး အိပ်ယာထနေကျမှ မဟုတ်တာပဲလေ။

“ခင်လေးရေ မြရည်လေ မြရည် သူ့အခန်းထဲမှာ မရှိတော့ဘူး”

“ဟယ် မမခင်ဦး သေချာရဲ့လား၊ ခြံထဲမှာများ ဘုရားတင်ဖို့ စပယ်ပန်းခူးနေတာများလား၊ ဒါမှမဟုတ် ဘဘကြီးဘုရားရှိခိုးဖို့ ဆွမ်းတော် ကူပြင်ပေးနေတာများလား၊ ခြံထဲမှာရော ဘုရားခန်းထဲမှာရော ရှာပြီးပြီလား မမခင်ဦး”

“ရှာပြီးပြီ  ဘယ်မှာမှ မတွေ့ဘူး။ ဘဘကြီးလည်း ဘုရားဆွမ်းတော်ကပ်ပြီးလို့ ဒီအချိန်ဆို လမ်းလျှောက် ထွက်သွားရောပေါ့”

“နေဦး၊ ဒရိုင်ဘာမောင်စိုး  မောင်စိုးများလား၊ ခဏနေ ငါ ဆိုင်သွားဖို့ မောင်စိုးကားသွားထုတ်လာတဲ့အခါ သိရမှာပ၊ဲ ဟင်း  ငါသေချင်တယ် သေချင်တယ် ခင်လေးရဲ့၊ ဒီကောင်မလေးက လင်မယူပါဘူးမမကြီးရယ် ဘာရယ်နဲ့ ခု ကြည့်စမ်း၊ မောင်စိုးရော ဒင်းလည်း လာပါစေဦး”

“ဟာ မမခင်ဦးရယ်  ဘာမှမသေချာသေးတဲ့ဟာကို၊ ခဏလေးတော့ စောင့်လိုက်ပါဦးလေ”

မီးဖိုချောင်ထဲဝင်ကြည့်တော့ မနက်စာ ပဲပြုတ်ထမင်းကြော်က နွေးနွေးလေး ရှိနေတုန်း။ ဘုရားစင်ပေါ်မှာလည်း သစ်သီးဆွမ်းနဲ့ ထမင်းဖြူကို ခါတိုင်းလိုပဲ ကပ်ထားတယ်။ မမခင်ဦးနဲ့ ညီအစ်မနှစ်ယောက်သား တိတ်တိတ်ဆိတ်ဆိတ် မနက်စာစားရင်း ဖြစ်နိူင်ခြေတွေကို ခင်လေးစိတ်ထဲက တွေးနေမိတယ်။

ခုတစ်လော မောင်စိုးနဲ့ မြရည် အပြင်တွေဘာတွေ သွားလာတတ်သလားပေါ့။ စဉ်းစားတယ်။ တစ်နေ့က ဘဘကြီး ခြံထဲက မြက်တွေခုတ်နေလို့ ခင်လေးတို့ကတားတော့ မောင်စိုးလည်းရှိနေချိန်မို့ သူပဲခုတ်ပေးပါ့မယ်ဆိုပြီး မြက်တွေ ရှင်းပေးသွားတာ။ မောင်စိုးအင်္ကျီလက်မောင်း ပင့်တင်လိုက်တော့ လက်မောင်းသားညိုညိုကြီးတွေကို မြရည်ငေးကနဲ စိုက်ကြည့်နေ တာ ခင်လေးသတိထားမိလိုက်သလိုပါပဲ။ အို မထင်ကောင်းပါဘူးလေ။ မြရည်က အပြင်လည်း ထွက်နေတာ၊ ဈေးတွေ ဘာတွေလည်း သွားလာနေတဲ့ဟာ။ အပြင်က တစ်ယောက်ယောက်လည်း ဖြစ်နိူင်တာပဲ။

ခဏနေတော့ မောင်စိုးခြံထဲဝင်လာတယ်။ ခါတိုင်းလို အေးအေးဆေးဆေးပဲ၊ ကားကို ခြံဝမှာရပ်ခဲ့ပြီး သရက်ပင်အောက်က ခုံဝိုင်းလေးမှာ မမခင်ဦးကိုထိုင်စောင့်တယ်။ ခင်လေးက မောင်စိုးမျက်နှာကို သေချာ အရိပ်အကဲခတ်ရင်း စိတ်ထဲက တစ်ခုခုကို တွေးလိုက်မိသလိုလို။

အဲဒီအချိန်မှာပဲ မမခင်ဦးက လက်ထဲမှာစာတစ်စောင်ကိုင်လာရင်း ခင်လေးကိုပြတယ်။ မမခင်ဦးမျက်နှာက မှုန်မှိုင်းနေတဲ့ မိုးလိုပဲ။ ခုချက်ချင်းပဲ အရှက်တွေနဲ့ ပြိုအုံ့ကျလာတော့မယ့်အတိုင်း။

စာကတိုတိုလေးရယ်။ စာကိုဖတ်အပြီးမှာ မမခင်ဦးနဲ့ ခင်လေးတစ်ယောက်မျက်နှာတစ်ယောက်ကြည့်ရင်း ပြိုင်တူလိုလို ပြောမိကြတယ်။

“ဖွဲတစ်ဆုပ်နိူင်သေးတယ်တဲ့ နော်၊ ယောကျာ်းတွေ အံ့များလည်း ဩရပါရဲ့”

ငိုရမလို ရယ်ရမလိုနဲ့၊ ခင်လေးမျက်လုံးထဲမှာတော့ ဓါးကြီးတစ်ဝင့်ဝင့်နဲ့ မြက်ခုတ်နေတဲ့၊ အုန်းပင်တက်နိူင်လောက်အောင်တောင် အင်အားတွေရှိပါသေးတယ်ဆိုတဲ့၊ လူပျိုလေးလိုဟန်ရေးပြပြနေတဲ့ ဘဘကြီးရဲ့ မျက်နှာ…။ မြရည်ဟာ အရင်က ကလေးမတွေလို အချစ်မှာ မျက်စေ့မပါတာမျိုး မဟုတ်ဘူး၊ သေချာတယ်။ မျက်မှန်ကြီးတပ်ပြီးတော့ကို အသေအချာ ရွေးသွားခဲ့တာ။


စတိုင်သစ် မဂ္ဂဇင်း - အောက်တိုဘာလ- ၂၀၁၂


Monday, October 1, 2012

ချစ်ခဲ့ဖူးသော....



(၁)
ကားပါ့ကင်ထိုးပေးတဲ့ ကောင်ကလေးဆီက ကားသော့ လှမ်းယူလိုက်ပြီး ဗိုလ်ချုပ်ဈေးထဲကို ခြေလှမ်းကျဲတွေနဲ့ လှမ်းဝင်လာခဲ့လိုက်တယ်။ ကိုယ် သိတာပေါ့။၊ အားလုံးရဲ့ မျက်လုံးအကြည့်တွေဟာ ကိုယ့်ဆီမှာ။  ဘယ်ကိုမှ မကြည့်ဘဲ ခြေလှမ်းကို တမင်မြှင့်ပြီးတော့ ခပ်ပေါ့ပေါ့ လျှောက်မြဲ လျှောက်တယ်၊ ဘာမှ မဖြစ်သလို။

ကိုယ် ဘာမှမပြောင်းလဲဘူး မောင်။ အရင်အတိုင်းပဲ သိလား။ လန်းနေဆဲ  သွက်လက်နေဆဲ၊ ကိုယ့်အပြုံးတွေဟာလည်း အရင်ကလိုပဲ။ မောင်သိပ်ချစ်တယ်ဆိုတဲ့ အပြုံးလဲ့လဲ့တွေပဲ မောင်။  နာမည်ကြီးစားသောက်ဆိုင်တစ်ခုမှာ သီချင်းဆိုတဲ့ ကိုယ့်နာမည်နဲ့ ကိုယ့်မျက်နှာကို တော်တော်များများက ရင်းနှီးသိ သိနေကြတယ်။  အဆိုတော်တစ်ချို့စုပေါင်းဆိုကြတဲ့ အခွေ နှစ်ခွေမှာ ကိုယ် ပါဝင်သီဆိုခွင့်ရခဲ့တာမို့ လူ ပိုသိသွားတာလည်း ဖြစ်မယ်။ မောင်နဲ့ စားနေကျ ကြာဇံဆိုင်ရောက်တော့ ကြာဇံနဲ့ ၀က်သားလိတ် တစ်ပွဲမှာရင်း ကဗ္ဗလာဖျော်ရည်တစ်ခွက်ပါ မှာလိုက်တယ်။ "သကြားမထည့်နဲ့ ရေခဲလည်း နည်းနည်းပဲနော်"လို့ မှာတတ်တဲ့ မောင့်အသံကို ကိုယ့်နားတွေက ကြားလိုက်မိတယ်။ ရင်ထဲ အောင့်ခနဲ..ခံစားလိုက်မိပါရဲ့။

မဟောင်းသေးဘူးမောင်ရယ်။ ကိုယ့်အတွက်တော့ အသစ်တစ်ခုအဖြစ် ရင်ထဲ အမြဲပျိုးထားမိတော့မှာ....

မောင်....

မောင် ထားခဲ့တဲ့ အဲဒီမိန်းမတစ်ယောက်ဟာ လမ်းဟောင်းပေါ်မှာတင် ရပ်တန့်ကျဆုံးမနေဘဲ ဆက်လျှောက်နေခဲ့တယ်။ နာကျင်မှုတွေကို ခွန်အားအဖြစ်ပြောင်းလဲပြီး အချိန်မရွေး ပြန်လည်ချေပနိူင်ဖို့တော့ လက်သည်းတွေကို ၀ှက်ထားဆဲ။ ချေပနိူင်ဖို့ဆိုတဲ့စကားဟာ တကယ်တော့ ကိုယ့်စိတ်ကို ကိုယ် လှည့်စား ဖြေသိမ့်လိုက်တဲ့စကားပါမောင်ရာ။ လွမ်းတာကို နာတာနဲ့ထေရင်း အဲဒီအနာအတွက် မောင့်ဆီက တစ်ခုခုတော့ တန်ရာတန်ဘိုး ပေးချေစေရဦးမယ်လို့  ကိုယ်က တေးထားခဲ့တာရယ်။  "ညို  မင်းဟာ အတော်စိတ်မာတဲ့ မိန်းမ" လို့ မောင် ပြောပါဦးလား။ ကိုယ်က ရယ်နေလိုက်မယ်။ မောင့်ဆီက အကောင်းဆုံး ပြက်လုံးတစ်ခုကို ကြားလိုက်ရသလို။

မောင်တို့မြို့မှာ မမသိမ့်လောက် ချမ်းသာတဲ့ မိန်းမ မရှိဘူးမဟုတ်လား မောင်ရဲ့။ မောင်က ဂုဏ်သရေရှိသော သူဋ္ဌေးမ မမသိမ့်ရဲ့ ချစ်ခင်ပွန်း။ "မမသိမ့်ကို မောင် တကယ်မချစ်ပါဘူး၊ ဟုတ်လားဟင်" ဒါမျိုး ကိုယ်မေးလိမ့်မယ်လို့ မောင် ထင်နေလား။ မောင့်ကို ဒီတစ်သက် ပြောခွင့်မပြုတော့မဲ့ စကားတွေထဲမှာ အဲဒါလည်း ပါတယ်။ ကျေးဇူးပြုပြီး ဘယ်တော့မှ မပြောလိုက်ပါနဲ့ မောင်။

ဆက်လျှောက်ပါ မောင်ရာ။ ထားခဲ့ပြီးမှတော့ အမျှင်လာတန်းမနေပါနဲ့။ ကိုယ့်ဘ၀နဲ့ ကိုယ်။ မောင် သိချင်ရင်တော့ မောင်ထားခဲ့ပြီးတဲ့နောက် ကျန်ရစ်ခဲ့တဲ့ ကိုယ့်ရဲ့ အပိုင်းအစတွေကို ဆက်စပ်ပြရဦးမှာပေါ့လေ။ တစ်ခုပဲ ကတိပေးပါ မောင်..... 

နင်  မငိုပါဘူး လို့.....

(၂)

"ညို မောင့်ကို မောင်လို့ ခေါ်ပြီးမှ နင်လုံးနဲ့ ငါလုံးနဲ့ ပြောရင်လေ မောင်သိတ်ချစ်တာပဲ သိလား"
မောင် ပြောလေ့ရှိတယ်။ ကိုယ်ကလည်း လူလည်ကျစွာပဲ မောင်ချစ်တယ်ဆိုတဲ့ အဲဒီအသုံးအနှုန်းလေးကို ထည့်ထည့်ပြောနေကျ။

ကိုယ် မောင့်ကို စတွေ့ခဲ့တာက မှတ်မှတ်ရရ ကိုယ် ဆိုင်မှာ သီချင်းစဆိုတဲ့နေ့။ တိုက်တုန်းကတော့ အဆင်ကို ချောလို့။ စပြီးဆိုတော့မှ ကော်ရပ်စ်အပိုဒ်မှာ အသံကို မြှင့်အော်လို့ မရတော့တာ။ စားပွဲဝိုင်းတစ်ခုထဲက လူငယ်လေးတစ်ယောက် စင်ရှေ့ကို ရောက်လာပြီး "ခင်ဗျားတို့ဗျာ ဒီသီချင်းကို F ကီးနဲ့တီးမှတော့ ဆိုတဲ့သူ သေပြီပေါ့ဗျာ။ အော်ရီဂျင်နယ်က C ကီးနဲ့ဗျ" လို့ ခပ်အုပ်အုပ် လာပြောတယ်။ ကိုယ်လည်း တီးဝိုင်းက အသံကို နှိမ့်ချလိုက်တုန်း စကားလေးနည်းနည်းပါးပါးပြောရင်း ကိုယ့်ကိုယ်ကို မိတ်ဆက်နေလိုက်တယ်။ မိတ်ဆက်အပြီး တီးလုံးပြန်အစမှာ ကီးက သူပြောသလို C ကီးကို ပြန်အချိန်းမို့ အဆင်ပြေပြေပဲ ဆက်ဆိုခဲ့နိူင်တယ်။ ကြည့်စမ်း ဒါ သူတို့ ကိုယ့်ကို သက်သက်လုပ်ကြံတာ။ လူသစ်တွေထဲက အလားအလာရှိတဲ့ အသံရှင်မို့ လက်ရှိအဆိုရှင်အမျိုးသမီးတွေက တီးဝိုင်းနဲ့ပေါင်းပြီး လုပ်တာလို့ နောက်မှ ပြန်သိရတယ်။ ပြောရရင် ပညာအပြခံလိုက်ရတာပေါ့လေ။ ကိုယ်တို့လောကမှာ ဒါမျိုးတွေက အဆန်းမဟုတ်ဘူးတဲ့ မောင်ရဲ့။



မောင်တော့ သိပြီးသားနေမှာပါလေ၊ အမေနဲ့ ကိုယ့်အကြောင်း။ ဒါပေမဲ့ ကိုယ် ထပ်ပြောပြချင်နေတယ်။

ကိုယ့်အမေရဲ့ နောက်ယောကျာ်းနဲ့ တစ်မိုးထဲအောက်မှာ ခြေခြေငံငံ အတူမနေနိူင်တဲ့ သမီးတစ်ယောက်ဟာ ညိုပေါ့ မောင်ရယ်။ မိုက်လိုက်တာပဲ ပြောပြော၊ ရည်မှန်းချက်ကြီးတယ်ပဲဆိုဆို ကိုယ့်အဒေါ်မိသားစုရှိရာ ရန်ကုန်မြို့ကို ကိုယ်တစ်ယောက်ထဲ ထွက်လာခဲ့လိုက်တယ်။ အမေ့မျက်ရည်တွေအတွက် ထိခိုက်ခံစားရမှုတွေဟာ ပထွေးမျက်နှာမြင်မိတာနဲ့ ကြက်ပျောက်ငှက်ပျောက် ဆိုသလို ကိုယ့်ဆုံးဖြတ်ချက်ကို ပိုမိုခိုင်မာစေခဲ့တာ။ အမေ့ကိုတော့ သနားမိပါတယ်။ 

အလုပ်မကောင်းလို့ဆိုတဲ့ အကြောင်းပြချက်နဲ့ ကိုယ့်ထက်အသက်ကြီးတဲ့ မုဆိုးမတစ်ယောက်လုပ်စာကို အခန့်သားထိုင်စား၊ လက်ဖြန့်တောင်းရုံနဲ့တောင် မရှက်နိူင်သေးဘဲ အရည်ကလေးတစ်မြမြနဲ့ ဒင်းအချိုးကို အဖေခေါ်ဖို့ဝေးလို့ ကိုယ်က အန်တောင်အန်လိုက်ချင်သေးတာ။ " ကိုကျော့က မမူးရင် ကောင်းပါတယ် သမီးရယ်"ဆိုတဲ့ အမေ့အသံပျော့ညက်ညက်မှာ ကိုယ့်မျက်စောင်းတွေ ကြွေကျရတာ အခါခါ။ အမေ့ကို ထိုင်ကန်တော့ပြီးအထွက်မှာ အမေ့ဆီက အိကနဲ ရှိုက်သံဟာ ကိုယ့်နှလုံးသားတွေကို ဆွဲညှစ်လိုက်သလို၊ ကိုယ့်ခြေထောက်တွေကို ဖြတ်ရိုက်ချလိုက်သလို ကိုယ်ဟာ ယိုင်ကနဲ။ 

ကိုယ်က ခေါင်းမာတယ် မောင်ရဲ့၊ ဆုံးဖြတ်ပြီးတဲ့ ကိစ္စတစ်ခုအပေါ် အဆုံးထိသာ လျှောက်လိုက်ချင်တာ။ ကိုယ်ရွေးချယ်လျှောက်လှမ်းဖြစ်တဲ့ လမ်းမှာ ကြုံလာမဲ့အမှားတွေ ရှိလာရင်လည်း မျက်နှာချင်းဆိုင်ရဲတဲ့ သတ္တိ ကိုယ့်မှာ အပြည့်ရှိတယ် မောင်။

(၃)

အဒေါ်အိမ်မှာတော့ ကိုယ်နေရတာ အနေအစားဆင်းရဲတာကလွဲလို့ အဆင်ပြေပါတယ်။ ကိုယ်က ဒီအဒေါ်လက်ပေါ်မှာပဲ ကြီးပြင်းလာခဲ့ရသူမို့ အဒေါ်ကလည်း ကိုယ့်အပေါ် သံယောဇဉ်ကြီးရှာပါရဲ့။ အဒေါ့်မှာက ကလေး လေးယောက်နဲ့မို့ သူတို့မိသားစု ခြောက်ယောက်အပြင် ကိုယ့်အတွက်ပါ တာဝန်ယူလိုက်ရတာကိုတော့ ကိုယ် အားနာမိတယ်။ ကိုယ်လို သာမန်ဘွဲ့လေးတစ်ခုရထားတဲ့ မိန်းမတစ်ယောက်အတွက် အလုပ်တွေကလည်း ရှားပါ့။ နောက်ဆုံးတော့ ကိုယ်ဝါသနာပါတဲ့ သီချင်းတွေကို ဆိုရင်း သင့်တင့်တဲ့ ဝင်ငွေလေးလည်းရတဲ့ ဒီအလုပ်ကို ကိုယ်ရွေးချယ်ခဲ့တော့တာ။ ကိုယ်သီချင်း စဆိုရတဲ့နေ့မှာပဲ မောင်နဲ့ စတွေ့ခဲ့တာကတော့ တိုက်တိုက်ဆိုင်ဆိုင်လို့ပဲ ဆိုရတော့မယ်။

ဆိုင်မှာက လူအမျိုးမျိုးနဲ့ ပေါင်းသင်းဆက်ဆံနေခဲ့ရတာပါပဲ မောင်ရယ်။ ကိုယ်က အနေတည်တော့ ပလူးချင်တဲ့ လူတွေနဲ့တော့ အခန့်မသင့်လှဘူးပေါ့။ စားသောက်ဆိုင်ဆိုတာက လာတဲ့ အယောက်တစ်ရာမှာ ကိုးဆယ့်ကိုးယောက်လောက်က သောက်စားမူးယစ်ကြမြဲ မဟုတ်လား။ ဆိုတော့ အနေအထိုင်တည်တံ့ပါမှ တော်ကာကျတာမောင်ရဲ့။ လက်တည့်စမ်းကြတာတွေကတော့ အများကြီးပေါ့။ ကယ်တင်ရှင်ဆိုင်းဘုတ်တွေနဲ့ ဦးဦးတွေ၊ ဘဘတွေကလည်းများ၊  ကိုကိုတွေ မောင်မောင်တွေကလည်း အများသားရယ်။ ခွင်တည့်ရင် ဘဝကြီးတစ်ခုလုံး ပြောင်းလဲသွားနိူင်တာဆိုတဲ့ ခံယူချက်ကို လက်ကိုင်ထားပြီး အလှအပနဲ့ အသွေးအသားနဲ့ အရွယ်နဲ့တည်ပြီး မျှားတဲ့ မိန်းကလေးတွေကလည်း ပေါပါရဲ့။

တစ်ခုပဲ မိုးခါးရေကို အများနဲ့တစ်ယောက် ငြင်းဆန်နေရတဲ့အဖြစ်ဟာ လက်တွေ့မှာ ထင်သလောက် မလွယ်လှဘူး မောင်။ အစမို့ပါကွာဆိုတဲ့ အပြောတွေ၊ သူက ဘာကောင်မမို့လဲ ဆိုတဲ့ အပြောတွေ၊ ရိသဲ့သဲ့တွေ၊ ခါးသက်သက်တွေ၊ စိမ်းတောက်တောက်တွေကို ကိုယ်တစ်ယောက်ထဲ လှိမ့်ခံနေခဲ့ရတာ။ အဲဒီမှာပဲ ပိုးဥနဲ့ကိုယ် ညီအစ်မအရင်းတွေလို တွယ်တာသွားကြဖို့ ဖြစ်လာခဲ့တာ။ ပိုးဥက ကိုယ့်လိုပဲ နယ်ကနေ တက်လာတဲ့ မိန်းကလေး။ မိသားစုအတွက် ဘဝတက်လမ်းရှာရင်း ဒီဆိုင်မှာ သီချင်းဆိုဖြစ်တဲ့သူ။ တစ်နေ့မှာ အောင်မြင်ကျော်ကြားတဲ့ အဆိုတော်ဖြစ်ရမယ်လို့လည်း ရည်မှန်းချက် ကြီးကြီးထားသူကလေးပေါ့ မောင်။ ပိုးဥကလေ သူ့နာမည်လေးလိုပဲ စိတ်ထားကလေးကလည်း တကယ့်နုနုနယ်နယ်ပျော့ဖတ်ဖတ်လေးရယ်။ ကိုယ်လို တုံးတိုက်တိုက် ကျားကိုက်ကိုက်နဲ့မှ လာတွဲမိတာကတော့ စိတ်အခြေခံရှင်းသူချင်းမို့သာ ဖြစ်မယ်။

မောင်နဲ့ ကိုယ်ချစ်သူတွေ ဖြစ်ကြပြီး ခြောက်လလောက်အကြာမှာ အတူနေကြဖို့ ပိုက်ဆံ စစုခဲ့ကြတယ်နော်။ ပိုးဥကလေ ကိုယ်နဲ့ မောင့်ကို သိပ်အားကျခဲ့တာ။ သူရွေးချယ်တဲ့အခါ မောင့်လို ချစ်တတ် ကြင်နာတတ်တဲ့ ရည်ရည်မွန်မွန်လူငယ်လေးတစ်ယောက်ကို ရွေးချယ်မှာတဲ့လေ။ ကိုယ်က ပြောလိုက်ပါတယ်၊ မောင်က ရည်မွန်တာတော့ ဟုတ်ပါရဲ့ မြုံစိအေးစက်နဲ့ ရင်ထဲမှာ သိမ်းထားတတ်တဲ့ လူစား၊ သူလိုလူစားမျိုးက စိတ်ပြတ်ပြီဆိုလည်း တစ်ခါထဲအပြတ်ပဲလို့လေ။ 

ကိုယ် ကြိုသိနေခဲ့တာများလား မောင်ရယ်.....

ငွေလေးနည်းနည်းပါးပါး စုဆောင်းမိလာတော့ ပိုးဥနဲ့ ကိုယ် တိုက်ခန်းလေးတစ်ခုမှာ အခန်းလေးတစ်ခန်း အတူငှားနေဖြစ်ခဲ့ကြတယ်။ အဒေါ်တွေဆီကပ်နေရတာလည်း ကိုယ်က အားနာလှပြီမို့ပေါ့ မောင်ရာ။ ပိုးဥနဲ့ နေရတာ အဆင်ပြေပါတယ်။ စရိုက်ချင်းတူသူမို့ ထင်ပါရဲ့။

ဆိုင်မှာ အတူသီချင်းဆိုကြတဲ့ အမျိုးသမီးတွေကတော့ ကိုယ်တို့ ခြေလှမ်းအမှားကို စောင့်နေခဲ့ကြတာပေါ့။ ဆိုင်ပိတ်လို့ အိမ် ပြန်ကြတဲ့အခါ ဘယ်ကားပေါ်များ ပါသွားလေမလဲပေါ့လေ။

(၄)

"မဟုတ်ဘူး မောင် ကိုယ်ရှင်းပြပါ့မယ်။ အဲဒီ့နေ့က ပိုးဥနေမကောင်းလို့ ကိုယ်တစ်ယောက်ထဲ အိမ်ပြန်ရဖို့ ဖြစ်လာတယ်။ ခါတိုင်း မောင်လာကြိုနေကျပေမဲ့ နေ့လည်က မောင် မအားဘူး ပြောထားတော့ ကိုယ်က မောင် လာကြိုနိူင်မယ် ထင်မထားဘူးလေ။ အပြန်လိုက်ပို့တဲ့ ကားကလည်း ကိုယ် အင်္ကျီလဲခန်းထဲမှာရှိနေတာ မသိတော့ ခါတိုင်းလည်း ကားနဲ့ လိုက်ခဲတာမို့ စောင့်မနေဘဲ ထွက်သွားတာ။ ဒါနဲ့ ဆိုင်မန်နေဂျာက သူ့ကားနဲ့ လိုက်ပို့တာ မောင်ရဲ့"

မောင် သိပ်မကြေလည်မှန်း ကိုယ် သိပေမဲ့ အဲဒီ့ကိစ္စက အဲဒီ့မှာတင် ပြီးသွားခဲ့တယ်။ မောင်က အလုပ်တွေများလို့ဆိုတဲ့ အကြောင်းပြချက်နဲ့ တစ်ပတ်လောက် ကိုယ့်ဆီမလာခဲ့ဘူး နော်။ လာမဲ့လာတော့လည်း နောက် ပြဿနာတစ်ခုက ဆီးကြိုလို့ရယ်။

"ညို အနေအထိုင်ဆင်ခြင်ရင် ကောင်းလိမ့်မယ်"

"ဘာကိုလဲ မောင်၊  ခုနက စင်ပေါ်ကကိစ္စလား"

"ဒါပဲပေါ့ ညိုရယ် မူးနေတဲ့ကောင်တွေနဲ့ သိတ်မရောနဲ့လို့ မောင်ပြောထားရက်နဲ့"

"ညိုက သွားရောနေတာမှ မဟုတ်တာဘဲ မောင်၊ ညို့အလုပ် ညိုလုပ်တာပဲ၊ သူတို့က မူးရူးပြီး ပန်းကုံးလာစွပ်ရင်း ညို့ကို လက်ဆွဲနှုတ်ဆက်တာ"

"အေးလေ လက်ဆွဲနှုတ်ဆက်တာက လွှတ်ကို မလွှတ်တော့ဘူး၊ မင်းမျက်နှာကိုကလည်း သဘောတကျပြုံးနေတာကိုး"

"တော်တော့  တော်ပါတော့မောင်၊ မောင် ကိုယ့်အပေါ် ဒီလောက်ပဲ တွက်ထားသလား၊ ကိုယ် ဘယ်လိုမိန်းမဆိုတာ မောင် နားလည်တယ်လို့ ကိုယ်ထင်ထားတာ ကိုယ့်အမှားပဲ"

အဲဒီ့ညက မောင် ကိုယ့်ကို အိမ်ပြန်မပို့ခဲ့ဘူးနော်။ ခြေလှမ်းကျဲတွေနဲ့ ကျောခိုင်းထွက်သွားတဲ့ မောင့်ကို မြင်ကွင်းကနေပျောက်တဲ့အထိ လိုက်ကြည့်ရင်း ကိုယ့်မျက်ရည်တွေကို ပါးပြင်ပေါ် လွတ်လွတ်လပ်လပ်ကြီး ကျစေလိုက်ခဲ့ပါတယ်။  စီးပါစေတော့လေ။  မောင်ကမှ မမြင်နိူင်ခဲ့ပြီပဲ။  ပိုးဥက ကိုယ့်ကို မောင်နဲ့ထားခဲ့ပြီး အပြန်လိုက်ပို့တဲ့ကားနဲ့ လိုက်သွားခဲ့တော့ အဲဒီ့ညက ကိုယ်တစ်ယောက်ထဲ အတော်လေးကြာအောင် အငှားကား စောင့်ခဲ့ရတာ။ ကိုယ်လေ ညဥ့်နက်အမှောင်ကြောင့် မဟုတ်ဘဲ အထားခံခဲ့ရသူတစ်ယောက်ရဲ့ လပ်ဟာမှုမျိုးနဲ့ အားတွေငယ်လိုက်တာ။ ကားပေါ်မှာ တစ်လျှောက်လုံး ကိုယ့်မျက်ရည်တွေ အသံတိတ်ကျနေခဲ့တယ် မောင်။

မောင် မလာခဲ့ပြန်ဘူးနော်။ တော်တော်လေး ကြာတယ်။ ကိုယ်ကလည်း ကိုယ့်ဘက်ကအမှန်မို့ မာနနဲ့ တင်းခံနေခဲ့တာ။ မောင်ကဖြင့် ဖုန်းလေးတစ်ချက်တောင် အခေါ်မရှိခဲ့ဘဲ တစ်နေ့မှာတော့ ပိုးဥကတစ်ဆင့် သတင်းစကားတစ်ခု ကြားရတယ်။ မောင်  မောင်တို့မြို့က သူဋ္ဌေးမတစ်ယောက်နဲ့ လက်ထပ်လိုက်ပြီ တဲ့။ ကိုယ် ပြုံးမိတယ်။ " ဒီတော့လည်း တို့နှစ်ယောက် စုထားတဲ့ စုငွေတွေ ကိုယ်တစ်ယောက်ထဲ ပိုင်ပြီပေါ့ ပိုးဥရာ"လို့ ဆိုတဲ့ ခပ်ထေ့ထေ့ကိုယ့်စကားကို ပိုးဥက မျက်လုံးကလေး အကြောင်သားနဲ့ ငေးကြည့် ရှာတယ်။

ဒါပဲ မောင်ရဲ့၊ မောင်က အဲသလောက်ကို လွယ်လွယ် ထားပစ်ရက်ခဲ့တဲ့သူ။ ကိုယ်ကလည်း ဘာမှ မဖြစ်သလို ဟန်ဆောင်ကောင်းစွာ  တစ်စစီနှလုံးသားတွေကို လူမသိအောင် သိုဝှက်ရင်း အပြုံးတုတွေ တပ်ဆင်နိူင်စွမ်းခဲ့တဲ့ မိန်းမရယ်လေ။

အဲဒီနောက်မှာ အမေဆုံးလို့ ကိုယ်တို့မြို့ကလေးကို ခဏ ပြန်တယ်။ အမေက ကိုယ်အိမ်ထောင်ပြုတဲ့အခါ ကိုယ့်အတွက် လက်ဖွဲ့ဆိုပြီး သူ့လက်ဝတ်လက်စားလေးတစ်ချို့ထားခဲ့ရှာတယ်။
မောင် စွန့်ပစ်ထားခဲ့တဲ့ကိုယ့်ရင်ကို ပြင်းပြင်းထန်ထန်နာကျင်စေခဲ့တဲ့ အမေ့ရဲ့ နောက်ဆုံးလက်ဆောင် ဆိုပါတော့ မောင်။

အဲ့ဒီ့အချိန်မှာ ကိုယ် အရူးအမူးလိုအပ်နေတာ မောင့်ပခုံးစွန်းလေးတစ်ခုပဲဆိုတာ မောင့်ကို သိစေချင်ခဲ့တယ်။ မောင့် ညာဘက်လက်မောင်းလေးရယ်၊ ကိုယ် နမ်းမွှေးဖူးခဲ့တဲ့ မောင့်ညာဘက် နားထင်စပ်လေးရယ်ပေါ့။ ကိုယ် တစ်ကယ်ပဲ ရူးသွပ်စွာလိုအပ်ခဲ့တာပါ မောင်။

တစ်ယောက်နှုတ်ခမ်းကို
တစ်ယောက်က ထိတိုင်းသာ
နမ်းကြတာပါလို့ ဆိုကြရင်
ရှင်နဲ့ ကျွန်မ အကြိမ်ကြိမ် နမ်းဖူးခဲ့ကြ….

တကယ်ပါ မောင်။ ကိုယ်တို့နှစ်ယောက် ချစ်ခဲ့ကြဖူးပါတယ် နော်....တစ်ချိန်ကပေါ့  မောင်ရာ....

(၅)


နယ်ကပြန်လာလို့ ကိုယ် ဆိုင်ကိုပြန်ရောက်တဲ့အခါ နောက်လူသစ်မိန်းကလေးတွေ ထပ်ရောက်နေခဲ့ပြီ။  ပိုးဥက တစ်ချို့ ကောင်မလေးတွေနဲ့ ရင်းနှီးခင်မင်လို့တောင် နေတာ။ အင်းပေါ့လေ ကိုယ်မရှိတဲ့အခါ သူ့မှာ အပေါင်းအသင်းရယ်လို့ လိုအပ်တာပဲလေ။ ဒါပေမဲ့ အဲ့ဒီမိန်းကလေးတွေက ပိုးဥနဲ့ ကိုယ်နဲ့လို မဟုတ်ဘူး၊ စရိုက်တွေက ခပ်ဆိုးဆိုးလေးတွေ။ ကိုယ် ဘာမှတော့ မပြောခဲ့ဘူး။ ပိုးဥလည်း အရွယ်ရောက်နေပြီပဲ။ ကိုယ်က နေရာတကာ လိုက်ပါလို့ မသင့်တော်တာမို့ ဒီအတိုင်းပဲ ရေလိုက်ငါးလိုက်နေခဲ့လိုက်တော့တယ်။

တစ်ည...။ အဲဒီ့တစ်ညကို ကိုယ် ဘယ်တော့မှ မမေ့ဘူး။ ပိုးဥက နေလို့ သိတ်မကောင်းဘူးဆိုပြီး ခပ်စောစော ပြန်သွားခဲ့တာ။ ကိုယ်က ဆိုင်ကလိုက်ပို့တဲ့ကားနဲ့ပဲ ပြန်လာခဲ့လိုက်တယ်။ အိမ်ရောက်တော့ တံခါးဝမှာ ယောကျာ်းဖိနပ်တစ်ရံ။  ရင်တွေတောင် လှိုက်ကနဲ ခုန်သွားသေးတာ၊  မောင်...မောင်များလား ရယ်လို့လေ။  နောက်မှ အို...သူက သူ့အိမ်ထောင်နဲ့သူပဲရယ်လို့ ကိုယ့်စိတ်တွေ လက်ရှိပြန်ရောက်တော့တာ။ ဖိနပ်က ကိုယ်တစ်ခါမှ မတွေ့ဘူးတဲ့ ဖိနပ်။  သော့ဖွင့်ပြီး အခန်းထဲ အဝင်၊ အမှောင်ထဲမှာ ရုတ်တရက် ပြာနေတဲ့ မျက်လုံးတွေက အသားမကျသေးခင်ကလေး အာရုံမှာ လှုပ်ရှားနေတဲ့ အသံတစ်သံကြောင့် မသိုးမသန့်စိတ်တွေနဲ့ ပိုးဥခုတင်ဘက် ဖျတ်ကနဲ လှမ်းအကြည့်...။  ဘုရား...ဘုရား...လူအရိပ်နှစ်ခုဟာ ပိုးဥခုတင်ပေါ်မှာ...။ အသက်ရှူရပ်မတတ် လန့်သွားရင်း တုန်ယင်နေတဲ့ လက်တွေက သော့ကို အလိုလို ပြန်ခတ်မိရက်သား။ လှေကားအတိုင်း အပြေးတစ်ပိုင်း ပြန်ဆင်းချလာရင်း တိုက်နံရံကို ကျောမှီချလိုက်တော့ မျက်ရည်တွေက ကိုယ့်ပါးပြင်ပေါ် အလိုလို စီးကျလာခဲ့တယ်။

ကိုယ့်စိတ်ထဲ ဝမ်းနည်းသလိုလို၊ တစ်ခုခုကို ဆုံးရှုံးလိုက်ရသလိုလို လှိုက်တက်လာတဲ့စိတ်ဟာ ပြောပြလို့တောင်မတတ်ဘူး မောင်။ အေးစိမ့်နေတဲ့ ညဥ့်လယ်အမှောင်ထဲမှာ ကိုယ်တစ်ယောက်ထဲ တိုက်နံရံကို မှီရက် ထိုင်ချလိုက်ရင်းက မိုးလင်းရတော့မဲ့ အဖြစ်။ မောင်ရေ.....။  ကိုယ့်ကို လှမ်းကြည့်လိုက်ပါဦးတော့...။  ကိုယ်  မောင့်ကို သတိရနေလို့။ ပြင်းပြင်းထန်ထန် သတိတွေ ရနေလို့ပါ။ ထိုင်ချရက်က ဒူးခေါင်းပေါ် ခေါင်းတင်ရင်း ကိုယ် ငိုချမိခဲ့တယ်။  မောင်သာ ကိုယ့်အနား ရှိနိူင်ရင်လေ...ကိုယ် ဒီလောက် ၀မ်းနည်းမှာ မဟုတ်ဘူးကွယ်။ အလွတ်ရနေတဲ့ ဖုန်းနံပါတ်တစ်ခုက ဖုန်းမှတ်ဉာဏ်ထဲက ဖျက်လိုက်ပြီးတာတောင် နှလုံးသားထဲက ဖျက်မရတာ အခက်ရယ်။ ခေါ်လိုက်ချင်ပေမဲ့ ကိုယ် ဘာပြောရမှာလဲ။ ခုချိန်မှာ ကိုယ် မောင့်ကို လွမ်းဆွတ်နေတဲ့ အကြောင်းလား။ ကိုယ် မောင့်ကို အားကိုးတကြီး ပြောပြစရာတွေ ရင်ဖွင့်ချင်တဲ့ အကြောင်းလား။ ကိုယ့်လက်က ဖုန်းနံပါတ်တွေကို နှိပ်မိတော့မလို...အကြိမ်ကြိမ်ရယ်...။

ကံဆိုးမိုးမှောင်တွေဟာ အဖော်နဲ့လာတယ်ဆိုတာ ကိုယ် လက်ခံလိုက်ရပြီ မောင်။ နောက်တစ်နေ့မနက်မှာ တူအကြီးကောင် ဖုန်းဆက်လာလို့ ကိုယ့်အဒေါ် လေဖြတ်သွားတယ် ဆိုတာ သိလိုက်ရတယ်။ ချက်ချင်းပဲ အိပ်ယာက ထပြီး ဆေးရုံလိုက်သွား၊ ရှိစုမဲ့စု  စုဆောင်းထားတာလေးတွေထဲက အဒေါ့်အတွက် ဆေးကုဖို့ ဖဲ့ပေး။  ကိုယ့်ကို မြင်တော့ အဒေါ်က မျက်ရည်ကျရှာတယ်။ စကားတွေ ဝူးဝူးဝါးဝါး ပြောလို့ရယ်။

ဘ၀ကြီးကိုက…
လိုရာပုံသွင်း  ခပ်ပြင်းပြင်းမီးဖုတ်
အခြောက်ခံ စဥ့်ရေသုတ်ပြီးမှ…
တခါတလေ လက်သင့်ရာအရောင်ခြယ်ပြီးမှ
ဈေးကွက်ဝင်အောင် မွမ်းမံခံကြရ…..

တကယ်ပဲ မောင်။ ဘဝမှာ ကံဇာတ်ဆရာရဲ့ စေခိုင်းရာ ကျရာဇာတ်ရုပ်အတိုင်းပေါ့လေ...။ ပူလောင်လိုက်တာများ။ ကိုယ့်မှာ သွေးသားအရင်းအချာရယ်လို့ အားကိုးလောက်စရာ မရှိတော့တဲ့အခါ တစ်ကောင်ကြွက်ဆိုတဲ့စကားဟာ ဘယ်လောက်ခါးမှန်း  မြည်းစမ်းခွင့်ရခဲ့ပါရဲ့။ မောင့်ကို ဘယ်လောက် သတိရနေတယ်ဆိုတာကိုတော့  ကိုယ် ပြောမနေချင်တော့ပါဘူး မောင်ရယ်။

(၆)

ပိုးဥမှာ ကိုယ်ဝန်ရှိနေပြီလို့ သိရတဲ့အခါ ကိုယ်က အံ့သြဟန်လုံးလုံး မပြခဲ့ပေမဲ့ ဆိုင်က အမျိုးသမီးတွေရဲ့ သရော်မော်ကားအကြည့်တွေ၊ ကဲ မပြောဘူးလားဆိုတဲ့ အပြုံးတွေကို ကိုယ်တို့ ရင်ဆိုင်ခဲ့ကြရတယ်။
ကိုယ်လည်း အနေရပိုခက်လာတယ်။ ကံကောင်းတာက ပိုးဥလူက သူ့တာဝန် သူယူခဲ့တာပဲ။ ပိုးဥ လက်ထပ်သွားပြီးတဲ့နောက်မှာ ကိုယ်တစ်ယောက်ထဲ အထီးကျန်ဆန်ခြင်းဆိုတာကို ပီပီပြင်ပြင် ခံစားလာရတယ်။

ပိုးဥနဲ့ နှစ်ယောက်စပ် ငှားခဲ့ကြတဲ့ အခန်းကို ကိုယ်တစ်ယောက်ထဲ မနိူင်လို့ နောက်တစ်ယောက် ထပ်ရှာရတယ်။ ကိုယ်တို့ဆိုင်က နောက်ဝင်လာတဲ့ လူသစ် ကောင်မလေးတစ်ယောက် နေချင်လှချည်ရဲ့ ဆိုတာနဲ့ ကိုယ်လည်း အခန်းဖော်လိုနေတဲ့ အချိန်မို့ သူနဲ့ စပ်ငှားဖြစ်ခဲ့ကြတယ်။ မဟန်ပါဘူး မောင်ရာ၊ အိမ်ပေါ်ကို ယောကျာ်းဧည့်သည်တွေ ခေါ်မလာရလို့ သဘောတူထားပေမဲ့ လစ်ရင် လစ်သလို ခေါ်ခေါ် လာတတ်တယ်။ ကိုယ်နဲ့ ခဏခဏ တိုးပေမဲ့ သူက ခပ်တည်တည်ရယ်။ ကြာလာတော့ သူမပြောင်းရင် ကိုယ်ပဲ ပြောင်းဆင်းမယ်ဆိုပြီး ကိုယ်ဖာသာ အခန်းလိုက်ရှာရတယ်။ 

အဲဒီမှာ ကိုယ် အစ်ကိုကြီးနဲ့ တွေ့တာပဲ။ အစ်ကိုကြီးက အိမ်ခြံမြေ ပွဲစားတစ်ယောက်။ တိုတိုပြောရရင် မောင်ရာ စိတ်သဘောထား ရိုးရှင်းဖြူစင်တဲ့၊ ကိုယ့်အပေါ် နှမလေးလို စောင့်ရှောက်တတ်တဲ့ အစ်ကိုကြီးအပေါ် အားကိုးစိတ်တွေနဲ့ ကိုယ်အစ်ကိုကြီးနဲ့ လက်ထပ်ဖြစ်ခဲ့တယ်။ ကိုယ် အစ်ကိုကြီးကိုကြိုက်တယ် မောင်။ အိမ်ထောင်ဘက်တစ်ယောက်အဖြစ် ကိုယ် ကြိုက်လို့ ကိုယ်ရွေးချယ်ခဲ့တယ်။ မောင်က ဘယ်က ဘယ်လို သတင်းအကြားနဲ့ ကိုယ့်ကို ဆက်သွယ်လာတယ် မသိဘူး။ တစ်နေ့မှာ လုံးဝမျှော်လင့်မထားဘဲ မောင့်ဆီက ဖုန်းဝင်လာတယ်။

"ညို မင်းလည်းပဲ အမျှားတော်သူပဲ နော်" တဲ့။

"ဟဟဟား"  ကိုယ် အော်ရယ်ခဲ့လိုက်တယ်။

"ဒီမှာ မောင်က ခုမှ လွတ်တဲ့ငါး ကြီးနေတာလား"ဆိုတော့ ခံပြင်းဒေါသထွက်တဲ့အသံနဲ့ တုန့်ပြန်တယ်။ အတော်ရယ်ရတဲ့ မောင်။

အိုးချင်းထားလို့သာ အိုးချင်းထိခဲ့ရတဲ့နောက်
ကံကြမ္မာကို ယိုးမယ်ဖွဲ့ဖို့များ မကြိုးစားစမ်းပါနဲ့ရှင်
ကံတူအကျိုးပေးတွေ ဖြစ်လာပြီးမှပဲ
ခပ်ရဲရဲပေါ့၊   ဘယ်တော့လဲဆိုရင်
ငွေရှင်ကြေးရှင်တွေ မျက်စေ့ကျလို့ သိမ်းပိုက်ခံကြရတဲ့အခါ
ကျွန်မလည်း ကျွန်မလမ်းထွင်၊  ရှင်လည်း ရှင့်လမ်းလျှောက်
တစ်ယောက်တစ်နေရာ၊ တော်ရာမှာ ပျော်အောင်နေကြရတဲ့အခါ…

မဟုတ်ဘူးလားမောင်။ မောင် ကြိုက်တဲ့လမ်း မောင်ရွေးခဲ့ပြီးတဲ့နောက် ဘာလို့များ ကိုယ့်ဆီက ထုချေလွှာတောင်းနေရသေးတာလဲ။  

"ဦးတင့်မင်းဇော်ကို ညို ဘာလို့ လက်ထပ်ခဲ့တာလဲ" တဲ့။

"မောင်  မမသိမ့်ကို ဘာလို့ လက်ထပ်ခဲ့သလဲလို့  ကိုယ် တစ်ခါမှ မမေးခဲ့ပါဘူးနော်" ဆိုတော့ တောက်တစ်ချက်ခေါက်တယ်။ ရယ်ရတဲ့ မောင်။

"ကိုယ် ရန်ကုန် လာစရာ ရှိတယ်။ ကိုယ်တို့ တွေ့နေကျ ဗိုလ်ချုပ်ဈေးက ကြာဇံကြော်ဆိုင်မှာ တွေ့လို့ ရမလား" တဲ့လေ...

"အင်း ရပါတယ်၊ အစ်ကိုကြီးကို ပြောပြီး သူ ခွင့်ပြုရင် လာမယ်လေ" လို့ ကိုယ်က ပြောတော့ မောင်က ခပ်ရွဲ့ရွဲ့ ရယ်တယ်။ 

" ကြောက်ရသလား"  တဲ့။

"ဟဟဟ  လေးစားတာပါ" လို့ ကိုယ်က ပြောခဲ့လိုက်တယ်။

 (၇)

ကိုယ်တို့ ခါတိုင်းတွေ့နေကျ ကြာဇံကြော်ဆိုင်မှာ စောင့်ရင်း ကိုယ်သောက်နေတဲ့ ကဗ္ဗလာဖျော်ရည် တစ်ဝက်အကုန်လောက်မှာ မောင် ရောက်လာတယ်။  ထုံးစံအတိုင်း နောက်ကျတတ်တဲ့ မောင့်အကျင့်က အရင်အတိုင်း။ 

"ဘာတွေ ဖြစ်ခဲ့လဲ" တဲ့။

မေးနိူင်သေးတယ်နော်....။ ကိုယ်က ဖြစ်ပျက်ခဲ့သမျှ အတိုချုံး ပြောပြလိုက်တော့ "ညို သိပ်ပင်ပန်းခဲ့မှာပဲနော်"  တဲ့။ တော်ပါတော့ တော်ပါတော့မောင်ရယ်၊ ပစ်ချထားတုန်းက ထားခဲ့ရက်ပြီးမှ နှစ်သိမ့်သလိုလို စကားတွေဟာ ကိုယ့်ကို ချက်ချင်း အနာဖေးတက်စေမယ်လို့များ ထင်နေသလား မောင်။ ထားပါတော့လေ...ခုက မောင် ဘာလိုချင်တာလဲ။ ကိုယ်တို့နှစ်ယောက်က တစ်ယောက်တစ်လမ်းစီ ရွေးချယ်ထားတဲ့ လမ်းတွေကိုယ်စီပေါ်မှာ...။ 
ခုမှ....၊  ခုကျမှ မောင်က...

"အော် ဒီမှာ"

ကိုယ်က စာအိတ်လေး တစ်အိတ်ထုတ်ပေးတော့ မောင်က မျက်ခုံးတွေ ပင့်ကြည့်လို့...

"ပိုက်ဆံလေ မောင်နဲ့ကိုယ် တစ်ယောက်တစ်ဝက် ပိုင်သင့်တယ် ထင်လို့၊ အရင်က နှစ်ဦးသဘောတူ စုထားခဲ့ကြတဲ့ ပိုက်ဆံလေ။ ဒီအိတ်ထဲမှာ မောင့်စုငွေ တစ်ဝက်တိတိရှိတယ် ရေကြည့်ပါဦးလား"

ကိုယ့်အပြောမှာ မောင့်မျက်နှာဟာ သပြေသီးမှည့်တစ်လုံးလို ရဲကနဲ။

ဒါပဲ....။  ဒါပါပဲ မောင်။ ကိုယ် သွားတော့မယ်။ ကျန်းမာအောင်နေပါ မောင်။ 

ကိုယ် မောင့်မျက်နှာကို တစ်ချက်ကလေးမှ မကြည့်ဘဲ ထထွက်လာခဲ့တယ်။ မောင်ကရော ငွေတွေကို ရေတွက်နေမလား၊ ကိုယ့်နောက်ကျောကို လိုက်ငေးကြည့်နေမလား၊ ဒါမှမဟုတ် စိတ်ပျော့တဲ့ မောင်က မျက်ရည်တွေ တွင်တွင်ကျအောင်များ ငိုနေမှာလား...။ ကိုယ် သိဖို့မှ မလိုအပ်တော့ဘူးပဲကွယ်။  သေချာတာက ကိုယ်နဲ့ မောင် ချစ်ခဲ့ကြဖူးတယ်....။

တစ်ခုတော့ အမှတ်ရပါ…
ကျွန်မတို့က ပင့်သက်ရှုခဲ့ကြတာမဟုတ်ဘူး
ဒါ  သေချာတယ်…
ရှင်နဲ့ကျွန်မ အကြိမ်ကြိမ် နမ်းဖူးခဲ့ကြ….

ဟုတ်တယ်...။  ချစ်ခဲ့ကြတယ်၊ အဲဒါ...ကိုယ် သိပ်သေချာပါတယ်   မောင်....


မန္တလေးအိုင်ကွန်း မဂ္ဂဇင်း - ဇွန်လ - ၂၀၁၃

(အရင်က တင်ခဲ့ဖူးပြီးသားပါ။ မဂ္ဂဇင်းထဲ ခုမှ ပါလာတာမို့ မဖတ်ရသေးတဲ့သူတွေ အတွက် ပြန်တင်ပေးလိုက်ပါတယ်။  သရုပ်ဖော်ပုံလေးကို အတော် သဘောကျပါတယ်။  ကွဲနေတဲ့ တစ်ခြမ်းပဲ့အသည်းလေးတွေကို လေးလံစွာသယ်ပိုးရင်း တစ်ယောက်တစ်လမ်းစီ ကျောခိုင်းသွားနေကြတဲ့ ချစ်သူနှစ်ယောက်ရယ်ပါ.....)